Ижкар-9 °C
24 -тӥ толшор 2020 Удмуртарня
16+

Михаил Федотовлэн «Берытскыны вуоз дыры» бичетэз потӥз Удмуртиын

  • 529
  • 0
Ижкар / Удмуртия
Михаил Федотовлэн «Берытскыны вуоз дыры» бичетэз потӥз Удмуртиын
Туспуктэм: Наталья Тетерина

Бесерман кылбурчилэн Михаил Федотовлэн вордскем дырысеныз 60 ар тырмонлы тупатыса, «Удмуртия» книгапоттонниын кылбурчилэн произведениосыныз «Берытскыны дыры вуоз» бичет потӥз. Отчы Михаил Федотовлэн азьвыл потэм ньыль книгаосысьтыз калыклы тужгес кельшем кылбуръёсыз пыризы. Со сярысь ивортодэтъя «Удмуртия» агентстволы издательстволэн валтӥсь редакторез Георгий Грязев вераз.

Татчы пыризы Михаил Федотовлэн ньыл бичетъёсысьтыз устоосыз кылбуръёсыз, кудъёсыз калык пӧлын вӧлмизы, кудъёсыз адямиослы матын луизы. Мон малпасько, таӵе чебер бичет юбилеез азьын туж умой салам. Со озьы ик салам бесерман калыклы но, салам удмурт калыклы но, соослы, кин дунъя Федотовлэсь кылбурзэ, солэсь чеберлыксэ, кылбуретлэсь дуннезэ валасьёслы но
Георгий Грязев, «Удмуртия» издательстволэн валтӥсь редакторез

Издательстволэн валтӥсь редакторез верамъя, та бичетын кылбурчи пӧртэм сямен усьтӥське, малы ке шуоно дыр ортчемъя Михаил Федотовлэн улон шоры учконэз воштӥське, со кылбуръёсаз но шӧдӥське. Кылсярысь, кылбурчилэн «Тӧдьы юсьёс берто» нырысетӥ книгаяз авторлэсь вордскем палъёссэ яратонзэ адӟиськом, нош «Вӧсь» книгазэ учконо ке, отын кылбурчи дунне шоры учконъёссэ, мур малпанъёссэ усьтэ, пусъе Георгий Грязев.

Син шорамы зэмзэ но пуксе пӧртэм кылбурчи, пӧртэм дыръёсы пӧртэм сямен учкись кылбурчи. Но одӥгзэ валаськом – со котькуд бичетысь будэ но будэ. Шӧдӥськом, макем бадӟым но дано кылбурчиез асьмеос ыштӥм шуыса. Жаляса верано, туж вазь кошкиз
Георгий Грязев, «Удмуртия» издательстволэн валтӥсь редакторез

Ватсалом, Михаил Федотов ас вакытаз «Удмуртия» книгапоттонниын редактор луыса ужаз бере, издательствоын ужасьёс котырес лыдпуссэ пусъёнлэсь палэнэ кыльыны ӧз быгатэ. Бичетэз радъян ужез книгапоттонниысь редактор Сергей Матвеев ас вылаз басьтӥз, малы ке шуоно соос Михаил Федотовен ӵошен ужазы.

Со ки пыр потӥзы та чуръёс, со тае люказ, радъяз, малы ке шуоно соос одӥг кабинетын пукемын, ӵош пукемын, ужамын соос, одӥг омырен шокамын. Сергей Васильевич но кылбуръёс гожъя, тодмо кылбурчи элькунамы, соин ик солы киыз но пыдыз
Георгий Грязев, «Удмуртия» издательстволэн валтӥсь редакторез

Михаил Федотовлэн «Берытскыны вуоз дыры» бичетэз 500 экземплярен потӥз.

Тодэ вайытом, Михаил Федотовлэн котырес лыдпусэзлы сӥзьыса, Удмуртиын интернет-акция мынэ, элькунысь Йӧскалык лыдӟетъюртын адӟытон ужа. Озьы ик кылбурчилэн вордскем палъёсаз бесерман лулчеберетъя фестиваль радъяськоз. Нош 8-тӥ коньывуонэ Удмурт кун филармониын Михаил Федотовлы сӥзем творчествоя ӝыт ортчоз.

Наши партнеры

Наверх
Вниз