Ижкар+11 °C
1 -тӥ коньывуон 2020 Покчиарня
18+

Удмуртъёслэн выжы пусъёссы сярысь книга потӥз «Удмуртия» издательствоын

  • 680
  • 0
Ижкар / Удмуртия
Удмуртъёслэн выжы пусъёссы сярысь книга потӥз «Удмуртия» издательствоын
Туспуктэм: vk.com (Удмуртия Книжное-Издательство)

«Удмуртия» издательствоын удмуртъёслэн выжы пусъёссы сярысь «Удмурты. Тайна тамги» книга потӥз. Отчы удмурт пусъёсты, лыдпусъёсты но пужыосты эскерисьёслэн ужъёссы пыризы. Со сярысь ивортодэтъя «Удмуртия» агентстволы книгапоттонилэн валтӥсь редакторез Георгий Грязев вераз.

Солэн кылъёсызъя, та книга нырысь ик выжы пусъёс медаз вунэ шуыса поттэмын.

Туж тунсыко со выжыосысь потэм адямиослы, кудъёсызлэн выжыоссы татын гожтэмын, кудъёсызлэн со тамгаоссы историе, книгаосы кылемын. Соос мед азинтысалзы. Но мукетъёсыз, кинъёслэн выжыоссы пыремын ӧвӧл, мед утчасалзы, мед шедьтысалзы, малы ке шуоно со али чиптэм-чаптэм быремын ӧвӧл на
Георгий Грязев, «Удмуртия» издательстволэн валтӥсь редакторез

_Ii6-xwUIl0.jpg
«Удмурты. Тайна тамги» книгалэн вылбамез Фото: vk.com (Удмуртия Книжное-Издательство) ©

Книга этнографлэн Владимир Владыкинлэн удмуртъёс сярысь уженыз кутске, малы ке шуоно удмурт пусъёсын тунсыкъяськись муртлэн нырысь ик калык сярысь тодэмез потоз, лыдъя Георгий Грязев. Нош бичетлэн «шорсюлмыз» тамгаосты (пусъёсты) эскерисьёслэн Пётр Сорокинлэн но Алевтина Камитовалэн статьяоссы луизы.

Пётр Матвеевич Сорокин – со зэмос тодосчи ӧвӧл, со ужамын Вятка губерниын статист луыса. <…> Со ветлэ вал гуртъёстӥ но лыдъя вал калыклэсь пӧртэм ваньбурзэ но адӟе вал, кызьы адямиослэн пусъемын ужан тӥрлыксы-а, корка бордазы-а, кыӵе ке киужъёссы-а, бугрооссы-а. Ваньзэ сое синмыныз адӟыса, со пусъе, кельтэ. Сое пусйылэ со выжыя, воршудъёсъя но чакла, котькуд воршудлэн со аслаз шуыса. Шӧдэ, котькуд семьялэн но со аслаз: котькуд атай аслаз пиезлы сётэ аслэсьтыз тамгазэ но соиз отчы аслэсьтыз пуссэ будэтэ на. Озьыен, котькуд тамга – со аспӧртэмлыко сыӵе паспорт-а, мар-а шуод
Георгий Грязев, «Удмуртия» издательстволэн валтӥсь редакторез

Валтӥсь редактор верамъя, Пётр Сорокин вить воршудлэсь пусъёссэ люказ. Ваньмыз книгае 200 пала тамгаос пыризы.

Нош Алевтина Камитова статьяяз пусъёс шоры туала синмын учке ни. Со возьматэ, кылизы-а туннэ тамгаос удмуртъёслэн улоназы, кытын соос пумиськыло но кыӵе соослэн кужымзы. Тодосчилэн ужысьтыз валамон, пус туала вакытэ шергес пумиськылэ ни. Тросгес тамгаос вашкала киужъёсын но ужан тӥрлык бордын кылемын.

Камитовалэн статьяез возьматэ, тамга кошке но кадь ни, но со пусъёс вань на, уката ик вашкала киужъёсын. <…> Озьы ик ӵемысь луэ черсон борды пуктыса кельто, ужан тӥрлыкъёс котыре, шуом, мажес, сюрло котыръёсы асьсэлэсь пуссэс пукто но нокин сое уг куты ни, ваньмыз тодо, таиз солэн шуыса. Тӥни соос туала улонын пумиськыло на, но шергес
Георгий Грязев, «Удмуртия» издательстволэн валтӥсь редакторез

Аслэсьтыз чакланъёссэ вераса, Георгий Грязев пусъе, туннэ нуналлы пусъёс выльдӥсько но туала вакытлы тупало ни. Кылсярысь, суредась Юрий Лобанов, аслэсьтыз вашкала выжы пусэзлэсь вылтуссэ тодаз вайыса, со выллемгес тамгазэ кылдытӥз. Туннэ со личной печать выллем, шуэ валтӥсь редактор. Шуом, нюлэсын кораськыкуз, адями аи но коръёс вылаз кыӵе ке пус пуктэ. Озьы мукет кораськисьёс соосты басьтыны уз дӥсьтэ.

Ватсалом, пусъёс сярысь эскеронъёс сяна, «Удмурты. Тайна тамги» книгае Удмуртиысь калык суредасьлэн Семён Виноградовлэн удмурт пужыос но лыдпусъёс сярысь ужъёсыз пыризы, малы ке шуоно соос озьы ик адямилэн пытьыез луо.

Туала вакытэ адямиос мед тодозы, адӟизы пужыез – легезьпу-а, сяська-а – мед валалозы, мед ужазы но кутозы. Татчы ик сётӥм на ми Семён Николаевич Виноградовлэн шедьтэмезъя, чакламезъя удмурт лыдпусъёсты. Со одӥгысен кутскыса миллионозь. Со сётэмын, кызьы пумиськылэ вал азьвыл аръёсы, кызьы со кутӥське вал удмуртъёслэн улоназы, даже дробьёс но сётэмын. Озьыен, возьматэ вашкала удмурт улонлэсь уг кыльы шуыса
Георгий Грязев, «Удмуртия» издательстволэн валтӥсь редакторез

Озьы ик книгалы аспӧртэм шӧм мадьяр тодосчилэн Бернат Мункачилэн удмуртъёс пӧлы ветлэмез бере гожтэм малпанъёсыз сёто, шуэ валтӥсь редактор. Книгаез кылдытӥсьёслэн возьматэмзы потӥз, адӟо-а палэнысь лыктэм тодосчиос удмурт пусъёсты.

Пусъём, «Удмурты. Тайна тамги» удмурт калыклы сӥзем сериысь кыкетӥ книга луэ. Нырысетӥез — «Удмурты. От Вятки до Камы» бичет 2017-тӥ арын потӥз. Отчы удмуртъёслэн улон-вылонзы сярысь пӧртэм аръёсы потэм статьяос пыризы. Со Россиысь улосвыл издательствоосын поттэм тужгес тунсыко книгаос пӧлы шедиз.

Та дыре «Удмуртия» книгапоттонниысь ӧнерчиос куинетӥ книга бордын тыршо. Со «Удмурты. Секреты народных мастеров» нимын 2019-тӥ арын издательстволэн 100 ар тырмонэзлы потоз. Бичет удмурт калыклэн киужъёсыз но корка котыр ужъёсыз сярысь луоз. 



Наверх
Вниз