Ижкар+5 °C
21 куарусён 2019 Кӧснунал
16+

Кылбурчилы Семён Перевощиковлы сӥзем адӟытон усьтӥзы Ижкарын

  • 825
  • 0
Ижкар / Удмуртия
Кылбурчилы Семён Перевощиковлы сӥзем адӟытон усьтӥзы Ижкарын
Туспуктэм: minkultura.udmurt.ru

Ижкарысь Пиналъёслы но егитъёслы элькун лыдӟетъюртысь шаертодонъя но йӧскалык литературая ёзэтын удмурт кылбурчилы, журналистлы но берыктӥсьлы Семён Перевощиковлы сӥзем адӟытон усьтӥзы, туэ 30-тӥ гудырикошконэ солы 90 арес тырмысал. Со сярысь Удмуртиысь лулчеберетъя министерстволэн пресс-службаез ивортэ.

Адӟытонын кылбурчилэн улонэз но творчествоез сярысь материалъёс, солэн ужъёсыз возьматэмын.

Семён Перевощиковлэн нырысетӥ бичетэз («Вуюись») 1962-тӥ арын потӥз. Солэн кылбуръёсыз газет-журналъёсын но пӧртэм бичетъёсын печатласькизы, со пӧлын огъяросси изданиосын. Тросэз кылбуръёсыз ас шаерзэ, калыксэ гажан мылкыдын пыӵамын.

ВАТСАН

Семён Андреевич Перевощиков вордскиз Эгра ёросысь Шыкмен (Нязь-Ворцы) гуртын 30-тӥ гудырикошконэ 1929-тӥ арын. Педагогикая удмурт кун институтын (туала УдГУ) кылъя но литературая факультетын дышетскиз. Вить кылбур бичетъёсыз потӥзы. Удмурт кылэз Александр Пушкинлэсь, Николай Некрасовлэсь, Афанасий Фетлэсь, Фёдор Тютчевлэсь, Александр Блоклэсь, Сергей Есенинлэсь но мукетъёсызлэсь, озьы ик Удмуртиысь ӟуч кылын гожъясьёслэсь кылбуръёссэс берыктӥз. Аслаз ужъёсыз пор, коми, чуваш, бигер, кабардин но мукет кылъёсы берыктэмын. Семён Перевощиков Россиысь гожъясьёслэн огазеяськонзылэн ёзчиез, Удмуртиысь лулчеберет удысысь дано ужась, Флор Васильев нимо премилэн лауреатэз, ужъя фронтысь ветеран.

Тодэ вайытом, Ижкарысь Туризмъя но киужъёсъя элькун центрын удмурт калык крезьгуро арбериосын «Куаралэн шоканэ» адӟытон ужа.

Наши партнеры

Наверх
Вниз