Ижкар+4 °C
19 оштолэзь 2019 Удмуртарня
16+

Удмуртиысь йӧскалык политикая министр: калык праздникъёсты ортчытонэз выльдыны кулэ

  • 226
  • 0
Ижкар / Удмуртия
Удмуртиысь йӧскалык политикая министр: калык праздникъёсты ортчытонэз выльдыны кулэ
Туспуктэм: Григорий Фомин

Гербер но мукетъёсыз йӧскалык праздникъёс выльдэмез кулэ каро, соос узыргес но мургес луыны быгато, вераз журналистъёслы Удмуртиысь йӧскалык политикая министр Лариса Буранова. Со пумысен малпаськыны ӵектозы элькунысь лулчеберетъя йӧскалык огазеяськонъёслы.

Туннэ йӧскалык праздникъёсмес ортчытон радлыкез воштыны мылкыд вань. Валамон, ӵукна султыса ум вералэ, всё, паллянысь бурпала эктӥмы, табере бурпалась паллянэ эктомы, ӧвӧл. Одно ик командаен кенешомы
Лариса Буранова, Удмуртиысь йӧскалык политикая министр

Солэн верамезъя, туала вакытэ одӥг юан сётыны кулэ: малы ортчытъяськомы йӧскалык праздникъёсты. Туннэ тросэз со шулдыръяськонъёсы эшъёсынызы, ӵыжы-выжыосынызы адӟиськыны, концерт учкыны шуыса лыкто. Но солэн кыӵе ке паськытгес пайдалыкез луыны, кыӵе ке ужпумъёсты сэрттыны-пертчыны кулэ, лыдъя министр. 

Мон али уг тодӥськы, нылпиослы шудон интыос-а тросгес лэсьтоно яке воршудъёсын герӟаськем люкетсэ-а кужмогес кароно. <…> Мон уг вераськы Гербер ӧвӧл кулэ, со урод шуыса. Вераськон со сярысь ӧвӧл. Мон малпасько, со мукет луыны быгатэ: мургес, пайдалыкогес. <…> Адямиос Герберез малы ке но возьманы кулэ. Со калыкез огазеян ке, отын мар ке сыӵеез луыны кулэ, адями огазеяськемез мед шӧдоз, со праздникысь мылкыд вайыны кулэ
Лариса Буранова, Удмуртиысь йӧскалык политикая министр

Лариса Бурановалэн верамезъя, умой луысал, шуом, Гербере трос туристъёс но ветлысалзы ке. Министр пусйиз, таяз арын кыӵе ке бадӟым воштӥськонъёс уз луэ, но тыршозы воршудъёсын герӟаськем люкетсэ кужмоятыны. Туэ малпаськон, кенешон ар луоз, нош вуонояз, Удмуртилэн кунлыкезлы 100 ар тырмон арын, Герберез выль сямен ортчытыны тыршозы.

Радъялозы-а Гербер шулдыръяськонэз Москваын но Санкт-Петербургын юанлы, Лариса Буранова чутрак валэктон ӧз сёты. Солэн кылъёсызъя, Россилэн шоркараз ортчытъяськись «Гербер» нимам ужрад йӧскалык праздниклы уг тупа.

Мон понна Гербер – со удмурт йӧскалык праздник. Мон вань ужъюлтошъёслы но верай, Герберез ортчытӥськом ке, отын Герберлэн кыӵе ке люкетъёсыз ке но луыны кулэ. Нош асьме бӧлякмылы люкаськон инты ке, соку мар ке мукет - шуом, элькунэн тодматон. Но сое Гербер ӧвӧл нимано. Мыным озьы потэ
Лариса Буранова, Удмуртиысь йӧскалык политикая министр

Санкт-Петербургын ужпум мукетгес, отын туж кужмо, мыло-кыдо бӧлякмы, пусйиз Лариса Буранова. Солэн кылъёсызъя, отын соос асьсэос коньдон шедьто, кар администрациен кенешо.

Тодэ вайытом, таяз арын элькун Гербер шулдыръяськон 29-тӥ инвожое Эгра ёросысь Нюнягурт (Малые Мазьги) вӧзын ортчоз.

Наши партнеры

Наверх
Вниз