Ижкар+26 °C
12 -тӥ пӧсьтолэзь 2020 Воскресенье
16+

Юбилей аразы потэм нырысетӥ книгаеныз тодматон ортчытӥз «Удмуртия» издательство

  • 486
  • 0
Ижкар / Удмуртия
Юбилей аразы потэм нырысетӥ книгаеныз тодматон ортчытӥз «Удмуртия» издательство
Туспуктэм: Руслан Нуриахметов

2019-тӥ арын «Удмуртия» издательство 100 ар тырмонзэ пусъе. 25-тӥ толшоре юбилей аразы потэм нырысетӥ книгаен тодматон ортчытӥзы.

Сьӧлтаын улӥсь Ядкария Дорофеевалэн «Мелодия любви» (12+) бичетаз кылбуръёс но кӧня ке веросъёс пыризы. Ваньмыз соос яратон сярысь. Кызьы вераз ачиз авторез, со книга поттӥз яратоно муртэзлы аслэсьтыз мылкыдъёссэ усьтон понна.

Уг тодӥськы, кызьы адямилы, яратоно адямиелы, яратэмме вераны. Малпасько, потто книга, сёто, нош отӥяз мар ке луоз, луоз
Ядкария Дорофеева, кылбурчи

Дышетскемезъя Дорофеева кылчи луэ. Кема аръёс ӵоже ёрос газетын ужаз, ужъёсыз элькун газетъёсын но потазы. Но кылбуръёс гожъямез ноку вылымтэ, соос шуак кадь кылдӥзы.

Кылем арын пӧсьтолэзе. Казакъёслэн кырӟанъя фестивалязы ветлэме бере. <…> Со дырысен котькуд нуналаз 2-3 кылбур гожтӥсько, троссэ куинь нунал вис луылэ. Нош веросъёсы кемаласьгес гожтэмын ни. Сюжетъёс улонысь басьтэмын, номыр но юри малпамын ӧвӧл
Ядкария Дорофеева, кылбурчи

Солэн верамезъя, кылбуръёсыз кыкетӥ книгалы тырмымон люкаськизы ни. Отын нырысетӥ яратонэз, аслаз малпаськонъёсыз но сюлмаськонъёсыз пыр бигер песянаезлэн визьнодамез сярысь вераны малпа.

Со сяна, сьӧлталан улӥсьёс сярысь нимысьтыз бичет поттыны мылкыдыз вань. Отчы журналист дыръяз гожъям очеркъёсыз но тупалозы.

Отын афганецъёс но, дано кунмуртъёс но, маин ке тунсыко луись огшоры адямиос но. Туспуктэмъёсын очеркъёс яке веросъёс. Книгалэн ӝыныез вань ни. Со секыт уж. Со сьӧлталан улӥсьёслы гинэ ӧвӧл, мукетъёсызлы но тунсыко мед потоз. Со мылкыдъёсты мед бугыртоз, лулпуше маиз ке но мед кылёз, астэс воштыны, кӧня ке но умойгес карыны мед луоз
Ядкария Дорофеева, кылбурчи

Ядкариялэн аслаз улонэз сярысь но тунсыко книга пӧрмысал. Сизьым аресозяз со Татарстанын песянаеныз улэмын. Нош школае Казахстанын мынэм, ӟуч кылэз чиг тоды вылэм. Ог кык арзэ дышетскон туж секыт йӧтӥз шуыса тодаз вае кышномурт. Казах кышномурт нылашез ӟуч кыллы дышетыны кутскем. «Туж удалтӥз дышетӥсен, солы луыса ӟуч кылэз яратон быдэс улонэлы пыӵаз», - вера Ядкария Дорофеева. Табере удмурт кылэз но дышетэмез потэ.

Удмурт кылэз туж яратӥсько, сое дышетэме потэ, али самоучителен дышетскисько. Гожъяло-а кылбуръёс (удмурт кылын – ред.)? Уг, дыр. Озьы ке но, кылбуретлэсь, кырӟанъёслэсь кылзэс валаме потэ. Вераськеме но потэ, танӥ издательстве лыктыны но вераськыны удмурт кылын. Со лулчеберетлэн сыӵе бадӟым сӥез, мон асме со лулчеберетлэсь ишкалтэмен лыдъясько. Тани Виктор Шибановез, Сергей Матвеевез но трос мукетъёссэ ас кылынызы лыдӟыны уг быгатӥськы. Удмуртиын улӥськод, улэп классикъёс пӧлы пыриськод ке, удмурт кылын лыдӟиськыны быгатыны кулэ шуыса лыдъясько
Ядкария Дорофеева, кылбурчи



Наверх
Вниз