Ижкар+11 °C
16 инвожо 2019 Воскресенье
16+

«Пичи Чеберайёс но Батыръёс» элькун фестиваль сизьыметӥзэ ортчиз Удмуртиын

  • 534
  • 0
Ижкар / Удмуртия
«Пичи Чеберайёс но Батыръёс» элькун фестиваль сизьыметӥзэ ортчиз Удмуртиын
Туспуктэм: Наталья Тетерина

Туннэ, 28-тӥ шуркынмонэ, Ижкарысь Калыкъёслэн эшъяськон юртазы «Пичи Чеберайёс но Батыръёс» VII элькун нылпи фестивальлэн йылпумъян люкетэз ортчиз. Данъян ужрадэ ёрос люкетын вормем пиналъёс люкаськизы.

Кызьы шуиз журналистъёслы «Удмурт нылкышно кенеш» огазеяськонлэн тӧроез, фестивалез радъясь Надежда Степанова, туэ пичи Чеберайёсты но Батыръёсты зэмзэ но быдэс элькунын бырйизы. Ӟуч лыдъяськись Сарапул но Каракулино ёросъёс гинэ палэнэ кылизы. Ваньмыз фестиваль улсын 27 площадка ужаз.

Таиз ар маин пӧртэмгес? Ми семинар ортчытыны багатӥм та фестивальмес ортчытэмлэсь азьвыл. Кенешимы, нырысетӥ люкетэз фестивальмылэн, кудӥз ортче ёросъёсын но каръёсын, отын нимысьтыз праздниклы пӧрмыны кулэ шуыса
Надежда Степанова, «Удмурт нылкышно кенешлэн» тӧроез

Солэн верамезъя, йылпумъян ужрадын пиналъёс уг вожвылъясько ни. Быгатонлыкъёссэс сцены вылын куд-огез гинэ крезьгуро салам интыын возьмато. Финалын тужгес устоосыз пиналъёс асьсэдыз зэмос кизили мед шӧдозы, шуэ радъясь.

Асьмелэн валтӥсь ужпуммы, валамон ини – мылкыдзы мед пуромоз удмурт кылмес дышетыны шуыса. <…> Та удмурт кылэз азинтӥсь фестиваль, мон озьы нырысь ик шуысал. Нылпиос сяна, та фестивальлы озьы ик шумпото бадӟымъёс но – визьнодасьёс. Соос ог-огенызы удмурт кылэз азинтонъя кыӵе ке амалъёсын но люкисько
Надежда Степанова, «Удмурт нылкышно кенешлэн» тӧроез

«Пичи Чеберайёс но Батыръёс - 2018»

6 фото

Пичи Пурга ёросысь Баграш-Бигра гуртысь Баграшовъёс «Пичи Чеберайёс но Батыръёс» фестивале быдэс семьяен лыктӥзы. Соослэн Антон пизы ёрос люкетын вормисе потӥз. Кызьы шуиз ивортодэтъя «Удмуртия» агентстволэн корреспондентэзлы батырпилэн анаез Светлана Баграшова, удмурт кыл борды яратон пизылы соос семья куспын анай кылын вераськыса пыӵато.

Ми – удмуртъёс, ми удмурт сямен вераськиськом асьме куспамы, семьяямы. Удмурт кылэз но рос-прос мед тодоз нылпи, ӟуч сямен но чебер мед вераськоз. Куд-огъёсыз кышкало, ӟуч сямен вераськыны уз быгаты шуыса. Одӥг но со озьы ӧвӧл. Нылпиен удмурт сямен вераськиськод гуртын, нош телевизор, радио туж чаляк ӟуч кыллы дышетэ
Светлана Баграшова, Пичи Батырлэн анаез

Ижкарысь 79 номеро нылпи садэ ветлӥсь пиналъёслэн анай-атайёссы но удмурт кыл пала дурбасьто, шуэ ужъюртысь крезьгуро кивалтӥсь Светлана Мельникова.

Милям садикын тросэз нылпиосмылэн анай-атайёссы яке песянайёссы-песятайёссы удмурт кылын верасько. Соин валче милям ужмы умойгес мынэ, соос милемлы туж бадӟым юрттэт сёто. Соослэн пиналъёссы удмурт кылэз мед дышетозы шуыса мылкыдзы вань
Светлана Мельникова, Ижкарысь 79 номеро нылпи садысь крезьгуро кивалтӥсь

Ӧнерчи пусъе, нылпи садазы ог ӝыныез визьнодасьёс удмурт кылын верасько, соин ик мукет садикъёсысь удмурт пиналъёслэн анай-атайёссы та ужъюртэ курисько.

Ватсалом, «Пичи Чеберайёс но Батыръёс» фестивале куинетӥ арзэ элькунысь вань мылкыд карись нылпи садъёс пырисько. 

Наши партнеры

Наверх
Вниз