Ижкар-5 °C
26 -тӥ толшор 2020 Воскресенье
16+

Удмуртиысь учкымон интыосын выль книга поттӥзы Ижкарын

  • 423
  • 0
Ижкар / Удмуртия
Удмуртиысь учкымон интыосын выль книга поттӥзы Ижкарын
Туспуктэм: Майя Бывальцева

«Удмуртия» издательствоын «Достопримечательности Удмуртской Республики» выль книга поттӥзы. Солэн пуштросэз, аспӧртэмлыкез сярысь ивортодэтъя «Удмуртия» агентстволэн корреспондентэзлы книгалэн огез кылдытӥсез, книгапоттонниысь валтӥсь редактор Георгий Грязев вераз.

Книгае шаермылэн вань сэрегъёсысьтыз историеныз, чебереныз, калыклы тунсыко луэменыз висьяськись интыос пыризы. Георгий Грязевлэн верамезъя, таӵе выллем книга соос поттазы вал ини, со туж чаляк лыдӟисьёс кие кошкиз. Тазэ бичетэз туала куронъёслы тупатыса лэсьтӥзы ини.

Вераны кулэ, таӵе книгаосты лыдӟисьёсмы милям туж куро, малы ке шуоно со сӥземын быдэс Удмуртилы, солэн историезлы, солэн калыкезлы. Таиз книга маиныз аспӧртэмлыко – со люкемын пӧртэм люкетъёслы. Нимаз сётэмын городъёс, котькуд городлэн аслаз тунсыко интыосыз, чебер интыосыз, кудъёсыз кыско элькунамы улӥсьёсты но, куноосты но. Шуом, памятникъёс, инкуазен герӟаськем чебер интыос, вашкала коркаос, тодмо адямиосын герӟаськем интыос
Георгий Грязев, книгалэн огез авторез

Удмуртия книгаын куиньлы люкемын: уйпал, шор но лымшор. Авторъёс шаермылэн котькуд палъёсысьтыз тунсыко, калыкез кыскись, историез верась интыосты шедьтыны тыршизы.

Возьматыны тыршим сюлмез бордаз кыскись интыосты, кытчы адями мыныны быгатысал шутэтскыны но, шуом, кудаз быгатысал со памятникез, кыӵе ке объектэз адӟыса, данъяськыны яке маке выльзэ тодыны. <…> Уйпал ёросэз гинэ басьтоно ке, мар, пе, со северын, Юкаменск, Яр ёросъёсын номыр учконэз, номыр данъяськымонэз ӧвӧл кадь. Но ми возьматыны тыршиськом, что отын но вань сыӵе чебер интыос, сыӵе тодмо интыос, кытын луэ Камалэсь кутсконзэ но адӟыны, чебересь черкъёсты но адӟыны, шутэтскон интыосты но адӟыны
Георгий Грязев, книгалэн огез авторез

Озьы, уйпалэз ик верано ке, книгае крезьгурчилэн Пётр Ильич Чайковскийлэн песятаезлэн Глазкарын городничий луыса ужакуз улэм интыез пыртэмын. Мукет уйпал ёросъёсысь «Живица», «Тылыс. Живые родники» шутэтскон интыосын, Байгурезен тодматэмын.

Сарапулысь карлэн тӧроез луыса ужам Павел Башенинлэн юртэз но дачаез пыртэмын. Нырысетӥ дунне ож дыръя кык Георгиевской крестъёсын пусъем Антонина Пальшиналэн синпелетэз сярысь гожтэмын. 

Озьы ик книгаын бадӟым инты басьтэ йӧскалык шӧмыз но.

Котькуд интыын тыршимы шедьтыны сыӵе объектъёсты, сыӵе интыосты, кудъёсыз герӟаськемын удмурт калыклэн ортчеменыз, туала нуналэныз, солэн дано адямиосыныз. Соин ик, мон малпасько, та туж умой сыӵе книга, кудӥз сётоз кыӵе ке тодон-валан но, маке выльзэ но
Георгий Грязев, книгалэн огез авторез

Книга бадӟым форматэн, яркыт буёло, трос бадӟым туспуктэмъёсын поттэмын. Туспуктэмъёс борды вакчияк валэктонъёс ватсамын. Гожтӥсьлэн кылъёсызъя, со туспуктэмъёсын альбомлы но золгес укша.

Бадӟымесь фотографиос, быдэс страницалы, кык страницаосын разворотэн сётэмын. Вакчияк сётэмын тани Сарапуллэн историез, тодмо интыосыз. Вӧзаз ик чебересь сыӵе буёло фотографиос, туспуктэмъёс, шуом, текст дополнять каре фотографиез, фотография подтверждать каре текстэз. Вот тӥни сыӵе структураен лэсьтыны тыршим. Текстэз трос ӧвӧл, лыдӟисез медаз загружать кары шуыса, синмыныз со чеберзэ мед адӟоз шуыса
Георгий Грязев, книгалэн огез авторез

«Достопримечательности Удмуртской Республики» книгалэн бамъёсыз

4 фото

Авторъёслэн малпамзыя, книга кузьымлы туж тупалоз: тодмоослы, ӵыжы-выжыослы, палэнысь лыктэм куноослы. Озьы ик со тунсыко луоз шаерчиослы но, пиналъёслы но, туристъёслы но.

Текстъёсыз туж капчи кылын гожтэмын, соос трос ӧвӧл, бадӟымесь ӧвӧл, тросгес иллюстративной материалэз
Георгий Грязев, книгалэн огез авторез
 

Книга бордын, Георгий Грязев сяна, «Удмуртия» книгапоттонниысь дизайнер Валентин Семёнов ужаз, озьы ик трос гинэ туспуктӥсьёс.

Татын милям туж трос авторъёсмы (туспуктӥсьёсмы – ред.), ми соослы туж бадӟым тау кариськом, татын милям ог 20 пала фотографъёс. Соослэсь нимъёссэс ми сётӥськом, малы ке шуоно соостэк ми таӵе чебер, йӧно книга лэсьтыны ӧм быгатысалмы. Огъя кужымен, шуом, таӵе книга пӧрмиз
Георгий Грязев, книгалэн огез авторез

64 бамъем книга 1 сюрс 500 тиражен поттэмын. Сое басьтон понна «Удмуртия» книгапоттонние вазиськоно.

Тодэ вайытом, инвожое издательство книга поттӥсьёслэн кык огъяросси вожвылъяськонъёсазы куинь диплом басьтӥз. Огез соос пӧлысь - «Удмурты. Тайна Тамги» книга понна

Пусъём, кемалась ик ӧвӧл книгапоттонни, 100 ар тырмонэзлы сӥзьыса, «Мифы, легенды и сказки удмуртского народа» выль книга поттӥз.

2017-тӥ арын «Удмуртия» издательство «Мон улӥсько Удмуртиын» («Я живу в Удмуртии») лыдӟон книга поттӥз, со нылпиосты элькунэнымы тодматон понна чакламын. Сое Россиысь Печатья но калыке ивортодэт вӧлмытонъя федерал агентстволэн «Малая Родина» конкурсаз пусйизы

Наши партнеры

Наверх
Вниз