Ижкар-7 °C
24 -тӥ толшор 2021 Воскресенье
18+

Алнаш ёрос «Элькуновидение» вожвылъяськонэ пыриськисьсэ воштӥз

  • 527
  • 0
Алнаш / Удмуртия
Алнаш ёрос «Элькуновидение» вожвылъяськонэ пыриськисьсэ воштӥз
Туспуктэм: vk.com (Элькуновидение2018/Алнашский РДК)

Алнаш ёрослэсь «Элькуновидение-2018» вожвылъяськонэ «Инльӧль» ансамбль интые «Айлетъ» коллективез келялозы. Со сярысь ивортодэтъя «Удмуртия» агентстволы ёросысь Лулчеберетъя управленилэн кивалтӥсез Наталья Антонова вераз.

Солэн кылъёсызъя, пыриськисез воштонлэн валтӥсь мугез — «Инльӧль» ансамбльлэн бадӟым сцена вылэ потыны дась луымтэез. «Элькуновидение» конкурсэ пыриськыны мылкыд карисьёсты ёрос кылзонын 6 коллективъёс пӧлысь «Инльӧль» ансамбль ассэ тужгес устоен возьматӥз. Нош Дышетӥсьлэн нуналэзлы сӥзем концертын коллектив трос учкисьёс азьын тулкымъяськонзэ ӧз вормы, шуиз Антонова. Соин ик «Элькуновидение» пӧртэм сценаос вылэ потам «Айлетъ» коллективез келяны малпазы.

Наталья Антонова верамъя, та ансамбль Муважи гуртын ог 6 ар талэсь азьвыл кылдӥз. Коллективын 3 нылкышноос кырӟало, репертуаразы тросгес ӟуч эстрада кырӟанъёс. Кырӟасьёсты ёросысь бадӟым шулдыръяськонъёсы ӵемысь ӧтчало. Озьы ке но, «Элькуновидение» пыриськон ласянь коллектив тулкымъяське, малы ке шуоно соослэн пельпум вылазы быдэс Алнаш ёрослэсь данзэ утён. Конкурсын «Айлетъ» ансамбль улосчизылэсь Людмила Никитиналэсь «Эшъёсы-мусоосы» кырӟанзэ быдэстоз.

Лулчеберетъя управленилэн кивалтӥсез пусъе, Алнаш ёрос конкурсэ элькунын калыклы тодмо луись кырӟасьёсты уг келя, малы ке шуоно «Элькуновидение» нырысь ик выль нимъёсты усьтыны кулэ. Та ужпумез конкурс быдэстэ, лыдъя Наталья Антонова.

Мынам принципе – выль нимъёсты усьтыны. Соосыз мед ӧтёзы, мед тодманы кутскозы, кыӵе ке азинскон мед луоз шуыса. <…> Кырӟасьёс зэмзэ но тросгес луэмын, соос на слуху. Выль нимъёс пото – со, мыным потэ, нырысетӥез ужпум. Со пӧрме. Нимысьтыз тау, удысужлыко жюри дунъя шуыса
Наталья Антонова, Алнаш ёросысь Лулчеберетъя управленилэн кивалтӥсез

Тодэ вайытом «Элькуновидение-2018» вожвылъяськонэ 21 кырӟасьёслэсь но коллективъёслэсь куриськонъёс вуизы. 6-тӥ коньывуонэ конкурслэн быръён люкетэз ортчиз, ваньмыз отчы пыриськисьёс концерт люкетаз шедизы. Со 20-тӥ коньывуонэ Ижкарысь лулчеберетъя «Аксион» дворецын радъяськоз, соку ик жюри 21-ез пӧлысь 12 тужгес устооссэ финалэ лэзёз. «Элькуновиденилэн» йылпумъян люкетэз 4-тӥ шуркынмонэ «Мынам Удмуртие» телеканаллэн меӵак эфираз ортчоз.



Наверх
Вниз