Ижкар-11 °C
16 толсур 2018 Воскресенье
16+

«Мёртвые души» спектакльлэн премьераез ортчиз Удмурт йӧскалык театрын

  • 436
  • 0
Ижкар / Удмуртиын
«Мёртвые души» спектакльлэн премьераез ортчиз Удмурт йӧскалык театрын
Туспуктэм: vk.com (Удмуртский национальный театр)

20-тӥ куарусёнэ Удмурт йӧскалык театрын Николай Гогольлэн «Мёртвые души» поэмаезъя Россиысь дано артистэн, Удмуртиысь калык артистэн но элькунысь искусство удысысь дано ужасен Владимир Сафоновен пуктэм пьесалэн премьераез ортчиз. Спектаклез Михаил Булгаковлэн инсценировкаезъя пуктӥзы. Со сярысь ивортодэтъя «Удмуртия» агентстволы Удмурт театрысь литературая ёзэтлэн кивалтӥсез Наталия Панфилова вераз.

Солэн кылъёсызъя, Владимир Сафонов классика спектакльёс пуктэменыз тодмо. Классикаез пуктыны секыт ке но, режиссёр сое яратэ но пуктыны быгатэ, пусъе Наталия Панфилова. Николай Гогольлэн «Мёртвые души» поэмаезъя пьеса пуктыны но ачиз режиссёр ӵектӥз.

Ку ми классикаез лыдӟиськом, котьку паймиськод, со дыре ик кышкытгес но луэ, кыӵе со классикъёс провидецъёс, что адӟо улонэз, кудӥз туала улонлы но туж тупа. <…> Татын Гоголь возьматэ, кыӵе адямилэн шекъёсыз. Адями со умой но урод но ӧвӧл, солэн вань умой палыз но, урод палыз но. Татын но озьы ик. Озьыен, ми та «Мёртвые душиез» адӟыса, адӟиськом, адями ӧз воштӥськы шуыса, сыӵе ик адями кылемын. Улонысь учыръёс, кудъёсыз вал 18-19 даурын, соос али улонлы но туж тупало. Озьы ик вань. Бюрократизм но, чиновничество но, алдаськон но мукет
Наталия Панфилова, Удмурт йӧскалык театрысь литературая ёзэтлэн кивалтӥсез

Николай Гогольлэн поэмаяз геройёс карикатурной возьматэмын, со сярысь литературая критикъёс но гожъязы. Нош Владимир Сафонов тыршиз геройёссэ луло адямиос сямен возьматыны, кудъёсыз шумпотыны но, куректыны но быгато. Татын мур, яркыт образъёс, кудъёсызъя учкисьёс тодмозэс яке асьсэдыз тодманы быгатозы, шуэ Наталия Панфилова.

«Мёртвые души» спектакль

6 фото

Декорациос но спектакль адямилы матын мед луоз шуыса лэсьтэмын, пусъе суредась-постановщик Игорь Шаймарданов. Солэн кылъёсызъя, одӥг ласянь, учкись «новомодной» постановкаослэсь жадиз ни, мукет ласянь, классикаен ӝикыт ужано. Суредасьлэн но режиссёрлэн классика шоры ненег учкемзы тупаз.

Потэ вал лэсьтэм учкисьлы чаклам зэмлыко, валамон, огшоры ужез. Визьпокъёслы ӧвӧл, фестивальёслы ӧвӧл, туала модной театроведъёслы ӧвӧл. Потэ вал лэсьтэм пьеса Ижкарысь учкисьлы, солэсь учконзэ но шӧдыны луонлыкъёссэ ултӥятэк. Мыным потэ, зритель жадиз ни новомодной постановкаослэсь, кытын ваньмыз валамонтэм, кытын ваньмыз йырчукин, кытын режиссёръёс но суредасьёс тыршо адӟыны сое, маиз отын ӧвӧл
Игорь Шаймарданов, суредась-постановщик

Пусъём, «Мёртвые души» поэмалэн нырысетӥ томез сяна, спектакле ӝуам кыкетӥ томысь утиськем люкетъёсыз но шедизы. Отысь геройёсты режиссёр учкисьлы оскон сётон понна пыртӥз, шуэ Наталия Пафилова.

Нырысетӥ томын одӥг положительной герой но ӧвӧл. Нош Владимир Иванович – со сыӵе адями, со учкисьёсызлы тырше сётыны оскон. Соин со куд-ог адямиосты кыкетӥ люкетысь пыртэ татчы. Татын соос сыӵе ик адямиос, но соослэн тросгес умой палзы, кудъёсыз Чичиковлы сётыны туртто шанс, со мед тупатскоз шуыса. Со, валамон, озьы ик аслэсьтыз ужзэ лэсьтэ. Но со быръён азьын султэ: яке умой сюресэ мыныны, яке тон аферист кадь мукет сюресэ мынӥськод
Наталия Панфилова, Удмурт йӧскалык театрысь литературая ёзэтлэн кивалтӥсез

Ватсалом, «Мёртвые души» спектаклез матысь возьматон Удмурт йӧскалык театрын 26-тӥ коньывуонэ чакламын.

Спектакль ӟуч кылын мынэ. Чаклам арлыд: 12+

Наши партнеры

Наверх
Вниз