Ижкар-1 °C
27 -тӥ шуркынмон 2021 Кӧснунал
18+

Кристина Орбакайте кырӟалоз Ижын Карлэн но Россилэн нуналаз

  • 840
  • 0
Ижкар / Удмуртия
Кристина Орбакайте кырӟалоз Ижын Карлэн но Россилэн нуналаз
Туспуктэм: facebook.com (Kristina Orbakaite)

12-тӥ инвожое Ижкарлэн но Россилэн нуналаз Удмуртилэн шоркараз Кристина Орбакайте кырӟалоз (0+). Шулдыръяськонъёсты радъясь комитетлэн йылпумъян кенешонэз бере со сярысь элькун тӧролэн но кивалтэтлэн администрацизылэн кивалтӥсез Сергей Смирнов ивортӥз.

Концерт 20 час 45 минутэ тыметлэн ярдураз кутскоз

Кызьы вераз кенешонын Сергей Смирнов, туэ Карлэсь нуналзэ пусъёнэз радъянъя мер комитет кылдытэмын вал. Южтолэзьысен со карыны улӥсьёслэсь 81 куриськонзэс кутӥз, со пӧлысь 58-сэ улонэ пыӵатозы. Ижкарлэн котькуд ёросэз понна нимаз афишаос кылдытэмын, нош дурбасьтэм кичӧлтонъёс пӧлын азбар шудонъёсъя «Счастливый город Берша-сити» фестиваль, Ленин ёросын «Ёрослэн уез», Бадӟым хор собор, ярдурын «Матрёшка-фест» йӧскалыккуспо фестиваль, отын элькунын улӥсь вань выжы калыкъёслэсь дӥськутсэс мерталозы, «Открытый город» фестиваль, кудӥз куинь интыын радъяськоз – «Открытый сад» вӧлметын, Суредан устолыкъя музей сьӧрысь интыын, Туала драматургияя но режиссурая центрын.

Кӧня ке ар талэсь азьло ми Азбарлэсь, Ёрослэсь, Карлэн но Россилэсь нуналзэс пусйыны кутскимы. Со калыклэсь кичӧлтонъёссэс быдэстыны умой луонлык. <…> Туж кулэ сыӵе ӵектонъёслы юрттыны, кудъёссэ адямиос асьсэос дась улонэ пыӵатыны
Сергей Смирнов, Удмуртиысь тӧролэн но кивалтэтлэн администрацизылэн кивалтӥсез

Солэн кылъёсызъя, Россилэн нуналэзлы тунсыко программа Ижкарын гинэ ӧвӧл, Удмуртиысь мукет каръёсын но, ёросъёсын но дасямын.

Куд-ог ужрадъёслэн кичӧлтӥсьёссы асьсэ малпанъёссы сярысь веразы.

Микрорайонамы улӥсьёс одӥг бадӟым семья кадь мед луозы. 3-5 инвожое ӝытъёсы азбаръёсын ужрадъёс ортчытомы, нылпиос милям пинал дырысьтымы шудонъёсын мед тодматскозы, праздник дыръя соосын шудозы
Артём Селезнёв, «Берша-сити» ӵектослэн кураторез

Милям ӵектосмы туэ куинь интыын ортчоз. 10-тӥ инвожое егитъёслэн выль егит коллективъёс нырысетӥ вамышъёссэс лэсьтозы, 11-тӥ инвожо егит мыло-кыдо адямиослы сӥземын луоз, соос асьсэ азинсконъёсынызы тодматозы, 12-тӥ инвожое электрон крезгурасьёслэн слётсы ортчоз, тодэ вайытом, Ижкар та крезьгуре выль омыр пыртэменызы тодмо луиз шуыса
Азалина Закирова, «Открытый город» фестивальлэн кураторез

Карлэн нуналэз улсын стрит-арт фестиваль сярысь Ижкар администрацилэн тӧроезлэн мерлыко политикая воштӥсез Дмитрий Чистяков.

Туэ фестиваль быдэсак Ижкарын улӥсьёслэн ӵектонъёссы вылын кылдытэмын – со аспӧртэмлыкез. Карысь куинь лыдӟетъюртъёс пырисько - Гагарин нимо, Маршак нимо но 10 номеро - соослэн азь палазы суредъёс карын улӥсьёс лэсьтозы. Озьы ик Удмурт урамысь 267/2 номеро юртлэн азбарез пыриське. Эшшо кык инты – ӵыпет вылысь бадӟым но али шӧтэм борд но Пушкинской урамысь одӥгезлэн юртлэн утялтымтэ аркаез
Дмитрий Чистяков, Ижкар администрацилэн тӧроезлэн мерлыко политикая воштӥсез

Карлэсь нуналзэ пусъёнъя быдэс программаез муниципал кылдытэтлэн сайтысьтыз учкыны луэ. 



Наверх
Вниз