Ижкар+1 °C
13 -тӥ оштолэзь 2021 Пуксён
18+

Богдан Анфиногенов: пичи лулчеберетме федерал книгае пыртӥ

  • 482
  • 0
Ижкар / Удмуртия
Богдан Анфиногенов: пичи лулчеберетме федерал книгае пыртӥ
Туспуктэм: Наталья Тетерина

21-тӥ шуркынмонэ Ижкарын Калыкъёслэн эшъяськон юртазы «Лица России. XXI век» книга-альбомен тодматон ортчиз. Та бичетэ быдэс Россиысь ужан удысазы но мер улонын азинлыко пӧртэм йӧслыко 40 егитъёс пыризы. Соос пӧлын Удмуртиысь кылбурчи но кырӟась Богдан Анфиногенов но бесерман крезьёсты быдэсъясь Мария Корепанова.

Кызьы вераз ивортодэтъя «Удмуртия» агентстволы Богдан Анфиногенов, проектлэн авторъёсызлы сое но эшшо ньыль муртэ «Удмурт Кенеш» огазеяськон ӵектӥз. Конкурсэ пыриськон понна анкета гожтоно но сое ӵектосэз радъясьёслы келяно луиз.

Отын вал определённой пунктъёс – ӟечлэсьтон, лулчеберетъя ужрадъёсы пыриськон, творчество, мер огазеяськонъёсы пыриськон но мукет. <…> Нырысь ик мон гожтӥ «Шунды» огазеяськонэ пыриськисько шуыса, озьы ик «Удмурт Кенеше». «Пельняньлэн нуналэз» сярысь гожтӥ, Калыккуспо Брангурт фестивальын мон кык пол куратор луыса ужай. Собере вань «Эктоника детям» ӟечлэсьтон проект, тулыс мон отчы пыриськи. Валамон, гожтӥ мон кылбурчи но кырӟась шуыса, вань бичетъёсы но альбомъёсы сярысь, озьы ик тодосъя ужъёсы сярысь. Озьыен, котькуд пунктъя мынам мар ке но гожтэмын вал
Богдан Анфиногенов, удмурт азьветлӥсь

Таӵе анкетаос проектэз быдэстӥсьёс доры быдэс Россиысь но кунгож сьӧрысь вуизы, ваньмыз 500-лэсь ятыр куриськонъёс.  Ваньзэ сое эскерыса, экспертъёслэн кенешсы 40 тужгес устооссэ бырйиз, нош кылемез вуоно ӵектосъёслы кылизы, вераз ӵектослэн кивалтӥсезлэн воштӥсез Галина Тойшева.

Геройёсты быръем бере книга кылдытон бордын уж кутскиз. Котькуд адямиен журналист телефон пыр интервью гожтӥз. Удмурт кылбурчи анай кылыз, йӧскалык лулчеберетэз сярысь но аслаз творчествоез сярысь юанъёслы валэктонъёс сётӥз. Ульяновскысь фотограф Мария Чурбанова вань 40 адями доры нимысьтыз ачиз вуылӥз но туспуктэмъёс лэсьтӥз. Богдан Анфиногенов туспуктонъёсы Арлан гуртысьтыз анаезлэсь вашкала шобретсэ пыртӥз, соин валче — удмурт лулчеберетэз.

Нырысь ик, куке мон со книгаез адӟи, мынам мылкыды сыӵе луиз: мынам анае, шуом, пичи гуртысь – Арлан гуртысь. Туспуктэмын мон кутӥ солэсь вашкала шобретсэ. Со пичи гурт понна со сыӵе бадӟым маке. Мон палэнысен адӟи: со бадӟым федерал книга, и отчы мон пыртӥ пичи гуртысь шобретме, со историе кылёз. Пичи гуртысь люкетэз луоз росси историын. <…> Мынам соку ик локальной патриотизм ӝутскиз, мон пичи лулчеберетме федерал уровене пыртӥ шуыса
Богдан Анфиногенов, удмурт азьветлӥсь

xjZEOFYaJTA.jpg
Богдан Анфиногенов анаезлэн шобретэныз Фото: Мария Чурбанова ©

Галина Тойшева верамъя, йӧскалык аспӧртэмлыксэс утьыны тыршисьёс пӧлын тужгес шаплыесь пичи уйпал калыкъёс. Соослэсь тужгес трос анкетаос – ӝыныезлэсь ятырез – вуизы. Радъясь сое та йӧслыкъёслэн ӧжыт луэменызы валэктэ.

Мон малпасько, уйпал калыкъёс со югдурын, куке утиськон ужпумъёс соос азьын туж лэчыт султӥзы. Соин ик соос пӧртэм амалъёсын ас йӧскалык аспӧртэмлыксэс, выжыоссэс но сям-йылолъёссэс утьыны тыршо. Будӥз поколение, кудӥз огазеяськиз, нокинэ янгыше ӧз уськыты, люкаськизы но ужаны кутскизы. <…> Мон малпасько, та сюрес, кудӥзъя ми ваньмы мыном
Галина Тойшева, «Лица России. XXI век» ӵектослэн кивалтӥсезлэн воштӥсез

Проектэз быдэстӥсь пусъе, та книгалэн валтӥсь ужпумез – возьматыны, нырысь ик пиналъёслы, кунмылэн «трос йӧслыкъем шобретэз» туж чебер, туж яркыт но мур пуштросо шуыса. Котькуд калык сое чебергес, узыргес но данъяськымонгес каре.

Ватсалом, «Лица России. XXI век» книга данъяськымон муртъёс сярысь серилэн кыкетӥез луэ ни. Нырысетӥяз «Россия многонациональная» бичетэ кунысь арлыдо муртъёс пыризы. Кыксэ ик ӵектосэз Еврейёслэн йӧскалык лулчеберетсыя федерал автономизы быдэстэ. «Лица России. XXI век» книгаез поттон понна Россиысь азьмуртлэн грантъёсъя фондысьтыз ог 5 миллион манет висъязы. Книга-альбом 4 сюрс экземплярен потӥз но улосвылъёсысь йӧскалык огазеяськонъёс, лыдӟетъюртъёс но школаос пыр дунтэк вӧлмытӥськоз. 



Наверх
Вниз