12+
18-тӥ куартолэзе Ижкарысь Геннадий Красильниковлэн литературая музей-квартираяз (Максим Горький нимо урам, 45) Удмурт йӧскалык театрысь артистъёсын пумиськон ортчоз. Ужрад «Музейёслэн уйзы» акция но Театрлэн арез улсын радъяськоз, вераз ивортодэтъя «Удмуртия» агентстволэн корреспондентэзлы музейлэн кивалтӥсез, кылосбур тодосъя кандидат Мария Ившина.
Ми дорын луозы Григорьев Максим но Плотников Иван. Со егит артистъёс, кудъёсыз ужало йӧскалык театрын. Соосын пумиськон ортчытом. <…> Тунсыко, тани Григорьев Максимлэн моноспектаклез вал ини – «Легенда о пианисте». «Удмурт данлык» фехтованиея соослэн школазы вань. Мыным аслым но тунсыко соослэн улонзы сярысь тодыны
Артистъёсын пумиськон 16 часын кутскоз. Нош солэсь азьвыл, 15 часысен, вань мылкыд карисьёслы музей-квартираетӥ экскурсия ортчытозы.
Музейёслэн нуналазы пыронэз дунтэк.
Тодэ вайытом, 13-19 куартолэзе быдэс Удмуртиын «Музейёслэн арнязы» акция ортче.