Ижкар-3 °C
23 -тӥ тулыспал 2020 Воскресенье
16+

Любовь Ганьковалэсь «Палтури» книгазэ поттӥзы «Удмуртия» издательствоын

  • 318
  • 0
Ижкар / Удмуртия
Любовь Ганьковалэсь «Палтури» книгазэ поттӥзы «Удмуртия» издательствоын
Туспуктэм: Майя Бывальцева

«Удмуртия» книгапоттонниын Алнаш ёросысь гожъясьлэсь Любовь Ганьковалэсь «Палтури» нимо выль книгазэ поттӥзы. Со сярысь ивортодэтъя «Удмуртия» агентстволэн корреспондентэзлы бичетлэн редакторез, издательствоысь чеберлыко литературая редактор Сергей Матвеев вераз.

Солэн кылъёсызъя, Любовь Ганьковалэн та дырозь даслэсь трос книгаосыз потӥзы. Выль бичетаз веросъёсыз, мадёсъёсыз, тодэ ваёнъёсыз, инкуазь суредъёсыз, визь пырыосыз но кылбуръёсыз пыризы.  Гожъясь, котьку сямен, нылкышнолэсь пуштроссэ суреда.

Мон — кышномурт, шуэ со книгалэн азькылаз, — пиосмуртлэн визьмыныз улыны уг быгатӥськы. Лулпушкам кышномурт эксэйлык каръяськемын. Соин ик сьӧлыко но сьӧлыктэм кышномуртлэн улэмез сярысь гожъясько, ас адӟонъёсме но отчы пыртӥсько
Сергей Матвеев, книгалэн редакторез

Сергей Матвеевлэн кылъёсызъя, Любовь Ганьковалэн гожъямъёсыз калыклы матын луэменызы бордазы кыско.

Автор гуртын улэ бере, инкуазьлэн чеберез но, калыклэн сям-йылолъёсыз но, семья но бускель кусыпъёс но солы тодмо. Соин ик солэн мадёс-веросъёсыз но тунсыко пӧрмо, син шоре яркыт суред кылдыто
Сергей Матвеев, книгалэн редакторез

Кылъёссэ юнматыса, редактор гожъясьлэн «Караулчиос» кузьмадёсэз сярысь вера.Солэн кылъёсызъя, отын революцилэн гуртэ вуэмез, музъем бордын ужасьёслэн шуг-секытъёссы, колхозлэн кылдэмез-куашкамез, совето вакыт но туала улон возьматэмын. Озьы ик гурт калыклэн ужаны, чиданы, яратыны, кусыпъёс возьыны быгатэмзы яркыт суредамын.

Любовь Ганьковалэн ужъёсаз лад-лад калык пуштрос но зэмос калык вераськон кыл кутэмын. Соин ик тунсыко но дуно со ужъёс
Сергей Матвеев, книгалэн редакторез

Книгалэн тиражез 200 экземпляр. Редакторлэн верамезъя, со гурт калыклы, мӧйы муртъёслы тужгес но тунсыко луоз.

Тодэ вайытом, кемалась ӧвӧл «Удмуртия» книгапоттонниын «Достопримечательности Удмуртской Республики» книга поттӥзы.

Наши партнеры

Наверх
Вниз