Ижкар+1 °C
13 -тӥ оштолэзь 2021 Пуксён
18+

Михаил Федотов – туала улонлы тупась адями

  • 597
  • 0
Ижкар / Удмуртия
Михаил Федотов – туала улонлы тупась адями
Туспуктэм: unatlib.ru

8-тӥ коньывуонэ Ижкарысь Удмурт кун филармониын бесерман но удмурт кылбурчилэн Михаил Федотовлэн вордскем дырысеныз 60 ар тырмонлы сӥзем ӝыт ортчиз. «Берытскыны но дыр вуоз али…» нимам ужрадэ калык быдэс зал тыр люкаськиз. Кылбурчиез буре вайыны солэн ӵыжы-выжыосыз, эшъёсыз но творчествозэ яратӥсьёс лыктӥзы.

Кызьы шуиз ивортодэтъя «Удмуртия» агентстволэн корреспондентэзлы Михаил Федотовлэн палкышноез Анна Федотова, кылбурчи туннэ зэмос кизили.

Мыным потэ, Миша ачиз бурдъяськемын. Туннэ со кизили, туж бадӟым кизили, суперзвезда шуо ук. Мон шуысал, со зэмос суперзвезда. Озьы сое ӝутыны туж трос мугъёс, возьыт ӧвӧл туннэ сое озьы шуыны. Воргорон сямен но со сыӵе чебер, сое быдэс дуннелы возьматоно кадь
Анна Федотова, журналист, Михаил Федотовлэн палкышноез

Кузпалыз сярысь вераса, Анна Федотова пусъе, картэз тэк улыны дышемын ӧй вал. Гурт ужъёсты но, творчество ужзэ но со вылӥ ӝоглыкен быдэсъяз. Сыӵе ужан сямыз туала улонлы тупа вал, соин ик кылбурчилы туннэ улон кельшысал, шуэ Анна Федотова.

Солэн амалэз луысал ке, со ужаса гинэ улысал, дыр. <…> Мынам агай-вынъёсы но, папае но шуо вал: «Та Мишаен котькыӵе-котькыӵе ужез туж каньыл лэсьтыны». Со издательствоын ужаз ке, соку техника ӧй вал, технологиос мукетэсь вал книга поттон удысын. Соку адямиос, отысь редакторъёс, араз поттыло вылэм 3-4 книга, нош со 12 поттэ вылэм. Солэн сыӵе со ужан манерез. <…> Со озьы улыны дыртӥз-а, мар-а, мон уг тодӥськы, шӧдӥз-а, мар-а. Сыӵе ӝоглыкен улыса, со туннэ дуннеын улӥз ни
Анна Федотова, журналист, Михаил Федотовлэн палкышноез

Михаил Федотовлэн кылбуръёсыз но дыр ортчемен пумен юнмало гинэ, шуэ солэн эшез, Удмуртиысь калык гожъясь, кылбурчи Вячеслав Ар-Серги. Али, оло, со произведениослэн дырзы но ӧз вуы на, нош кӧня ке аръёс ортчыса, школаын дышетскисьёслэсь юазы ке, XX даурысь кыӵе удмурт кылбурчиез соос тодо шуыса, одно ик Михаил Федотовлэсь нимзэ вералозы, пусъе Вячеслав Ар-Серги.

16 ар ӵоже эшъяськыса, кылбурчи Михаил Федотовез ноку но алама югдурысь ӧз адӟылы. Кылбуръёсаз но, улонын но со туж чебер вал, шуэ Вячеслав Ар-Серги. Солэсь чеберлыклы матынзэ кылбурчилэн вордскем палъёсыныз герӟа.

Мон толон гинэ Ворцалан вал, йыбырттӥм Миша Федотовлы, шай дуре ветлӥм. <…> Михаил Федотовлэн инмарез вал чеберлык. Сыӵе чебер инкуазь отын, куаръёс усе, ваньмыз сыӵе чебер, шур, кытын со пичи дыръяз шачаен чорыгаса ветлӥз – ваньмыз син азе пуксё чеберлык котырын. <…> Ми сое весь тодамы ваиськом, со котьку утчаз чеберлыкез. Нош мон табере учкисько, чеберлык со вӧзын котьку ачиз вал
Вячеслав Ар-Серги, удмурт кылбурчи

Творчество удысысь адямиослы огшоры улонын ӵемысь секыт луэ, нош Михаил Федотов понна пытсам ӧсъёс ӧй вал, пусъе палкышноез. 1990-тӥ аръёсы, куке дӥськут но, сиён-юон но вузкаронниосын уг шедьы вал, кылбурчилэн семьяез ёрмыса ӧз улы. Пиез нырысетӥ классэ мыныку, Михаил Федотов куинь костюм ваем, нош али вордскем нылзылы йӧл тырмымтэ дыръя кылбурчи олокытысь вож нунылы сиён шедьтылэм. Пиналъёссэ визьтэммыса яратӥз, нош улонзэ малы ке но кузёмытыны ӧз тыршы, шуэ Анна Федотова.

Ужрадын Ижкарысь школаын дышетскисьёс, Удмурт кун университетысь студентъёс Михаил Федотовлэсь кылбуръёссэ лыдӟизы, Россиысь дано артист Геннадий Кузнецов, Удмуртиысь калык артистъёс Геннадий Бекманов но Анна Плотникова, «Италмас» ансамбль кылбуръёсызъя гожтэм кырӟанъёсты быдэстӥзы.

Тодэ вайытом, бесерман кылбурчилэн Михаил Федотовлэн котырес лыдпусэзлы «Удмуртия» издательствоын солэн кылбуръёсыныз «Берытскыны вуоз дыры» бичет потӥз. Озьы ик элькунын интернет-акция ортчиз, Йӧскалык лыдӟетъюртын адӟытон ужа. Со сяна, кылбурчилэн вордскем палъёсаз бесерман лулчеберетъя фестиваль радъяськиз



Наверх
Вниз