Ижкар+9 °C
16 -тӥ куарусён 2021 Покчиарня
18+

Артемий Гаврилов вормиз «Элькуновидение-2018» вожвылъяськонын

  • 1376
  • 0
Ижкар / Удмуртия
Артемий Гаврилов вормиз «Элькуновидение-2018» вожвылъяськонын
Туспуктэм: vk.com (Элькуновидение2018)

Туннэ, 4-тӥ шуркынмонэ, «Удмуртия» телеканаллэн меӵак эфираз «Элькуновидение-2018» вожвылъяськонлэн йылпумъян люкетэз ортчиз. Финалэ потэм 13 кырӟанъёслы асьсэлэсь баллъёссэс пуктылӥзы удысужлыко (профессиональной) жюрилэн ёзчиосыз.

Жюрилэн ёзчиосыз тужгес вылӥ — 12 — балл пуктӥзы:

  • «Шулдыр ӝыт» ансамбльлэн кивалтӥсез Наталья Ушакова – Дэбес ёросысь Артемий Гавриловлы; 
  • кырӟанъя но эктонъя «Италмас» академ кун ансамбльлэн хормейстерез Семён Байкузин – Дэбес ёросысь Артемий Гавриловлы; 
  • кылбурчи, Удмуртиысь Калыкъёслэн эшъяськонъя юртысьтызы ӧнерчи Богдан Анфиногенов – Татарстанысь Агрыз ёросысь Марина Матвеевалы; 
  • кылбурчи, «Удмурт дунне» газетлэн валтӥсь редакторез Зинаида Рябинина – Дэбес ёросысь Артемий Гавриловлы; 
  • Удмуртиысь Крезьгурчиослэн огазеяськонзылэн тӧроез Марина Ходырева – Кияса ёросысь Мария Бочкарёвалы.

Озьыен, полуфиналысь но финалысь баллъёсты ватсаса, «Элькуновидение-2018» вожвылъяськонын вормиз Дэбес ёросысь Артемий Гаврилов «Мон удмурт» кырӟанэн (кылъёсыз Светлана Федуловалэн, крезьгурез Ольга Перевозчиковалэн). Со ик валтӥсь кузьымез — «Удмурт Кенеш» огазеяськонлэсь 40 сюрс манет басьтоз.

Тодэ вайытом, 2016-тӥ арын Удмуртиысь кырӟась Артемий Лем (Артемий Гаврилов) Москваын «Россилэн зарни куараез» конкурслэн 1-тӥ степенё лауреатэз луиз

Концертын но финалын тужгес трос балл люкам кырӟасьёс:

  • Дэбес ёросысь Артемий Гаврилов (258)
  • Глаз ёросысь Юрий Князев (142)
  • Вавож ёросысь Екатерина Краснова (100)
  • Можга кар – «Ӟаныкай» дуэт (78)
  • Агрыз ёрос (Татарстан) – Марина Матвеева (68)

Учкисьёслэн кузьымзы понна вожвылъяськонын азьпала потӥз Вавож ёросысь Екатерина Краснова, солы 941 учкисьёс дурбасьтэмзэс веразы. 15 сюрс манет кузьым висъяз Можга ёросысь фермер Галина Белозёрова.

Жюрилэсь баллъёссэс но учкисьёслэсь вань куараоссэс ватсаса, Удмуртиысь лулчеберетъя но туризмъя министерстволэсь кузьым – 100 сюрс манет – Вавож ёросэ вуоз. Со коньдонэн вожвылъяськонэ пыриськем муртлэн гуртысьтыз лулчеберетъя юрт ваньбурзэ (крезьгуро инструментъёсты, сцена вылэ потон костюмъёсты) выльдыны быгатоз. 

Со сяна, удысужлыко жюри тужгес устозэ кылбурез но тужгес устозэ крезьгурез пусйиз. «Элькуновидение-2018» вожвылъяськонлы устозэ кылбурез гожтӥз Вавож ёросысь Нина Ефремова («Сёт мыным, Инмаре, нылкышно шудбурдэ»), устозэ крезьгурез — Кияса ёросысь Владимир Бочкарёв («Вордӥськем палъёс»). Соос быдэн 5 сюрс манет басьтозы.

«Элькуновидение» вожвылъяськон» темая вань иворъёс



Наверх
Вниз