Ижкар-2 °C
19 шуркынмон 2019 Пуксён
16+

Удмурт кырӟанъя «Элькуновидение 2019» вожвылъяськонлы кутскон сётӥзы Удмуртиын

  • 1739
  • 0
Ижкар / Удмуртия
Удмурт кырӟанъя «Элькуновидение 2019» вожвылъяськонлы кутскон сётӥзы Удмуртиын
Туспуктэм: vk.com (Элькуновидение)

Удмуртиын «Элькуновидение 2019» улосвылкуспо вожвылъяськонлы кутскон сётӥзы. Со сярысь ивортодэтъя «Удмуртия» агентстволы удмурт кырӟанъя конкурсэз огез радъясь Светлана Пикулева ивортӥз.

Конкурсэ пыриськыны ӧтёнъёс вань ёросъёсы но каръёсы келямын ини. Отысь куриськонъёсты басьтон 30-тӥ куарусёнозь кыстӥськоз. Коньывуон толэзьлэн нырысетӥ шутэтскон нуналъёсаз «Элькуновиденилэн» быръён люкетэз ортчоз. Со пыр потэмъёс асьсэлэсь быгатонлыкъёссэс сцена вылын возьматозы 19-тӥ коньывуонэ
Светлана Пикулева, «Элькуновидение» вожвылъяськонэз огез радъясь

Вожвылъяськонлэн валтӥсь куронъёсыз ӧз воштӥське – «Элькуновидение» котькуд ёросысь яке карысь одӥг гинэ кырӟась яке ансамбль пыриськыны быгатэ. Вожвылъяськонын со ас ёросысьтыз авторъёслэсь кырӟанзэс быдэстыны кулэ. Вормисез быръён кык люкетэн мынэ – концертын но телеэфир дыръя. Котьку сямен вожвылъяськонлэн финалэз 4-тӥ шуркынмонэ «Удмуртия» телеканаллэн меӵак эфираз ортче.

Светлана Пикулевалэн верамезъя, нимлыко куриськонъёс сётэмын ӧвӧл на, но интыосын дасясько ини.

Кияса ёрослэсь данзэ «Элькуновидениын» утьыны дасяське ёросысь калыклы мерлык юрттэт сётонъя центрысь «Чильтэр» нылкышно ансамбль. «Та вожвылъяськонэ пыриськыны мылкыдмы кемалась вал ини, но луонлык сюриз туэ гинэ», - вераз ансамбльлэн кивалтӥсез Любовь Митрянова
Светлана Пикулева, «Элькуновидение» вожвылъяськонэз одӥгез радъясь

Тодэ вайытом, удмурт кырӟанъя «Элькуновидение 2018» вожвылъяськонын сцена вылэ 21 кырӟасьёс но коллективъёс потазы, йылпумъян люкетаз 14 кырӟасьёс шедизы. Конкурсын Дэбес ёросысь Артемий Гаврилов вормиз.

2013-тӥ арысен вожвылъяськонэз «Мынам Удмуртие» телерадиокомпания «Удмурт Кенеш» огазеяськон но Удмуртиысь Лулчеберетъя министерство юрттэмен ортчытэ

Удмурт кырӟанъя «Элькуновидение» вожвылъяськонын вормылӥзы:

  • 2012-тӥ ар — Можга ёросысь «5 Сергейёс» ансамбль;
  • 2013-тӥ ар — Можга карысь «ВиА» дуэт (Влад Андреев но Андрей Конышев);
  • 2014-тӥ ар — Шаркан ёросысь «Тулкым» ансамбль;
  • 2015-тӥ ар — Пичи Пурга ёросысь Андрей Корнилов но Иван Котельников;
  • 2016-тӥ ар – Пичи Пурга ёросысь Игорь Петров но Андрей Байсаров;
  • 2017-тӥ ар – Сарапул ёросысь Павел Смирнов;
  • 2018-тӥ ар – Дэбес ёросысь Артемий Гаврилов.

Наши партнеры

Наверх
Вниз