Ижкар+1 °C
13 -тӥ оштолэзь 2021 Пуксён
18+

«Даур гур» фестиваль-вожвылъяськонын вормисьёсты пусйизы Удмуртиын

  • 454
  • 0
Ижкар / Удмуртия
«Даур гур» фестиваль-вожвылъяськонын вормисьёсты пусйизы Удмуртиын
Туспуктэм: Калык творчествоя элькун юрт

Ижкарын удмурт лулчеберетъя «Даур гур» IV элькун фестиваль-вожвылъяськонлы йылпумъянъёс лэсьтӥзы. Калык творчествоя юртын радъям концертэ 30 устоосыз коллективъёс но нимаз быдэстӥсьёс пыриськизы.

Туэ оштолэзе кутскем элькун фестиваль лулчеберетлэн вить ӧръёсызъя ортчиз: «Зарни крезь» - крезьгуро инструментъёсын шудон, «Вашкала тугоко» - фольклор, «Инву утчан гур» - калык кырӟан, «Лулгур» - эстрада кырӟан, «Юг эктон» - эктон.

Та ар ӵоже Удмуртиысь каръёсын но ёросъёсын пӧртэм фестивальёс, вожвылъяськонъёс, адӟытонъёс, пумиськонъёс радъяськизы. Отчы 400 пала коллективъёс пыриськизы, оглом ог 2 сюрс адями.

«Даур гур» IV элькун фестиваль-вожвылъяськон

7 фото

Шаркан ёросысь Быгы гуртысь удмурт лулчеберетъя центрысь кырӟанъя «Зоринча» ансамбль «Лулгур» номинациын нырысетӥ степенё диплом басьтӥз но «Инву утчан гур» номинациын – куинетӥ степенё. 1996-тӥ арын кылдытэм коллектив асьме вакытысь авторъёслэсь ужъёссэс но вашкала кырӟанъёсты туала манерен быдэстэ, вераз ансамбльлэн кивалтӥсез Жанна Ермолаева. «Зоринчае» 6-8 адями пыриське, ваньмыз сямен лулчеберетъя ужъюртын ужасьёс.

Ми та фестивале ваимы сюан гур, кудзэ гожтӥм вал Быгы гуртысь ик Шаркан ёросысь. Сое кырӟаз вал милемлы Кузьмина Маргарита Ивановна. Со туж трос тодэ вал кырӟанъёс, <...> вот мар ке кырӟанъёс вань, вашкала кырӟанъёс, кудзэ ми али кырӟаськом, ваньмыз гожтэмын солэсь. Жаляса верано луэ, туннэ нуналлы со улэп ӧвӧл нии, весь мон жалясько-а, мар-а ас поннам: егитгес вал на ай, гожтыны ӧм вуэ ваньзэ, мае со тодэ вал, со вашкала кырӟанъёсты
Жанна Ермолаева, Удмурт лулчеберетъя «Быгы» центрлэн кивалтӥсез

Жанна Ермолаевалэн верамезъя, «Даур гур» фестивале пыриськон удмурт лулчеберетэз азинтыны луонлык сётэ.

Удмурт лулчеберетэз со азьланьтэ котькуд ласянь – инструментальной творчествоя но, кырӟанъя но, эктонъя но. Ведь татын ваньмыз-ваньмыз жанръёс пыремын. <…> Ужез, конешно, трос, но адӟиське емышез но, малы ке шуоно туэ удмурт лулчеберет со… сое калык вите, сое калыклэн учкемез потэ. Шумпоттытэ, что туала аре фонограммаен кырӟанэз кылэмзы уг пот ни адямиослэн, калыкъёслэн, соос тросгес кылзысалзы ини улэп куараез, улэп инструментъёсты
Жанна Ермолаева, Удмурт лулчеберетъя «Быгы» центрлэн кивалтӥсез

Кызьы вераз журналистъёслы «Даур гур» фестивальлэн жюриезлэн ёзчиез но йылпумъян концертлэн режиссёрез Валерий Митрофанов, коллективъёслэн быгатонлыксы арысь аре будэ. Сое возьматэ лауреатлэсь дипломзэ басьтэмъёслэн котькулэсь трос лыдзы но – туэ 112 коллективъёс но нимаз быдэстӥсьёс пусъемын.

Шумпотоно, что коллективъёс, тани тросэз кема ужало ини, уг лябӟы соослэн кужымзы но, творчество мылкыдзы но лябӟемын ӧвӧл. Выльёсыз коллективъёс пото. Яке кудъёсыз тани кылем фестивале пыриськизы ке лябгес, нош туэ соос бурдъяськизы ни, кужымзы но тросгес будэмын. Тани Старые Юбери Можгаын вань, коллектив сыӵе огшоры кадь вал, а туэ лауреат луиз. <…> Шумпоттытӥз тани Пичи Пурга – калык хор – солэн тоже кужымез кӧня ке мукет вал ини. <…> Тросэзлэн быгатонлыксы будэмын
Валерий Митрофанов, «Даур гур» фестивальлэн жюриезлэн ёзчиез

Валерий Митрофановлэн кылъёсызъя, тужгес пӧртэмлыко но трос пыриськисьёс вал кырӟан ӧрын. Ӧжытгес луо эктӥсьёс но крезьгуро инструментъёсын шудӥсьёс.

Асьмелэн тани ичигес эктонъя коллективъёс. Самой зол номинация – со «Инву утчан гур», отын кырӟасьёс тросгес – солистъёс тросгес, ансамбльёс но тросгес. Жаль потэ, кӧня ке ичигес инструментальной коллективъёс. Вот тулыс номинацие соос пыриськизы, отын духовой оркестръёс, калык оркестръёс, ваньмыз пыриськизы, но таяз тани, пумаз, йылпумъян конкурсэ, соос ӧз пыриське ни, мылкыд ӧз каре
Валерий Митрофанов, «Даур гур» фестивальлэн жюриезлэн ёзчиез

Удмурт лулчеберетъя «Даур гур» IV фестиваль-вожвылъяськонлэсь валтӥсь кузьымзэ но 150 сюрс манетлы сертификат Алнаш ёрос басьтӥз. Ӵапак отысь тужгес трос коллективъёс но быдэстӥсьёс лауреатлэн дипломъёсыныз пусъемын вал.

Дипломъёсын но коньдонлы сертификатъёсын озьы ик пусъемын:

Шаркан ёрос – I степенё лауреат но 100 сюрс манетлы сертификат;

Кияса ёрос – II степенё лауреат но 80 сюрс манетлы сертификат;

Эгра ёрос –III степенё лауреат но 50 сюрс манетлы сертификат.

Фестиваль 2012-тӥ арысен кык арлы одӥг пол радъяське. Туэ со тодмо удмурт крезьгурчи Геннадий Корепанов Камский вордскем дырысен 90 ар тырмонлы сӥземын вал (котырес лыдпуссэ 2019-тӥ арын пусъёмы – ред.). Юбилярлэсь кырӟанъёссэ тужгес усто быдэстэмез понна Пичи Пурга ёросысь Улӥ Посьтол (Иваново-Самарское) гуртысь кырӟанъя «Ялыке» калык ансамблез пусйизы.

Ватсалом, Валерий Митрофановлэн кылъёсызъя, таяз арын фестиваль котькулэсь паськыт ортчиз. Но таӵе бадӟым ужрадлы коньдон но, йылпумъян концертлы инты но бадӟымгес кулэ вылэм, пусйиз со.  

Тодэ вайытом, «Даур гур» IV фестиваль улсын кырӟанъя «Пестросаес» улосвылкуспо фестиваль-вожвылъяськон ортчиз, удмурт эктонъя «Юг эктон» элькун конкурс, Удмурт лулчеберетъя арня но мукет ужрадъёс ортчизы.

Ватсалом, 2016-тӥ арын Удмурт лулчеберетъя «Даур гур» III элькун фестиваль-вожвылъяськонын Дэбес ёрос вормиз



Наверх
Вниз