Ижкар+12 °C
10 -тӥ куартолэзь 2021 Вордӥськон
18+

Удмурт кылын бард кырӟанъя «ТылоБурдо» фестиваль Пичи Пурга ёросын туэ элькун ним басьтӥз

  • 771
  • 0
Тыло / Удмуртия
Удмурт кылын бард кырӟанъя «ТылоБурдо» фестиваль Пичи Пурга ёросын туэ элькун ним басьтӥз
Туспуктэм: Диана Чайникова

Пичи Пурга ёросысь Тыло гуртын радъяськись удмурт кылын бард кырӟанъя куинетӥез «ТылоБурдо» фестиваль туэ элькун ним басьтӥз. Радъясьёс чакламъя, 21-тӥ куарусёнэ ортчоно ужрад Пичи Пурга, Алнаш, Кияса но Дэри ёросысь кырӟасьёсты люкалоз. Со сярысь ивортодэтъя «Удмуртия» агентстволы ёрос лыдӟетъюртысь ёзэтлэн кивалтӥсез Елена Абдрахманова вераз.

Милям малпанмы вал, та «ТылоБурдо» фестивальмес кык арлы огпол ортчытом шуыса. <…> Фестивальмы ортчем бере, малы кык арлы одӥг пол гинэ каркоды, ойдолэ котькуд ар ортчытъялом шуыса, сыӵе вераськонъёсын пинал калык милемлы вазиськылӥз. Ми малпам, кенешим, кулэ, дыр, адямилы аслэсьтыз быгатонлыксэ шара поттыны таӵе форматэн
Елена Абдрахманова, Пичи Пурга ёрос лыдӟетъюртысь ёзэтлэн кивалтӥсез

Радъясь верамъя, фестивальлэн кулэлыкез пыриськисьёслэн арысь аре лыдзы будэмен шӧдӥське. Кылсярысь, нырысетӥ фестивальын 2015-тӥ арын 6 конкурсант вал, нош 2017-тӥ арын – даслэсь ятыр. Кырӟасьёс ватсаськемен жанръёс но тросгес луизы, шуэ Елена Абдрахманова.

Татын жанрез тросгес луиз, романс но кырӟаны кутскылӥзы. Крезьгуро инструментъёссы но пӧртэмлыко луизы. Тани бард кырӟан, асьмеос соку икс ин азе пуктӥськом адямиез, кудӥз гитараен кырӟа. Нош милям тросэз вал арганэн шудо
Елена Абдрахманова, Пичи Пурга ёрос лыдӟетъюртысь ёзэтлэн кивалтӥсез

Пусъём, «ТылоБурдо» фестивале 14 аресысен удмурт кылын кырӟасьёс пыриськыны быгато. Соос, крезьгуро инструментэн шудыса, асьсэ гожтэм кырӟанэз быдэстыны кулэ. Котькуд конкурсант кузьымъёс но одӥг номинацияя диплом басьтоз. Ваньмыз фестивальын 4 номинация луоз:

  • «Зарни ТылоБурдо» - радъясь комитетлэсь но учкисьёслэсь вылӥ дунъетсэс басьтэм кырӟась;
  • «Учкисьлэн сюлэмаз» - учкисьёслы тужгес кельшем кырӟась;
  • «Удмурт кырӟанлэн осконэз» - таланто егит кырӟась;
  • «Котьку кырӟанэн» - бард искусстволэсь сямъёссэ утись кырӟась.

Ватсалом, кырӟанъёс сяна, фестивальлэн программаяз Самсоновъёслэн литературая музей-усадьбатӥзы экскурсия, «Табань сиён», ибырвесь мунё лэсьтонъя мастер-класс, удмурт сиён-юонъёсты веръян чакламын.

Фестивале пыриськыны мылкыд карисьёслэсь куриськонъёссэс 19-тӥ куарусёнозь 8 (34138) 4-24-39 телефонъя куто.

Тодэ вайытом, 2015-тӥ арын фестивалез ортчытон понна ёрос лыдӟетъюртлэн ӵектосэз Удмуртиысь йӧскалык политикая министерстволэсь грант вормиз. Кылем арын ужрадлы спонсоръёс шедьтӥзы. 



Наверх
Вниз