Ижкар-24 °C
6 -тӥ толсур 2021 Вордӥськон
18+

Удмуртиысь «New ШУЛДЫР ӜЫТ» группа «Московская весна A Capella» калыккуспо конкурсэ пыриське

  • 763
  • 0
Москва / Россия
Удмуртиысь «New ШУЛДЫР ӜЫТ» группа «Московская весна A Capella» калыккуспо конкурсэ пыриське
Туспуктэм: vk.com ("ШУЛДЫР ӜЫТ"/Людмила Нордгеймер)

Ижкарысь кун филармониысь «New ШУЛДЫР ӜЫТ» группа «Московская весна A Capella» усьтэм калыккуспо конкурсэ пыриське. Со улсын 1-3 куартолэзе егит кырӟасьёс Москваын возьматонъёс ортчытӥзы, нош  группа понна вожвылъяськонлэн сайтаз куара сётыны луэ на. Со сярысь ивортодэтъя «Удмуртия» агентстволэн корреспондентэзлы «Шулдыр ӝыт» ансамбльлэн чеберлыкъя кивалтӥсез Наталья Ушакова вераз.

Конкурс возьматонъёс 1-10 куартолэзе Москваысь 50-лэсь ятыр площадкаосын радъясько. Котькуд группа кӧня ке нунал ӵоже аслэсьтыз быгатонлыкъёссэ возьматэ. Вожвылъяськонэ Россиысь но кунгож сьӧрысь 200-лэсь трос коллективъёс пырисько. Сценаос вылысь пӧртэм ӧръёсъя кырӟанъёс чузъясько – фольклор, калык, поп, рок, этно но мукет. Ваньзы ик соос одӥг амалэн – a capella (крезьгуро фонограмматэк, крезьгуро арбериосын шудӥсьёстэк, улэпкын) – быдэстӥсько.

Наталья Ушковалэн верамезъя, «New ШУЛДЫР ӜЫТ» группа куинь нуналскын ӝыны часъем укмыс концерт пуктӥз. 

Ми пӧртэм стильёсъя кырӟанъёс бырйим, тунсыко мед луоз шуыса. Фольклор но, калык кырӟанъёс но, поп но, рок но, балладаос но вал. Нош кыл сярысь верано ке, конкурс калыккуспо бере, Москваын ортче, репертуармес но интернациональной карыны тыршим. Удмурт но, ӟуч но, англи кылын но кырӟанъёс быдэстӥм. <…> Али ваньмыз куара сётон бордын. Конкурслэн нимлыко бамаз милям номермы 95. Со номеръя милесьтым ансамбльмес шедьтыны но куара сётыны луэ
Наталья Ушакова, «Шулдыр ӝыт» ансамбльлэн чеберлыкъя кивалтӥсез

Ижкарысь кун филармониысь ансамбльлы дурбасьтыны котькуд мылкыд карись быгатэ. «Московская весна A Capella» конкурслэн нимлыко сайтаз куара сётон 10-тӥ куартолэзёзь мыноз.

Озьы ик асьсэлэсь куаразэс сётозы Россиысь но мукет кунъёсысь продюсеръёс, кырӟасьёс, крезьгурлы дышетӥсьёс. Соос пӧлын Мишель Вейр, Виктор Дробыш, Василий Герелло, Валерия, Варвара, Андреа Фигалло, Владимир Коробка, Егор Крид но мукетъёсыз. 

Вожвылъяськонлы йылпумъянъёсты 11-тӥ куартолэзе шараяны чакламын. 

Тодэ вайытом, кемалась ик ӧвӧл «Шулдыр ӝыт» ансамбль «Талант 2019» V калыккуспо телеконкурсын I степенё лауреат луиз.



Наверх
Вниз