Ижкар-3 °C
23 -тӥ тулыспал 2020 Воскресенье
16+

Менсадык Гариповлэн ужъёсыныз адӟытон усьтӥськиз Ижкарын «Удмуртия» книгапоттонниын

  • 419
  • 0
Ижкар / Удмуртия
Менсадык Гариповлэн ужъёсыныз адӟытон усьтӥськиз Ижкарын «Удмуртия» книгапоттонниын
Туспуктэм: Руслан Нуриахметов

Ижкарын «Удмуртия» книгапоттоннилэн галереяяз (Пастухов нимо урам, 13) РСФСР-ысь дано суредасьлэн Менсадык Гариповлэн ужъёсыныз адӟытон ужаны кутскиз. Кызьы вераз ивортодэтъя «Удмуртия» агентстволы издательстволэн кивалтӥсез Юрий Кузнецов, соос 1958-1986 аръёсы лэсьтэмын но 1986-тӥ арын «Мифы, легенды и сказки удмуртского народа» книгаын потэмзы дырысен ужъюртлэн архиваз утисько.

Та адӟытон бордысен кутскизы милям юбилейной мероприятиосмы шуыны луоз (2019-тӥ арын книгапоттоннилы 100 ар тырме - ред.). Менсадык Гариповичлэн та ужъёсыз – со удмурт улонлэн энциклопедиез шуыны луоз. Удмурт улонэз бытовой жанровой суредъёс пыр воксё усьтэ. Кин Удмуртие вуылэмын ӧвӧл, удмурт калыкен тодматскемын ӧвӧл, вот ӵапак та суредъёс пыр, номыре лыдӟытэк, нокыӵе научной трактатъёс лыдӟытэк, мон малпасько, пуш ласянь тодматскыны быгатоз
Юрий Кузнецов, «Удмуртия» книгапоттоннилэн кивалтӥсез

Солэн верамезъя, книга поттыны кутскон дыръя лэсьтэм суредъёс, гравюраос учкисьёсты али но паймыто, шумпоттыто. Вылаз ик, сыӵе амалэн ужасьёс али сокем ик трос ӧвӧл.

Та суредъёс – графика, офорт амалэн лэсьтэм ужъёс - соос уг вужмо. <…> Татын сыӵе векчиесь ужъёс зэмзэ но туж трос дырез, кужымез басьто, нош туала вакытэ суредасьёслэн, оло, дырзы но ӧвӧл ни, оло, кужымзы но ӧвӧл ни, валамон, со понна дун но басьтыны уг луы, соин ик вот тае воштӥсьёс туж ик ӧвӧл
Юрий Кузнецов, «Удмуртия» книгапоттоннилэн кивалтӥсез

Менсадык Гариповлэн ужъёсыныз адӟытон

4 фото

Тодэ вайытом, алигес «Удмуртия» издательство «Мифы, легенды и сказки удмуртского народа» книгаез выльдыса но будэтыса поттӥз. Юрий Кузнецовлэн верамезъя, солы кулэяськон туж бадӟым. Табере лыдӟисьёслэн печатлам но улэп суредъёсты ӵошатыны луонлыксы вань.

Туж тунсыко ӵошатыны: кызьы книгаын та суредъёс адӟисько, кызьы - со улэпесь суредъёс
Юрий Кузнецов, «Удмуртия» книгапоттоннилэн кивалтӥсез

Озьы ик солэн верамезъя, адӟытонэ пырисьёслэн суредъёсъя, Менсадык Гариповлэн творчествоезъя кылдэм юанъёссылы рос-прос валэктонъёс сётыны книгапоттонилэн чеберлыкъя редакторез Юрий Лобанов быгатоз. 

Адӟытон куарусён шорозь ужалоз.

ВАТСАН

Менсадык Гариповлэн «Мифы, легенды и сказки удмуртского народа» книгае пыртэм ужъёсыз СССР-ысь но РСФСР-ысь госиздатъёслэн дипломъёсынызы пусъемын. Со сяна, суредась но книгаез бичась Надежда Кралина УАССР-лэн Кун премиезлэн лауреатъёсыз луизы.

Тодэ вайытом, Ижкарысь Суредан искусствоосъя элькун музейын удмурт суредасьлэн Вячеслав Михайловлэн «Этюды настроения» адӟытонэз ужа

Наши партнеры

Наверх
Вниз