Ижкар+1 °C
7 толсур 2019 Кӧснунал
16+

Удмурт рэп, туала кылбуръёс, мода но кӧня ке пӧртмаськон: «Усьтэм кар» фестиваль улсын Ижкарын удмурт нунал ортчиз

  • 359
  • 0
Ижкар / Удмуртия
Удмурт рэп, туала кылбуръёс, мода но кӧня ке пӧртмаськон: «Усьтэм кар» фестиваль улсын Ижкарын удмурт нунал ортчиз
Туспуктэм: Руслан Нуриахметов

Туала лулчеберетъя «Усьтэм кар» («Открытый город») IX фестиваль улсын 19-тӥ инвожое Ижкарын удмурт лулчеберетлы сӥзем нунал ортчиз. Туала драматургияя но режиссурая «Конюшня» центрын выль удмурт кырӟанъёс, кылбуръёс чузъяськизы, озьы ик удмурт дӥськутэз но ӝӧквыл шудонъёсты, Ашальчи Окилэн ужъёсызъя спектакль возьматӥзы но удмурт кышномуртъёслэн ведӥн кужымзы сярысь вераськизы.

Ужрадэ пыриськисьёс пӧлысь трос выль адямиосты адӟыны луиз. Карын улонлы дышыса, асьсэлэсь быгатонлыкъёссэс Удмуртилэн шоркараз одӥг-кык ар талэсь азьло вуэм егитъёс возьматӥзы.

Удмурт нунал «Усьтэм кар» фестивальын Ижкарын


Дэбес ёросысь Данёгуртын будэм Денис Максимов Удмурт кун университетысь Удмурт кылосбуръя, финно-угроведения но журналистикая институтын кыкетӥ курсын дышетске. Та выллем ужрадъёсы пыриськыны, выступать карыны туж кельше, шуэ пияш. Университетын со «Ватка» театр-студие ветлэ. Алиге «Юмок» театр-студиысь егит артистъёс борды итӥськиз. Фестиваль улсын соосын ӵош спектакль возьматӥз, озьы ик удмурт но ӟуч кылын гожтэм рэп кырӟанъёссэ быдэстӥз.

Мынам потэ гожъяме удмуртэн но, ӟучен но. Удмуртаз одӥгез тунсыко, ӟучаз мукетыз тунсыко. Удмуртэн ичи рэп гожъясьёс, соин ик тонэ адӟозыгес. <…> Ӟуч кыл умойгес выдэ (рэп крезьгур вылэ – ред.), малы ке шуоно удмурт кылын ӵемысь ударение луэ берпуметӥ слоге, соин куддыр ударениез воштоно луэ, кытын ке кылъёсты, яке ӟуч кылэз пыртоно уже. <…> Кызьы Пикулев лэсьтэ, солэн тж умой, малы ке шуоно со кырӟанъёсаз ӟуч кылъёсты минимально пыртэ, солэн словарной запасэз туж умой. Со понна со мыным яра туж юн
Денис Максимов, рэпер

Егит кылбурчиос сокем ик трос ӧй вал. Студентъёслэн али экзаменъёссы мыно, соин ик, оло, кужымзэс пазямзы ӧз поты. Нош оглом верано ке, али гожъяськисьёс трос, нош кылбурет литератураын тужгес зол азинскисез удыс луэ, шуиз ужрадэз огез радъясь, кылбурчи Анастасия Шумилова. Туала егитъёслэн ужъёссы гожтон амалзыя но, пуштроссыя но шӧдскымон воштӥсько, шуом, 20 ар талэсь ало кылдытэмъёсызлэсь.

Вотэс туж трос воштэ, оглом дунне культура шӧдӥське егитъёслэн гожъяськемъёсазы – миллениалъёс шуиськом соосты. Кӧня ке мукет сямен гожъясько. Но со дыре ик, сыӵе ик темаос кылё, кудъёсыз удмурт литератураын кутсконысеныз ик вал, соос нокытчы но уг кошко - шуом, вордӥськем гурт сярысь ваньзы гожъясько
Анастасия Шумилова, кылбурчи

«Усьтэм кар» фестиваль улсын удмурт лулчеберетлы сӥзем нунал возьматӥз, егитъёслэн асьсэлэсь удмуртлыксэс возьматыны луонлыксы уг сӥя шуыса. Потэ вылэм, таӵе пумиськонъёсты рос-прос радъяны быгатӥсь удмуртъёс но тросгес мед луысалзы. Соку ужрадъёсы пыриськисьёс но, учкыны ветлӥсьёс но, соин валче удмуртлыкен тунсыкъяськыны кутскемъёс но, тросгес луысалзы. 

Наши партнеры

Наверх
Вниз