Ижкар-7 °C
12 толсур 2018 Вирнунал
16+

Удмурт йӧскалык дӥсь сярысь книгаосын адӟытон ужа Ижкарын

  • 188
  • 0
Ижкар / Удмуртиын
Удмурт йӧскалык дӥсь сярысь книгаосын адӟытон ужа Ижкарын
Туспуктэм: vk.com (Учебно-научная библиотека УдГУ)

Удмурт кун университетлэн лыдӟетъюртаз удмурт йӧскалык дӥсьлы сӥзем «Калык дӥсьлэн кылбуретэз» адӟытон ужа. Татын  удмуртъёслэн костюмзы сярысь пӧртэм аръёсы гожтэм книгаос, альбомъёс но бичетъёс возьматэмын. Со сярысь ивортодэтъя «Удмуртия» агентстволы лыдӟиськонниысь Шаертодон, йӧскалык но финн-угор литературая ёзэтлэн кивалтӥсез Наталия Самсонова вераз.

Солэн кылъёсызъя, адӟытонын лымшор, шор, уйпал, камсьӧр но Киров улосвылын улӥсь удмуртъёслэн дӥсенызы тодматскыны луэ.

Адӟытонэ поттэмын ӟуч но, удмурт но кылын книгаос. Тросэз ӟуч кылын, малы ке шуоно тодосъя ужъёс тросэз гожъямын ӟуч кылын. Поттэмын на озьы ик альбом кадь лэсьтэм книгаос, кудӥз «Удмуртия» издательствоын поттэмын, кудаз возьматэмын лымшор удмуртъёслэн дӥськутсы, шор удмуртъёслэн но озьы ик тупал удмуртъёслэн – закамской, завятской удмуртъёслэн.
Наталия Самсонова, Шаертодон, йӧскалык но финн-угор литературая ёзэтлэн кивалтӥсез

Кызьы шуэ радъясь, возьматонэ 1970-тӥ арысен туала вакытозь потэм книгаос интыямын. Со сяна, тодосъя ужъёс но бичетъёс вӧзы зэмос удмурт дэремез, уксё тӥрлыкез но вашкала пужыятэм ӵушконэз ватсазы. Матысь дыре Наталия Самсонова дорысьтыз 1950-тӥ аръёсы лэсьтэм чалмазэ вайыны малпа.

Кивалтӥсь верамъя, «Калык дӥсьлэн кылбуретэз» адӟытон Удмурт кун университетын дӥськут дизайн ӧнеръя дышетскисьёслы но дышетӥсьёслы юрттэт луоз.

Университетын вань Искусствоосъя но дизайнъя институт. Соослэн «История костюма» тодметсы вань. Студентъёслы, дышетӥсьёслы дышетон ӧнерзыя юрттыны, наглядно но учкыны, тодыны но, кыӵе источникъёсын асьме удмурт костюм сярысь ивортодэт шедьтыны луэ шуыса
Наталия Самсонова, Шаертодон, йӧскалык но финн-угор литературая ёзэтлэн кивалтӥсез

Ватсалом, удмурт дӥсьлы сӥзем адӟытон Удмурт кун университетлэн лыдӟетъюртаз 2019-тӥ арын толшорозь ужалоз.

Наши партнеры

Наверх
Вниз