Ижкар+18 °C
24 гудырикошкон 2019 Кӧснунал
16+

«Мултан ярмарка» ортчоз Кизнер ёросын 24-тӥ гудырикошконэ

  • 482
  • 0
Короленко / Удмуртия
«Мултан ярмарка» ортчоз Кизнер ёросын 24-тӥ гудырикошконэ
Туспуктэм: Руслан Нуриахметов

24-тӥ гудырикошконэ Кизнер ёросысь Вуж Мултан черкогуртын (Короленко) «Мултан ярмарка» ортчоз. Со сярысь ёросысь «Зори Кизнера» лулчеберетъя дворецлэн «ВКонтакте» мерлыко вотэсысь огиназ ивортэмын.

Ярмаркае пыриськыны Кизнер ёросысь, Удмуртиысь, бускель улосвылъёсысь куноосты, гурт возёс вузъёс поттӥсьёсты, кибашлыосты, сад-бакчаосазы емыш будэтӥсьёсты, историен, шаертодонэн тунсыкъяськисьёсты, суредасьёсты, паломникъёсты но инкуазьын шутэтскыны мылкыд карисьёсты ӧтё

Радъясьёс ярмаркае пыриськисьёслы вузкарыны инты, ӝӧкъёс висъялозы шуыса оскыто. Со сяна, ас ужан арбериоссэс но яралоз пуктыны.

«Мултан ярмарка» улсын гурт муниципал кылдытэтъёс, огазеяськонъёс, предприятиос, ужбергатӥсьёс но огшоры адямиос куспын пӧртэм вожвылъяськонъёс ортчозы.

Калык понна шулдыръяськонъёс, концерт, эктонъёс радъяськозы.

Ужрад адямилэсь черкен кусыпъёссэ юнматыса черкогуртлэн историяя кылёсбурезлы, сямъёсызлы саклык висъян, «Медовый Спас» но «Яблочный Спас» черк шулдыръяськонъёс пыр лулчеберетъя сямъёсты улӟытон, гурт возёс, киуж вузъёсты поттонэз азинтон, ёросъёслэсь но улосвылъёслэсь кусыпъёссэс юнматон понна радъяське. «Мултан ярмаркалэн» пусэз визьлыкез, удалтонлыкез, ужез гажанэз, ӝикытлыкез но чылкытлыкез возьматӥсь Муш мумы луэ.

Ярмарка 9 часын Успенско-Богородицкой черкын вӧсяськонэн кутскоз. 

ВАТСАН

Короленко черкогуртлэн историез XVI даурын кутскиз. Соку со Вуж Мултан нимаськиз. Со вакытэ отын пӧртэм бадӟым ярмаркаос ортчылӥзы, вань волостьёсысь купечьёс люкаськылӥзы но вузкарон интыоссэс усьязы. Ӵапак татын XIX даур пумын «Мултан уж» ортчиз. Соку, 1892-тӥ арын, гуртын улӥсь дас муртэ адямиез адямиез курбон сётӥллям шуыса янгыше уськытӥзы. Ужъя куинь суд ортчиз, вань янгыше уськытэмъёсты мозмытӥзы. Судын соос понна тодмо ӟуч гожъяськись Владимир Короленко дурбасьтӥз. Соин ик 1939-тӥ арын черкогуртлы Короленко ним сётӥзы

Тодэ вайытом, 17-тӥ гудырикошконэ Удмуртиысь «Лудорвай» музей заповедникын Гурт лулчеберетъя «ГуртFEST» IV калыккуспо фестиваль но Чечы спас ортчоз.

Наши партнеры

Наверх
Вниз