Ижкар+18 °C
24 гудырикошкон 2019 Кӧснунал
16+

Выль емышъёсты вӧсязы «Виль» шулдыръяськонын Ижкарын

  • 403
  • 0
Ижкар / Удмуртия
Выль емышъёсты вӧсязы «Виль» шулдыръяськонын Ижкарын
Туспуктэм: Ижкар администрацилэн пресс-службаез

2-тӥ гудырикошконэ Ижкарысь Кызьпу арамаын удмуртъёслэн «Виль» шулдыръяськонзы ортчиз. Вашкала йылолъя отын выль емышъёсты, ӝукез вӧсязы. Со сярысь Ижкарысь администрацилэн пресс-службаез ивортэ.

Арысь аре шулдыръяськонэ Удмуртилэн шоркарысьтыз удмурт азьветлӥсьёс но элькунысьтымы бускель каръёсысь но ёросъёсысь куноос люкасько. Удмуртъёсты ӟечкыланы мукет йӧскалык огазеяськонъёсысь ыстэм муртъёс но вуо.

Туэ куазь умой ӧй вал ке но, ужрадэ сюрслэсь ятыр адями пыриськиз. Соосты Удмуртиысь лулчеберетъя но туризмъя министр Владимир Соловьёв, Ижкар думалэн тӧроез Олег Гарин, «Удмурт Кенеш» огазеяськонлэн тӧроез Татьяна Ишматова но Индустри ёрос администрацилэн тӧроез Любовь Зайцева ӟечкылазы

Шулдыръяськонэз сӥё-дано усьтэмлэсь азьвыл ужрадэ пыриськисьёс калыклэсь будэтэм емышъёссэ дунъязы. Нош собере выль кеньырлэсь ӝукез но выль емышез вӧсян ужрадэ пыриськизы.

Куноосты паркысь бадӟым сцена вылын Ижкарысь но Удмуртиысь творчествоя йӧскалык коллективъёс шулдыртӥзы. Вань мылкыд карисьёс нерге ӝукез веръязы. Спонсоръёс юрттэмен туэ 400 литр пала ӝук пӧзьтӥзы.

«Виль» шулдыръяськонэ тодмо удмурт кылбурчи, кырӟась, крезьгурась Богдан Анфиногенов но вуылӥз.

Праздник чебер, но татын егитъёслы ужрадъёс, Герберен ӵошатыса, уггес тырмо. Удмурт егитъёсты мыло-кыдогес кысконо, соослэсь быгатонлыкъёссэс кутоно. Но туж умой таӵе шулдыръяськонъёс вань шуыса: татын, карын, трос удмурт вераськисьёсты кылыны, анай кылын вераськыны луэ
Богдан Анфиногенов, удмурт кылбурчи, кырӟась, крезьгурась

Шулдыръяськонэз Ижкарысь Индустри ёрос администрацилэн юрттэмез улсын «Удмурт Кенеш» огазеяськонлэн Ленин ёросысь ёзэтэз но Алнаш бӧляк радъязы.

ВАТСАН

«Виль» - выль емышлы сӥзем гурт возёс но вӧсь шулдыръяськон. Удмурт калыклэн со огез тужгес яратоно шулдыръяськонэз луэ. Сяме пыремъя, та нуналэ пӧраны выль емышъёсты кутылӥзы но выль изэм пызьлэсь нянь пыжылӥзы. Кузёос бусыысь ӟег но йыды шепъёс вайылӥзы но вӧсяллязы. Нош йылолъёсты быдэстэм бере ваньзы ик шулдыръяськыны люкаськылӥзы

Наши партнеры

Наверх
Вниз