Ижкар-26 °C
19 -тӥ толшор 2021 Пуксён
18+

Трофим Архиповлы сӥзем интернет-викторина ортчытӥзы Можга ёросын

  • 792
  • 0
Можга / Удмуртия
Трофим Архиповлы сӥзем интернет-викторина ортчытӥзы Можга ёросын
Туспуктэм: vk.com (Можгинский район)

Можга ёросысь лыдӟетъюрт карын но ёросын улӥсьёс понна удмурт гожъясьлэн Трофим Архиповлэн 110 ар тырмонэзлы сӥзем «Бия вадьсысь кизили» интернет-викторина ортчытӥз. Со сярысь «Можга ёрос» муниципал кылдытэтлэн «ВКонтакте» вотэсысь нимлыко бамаз ивортэмын.

Удмурт Элькунын Можга ёрос литературалэн нуналъёсыз улсын радъям визьсынанэ Трофим Архиповлэн творчествоеныз тунсыкъяськонэз азинтыны но солэсь произведениоссэ лыдӟыны мылкыдэз ӝутӥсь юанъёс пыртэмын вал.

Викторинае ёросысь библиотекаосы ветлӥсь 35-лэсь трос лыдӟисьёс мыло-кыдо пыриськизы. Визьзэс сынаны мылкыд каремзы сярысь нырысетӥосыз пӧлын ялӥзы Можга карысь 8 номеро гимназиысь 8 «г» классын дышетскисьёс. Йылпумъянъёсъя, соос улосчизылэсь творчествозэ тужгес но умой тодэмзэс возьматӥзы. Ӟуч кылъя но литературая дышетӥсьсы, классэн кивалтӥсьсы Римма Гареева кивалтэм улсын соос юанъёслы рос-прос но шонер валэктонъёс сётӥзы. Со понна пиналъёс нырысетӥ степенё диплом басьтӥзы.

Кыкетӥ степенё диплом басьтӥзы Быдӟымсурд школаысь библиотекарь Чернова Н. М. но отысь ик удмурт кылъя но литературая дышетӥсь Чукарева Л. В, соос одӥг мында балл басьтӥзы. 3-тӥ степенё дипломъёсын пусъемын Можгаысь гурт лыдӟетъюртысь лыдӟиськись Бакулина Т. С. но Вылын Юри гуртысь лулчеберетъя юртысь чеберлыкъя кивалтӥсь Павлова Е. И. Мукетъёсыз ужрадэ пыриськисьёс сертификатъёс но таукаронъёс басьтӥзы.

Вормисьёсты пусъён куарусён пумын Выль Бия гуртысь Трофим Архиповлы синпелет дорын «Литературная библиотечная тропа» сӥё-дано ужрадын ортчоз.

Тодэ вайытом, Удмуртиын Можга ёрос литературалэн нуналъёсыз улсын элькунын быдэс ар ӵоже пӧртэм ужрадъёс ортчозы. Кылсярысь, южтолэзе Йӧскалык лыдӟетъюртлэн шаертодон литературая центраз «Выль книгаос, выль нимъёс» адӟытон ужаз. Озьы ик Йӧскалык лыдӟетъюртлэн сайтаз виртуальной 3D-адӟытон кылдытэмын.  



Наверх
Вниз