Ижкар+5 °C
21 куарусён 2019 Кӧснунал
16+

Ижкарын витетӥзэ ини «Выжы-выжы-выжыкыл» нылпи элькун фестиваль ортчиз

  • 690
  • 0
Ижкар / Удмуртия
Ижкарын витетӥзэ ини «Выжы-выжы-выжыкыл» нылпи элькун фестиваль ортчиз
Туспуктэм: Анжелика Тихонова

Туннэ, 27-тӥ гудырикошконэ, Ижкарысь Калыкъёслэн эшъяськон юртазы «Выжы-выжы-выжыкыл» V нылпи элькун фестивальлэн йылпумъян люкетэз ортчиз. Ужрадэ иворъёсъя «Удмуртия» агентстволэн корреспондентэз но вуылӥз.

Фестивальлэн йылпумъян люкетаз укмыс нылпи садъёс пыриськизы: тямысэз Ижкарысь но одӥгез Пичи Пургаысь. Туэ пиналъёс Удмуртиын улӥсь калыкъёслэсь выжыкылъёссэс возьматӥзы.

Ужрадэз радъясьлэн, «Удмурт нылкышно кенеш» огазеяськонлэн тӧроезлэн Надежда Степановалэн верамезъя, пиналъёс удмурт выжыкылъёсты сяна, удмурт кылын армян, еврей, таджик, ӟуч выжыкылъёсты но дасязы.

Нырысь ик, соос валало, удмурт кыл - со бабушъёслэн гинэ кылзы ӧвӧл, сое тани сцена вылэ поттыны луэ шуыса. Кыкетӥез, соос валало, татын асьмелэн удмуртъёс, ӟучъёс сяна, мукет калыкъёс но уло шуыса
Надежда Степанова, «Удмурт нылкышно кенеш» огазеяськонлэн тӧроез

Озьы соос пичи дырысен ик пӧртэм калыкъёслэсь лулчеберетъёссэс гажаны дышо, пусъе кивалтӥсь.

«Выжы-выжы-выжыкыл» V нылпи элькун фестиваль

7 фото

Пӧртэм калыкъёслэсь выжыкылъёссэс троссэ удмурт кылэ асьсэос визьнодасьёс берыктӥллям, угось, Надежда Степановалэн кылъёсызъя, дась выжыкылъёс, эшшо ик театрализация лэсьтыны, ӵемысь уг сюро. Озьы ке но, тыршо, лэсьто, пиналъёсты дышето.

Та пиналъёс сярысь вераны уг луы, соос дышето удмурт кылэз шуыса, малы ке шуоно тани Ижкарез ке басьтоно, татын кылэз али 112-тӥ нылпи сад гинэ дышетэ на удмурт кыл кадь, кылэз группаын дышето. Мукетъёсызлэн кытын ке кружок вань, кудӥз ке чылкак тани нырысьсэ пыриське та фестивальлы луыса
Надежда Степанова, «Удмурт нылкышно кенеш» огазеяськонлэн тӧроез

Котьма ке но, пиналъёс выжыкылъёсты пуктыны туж ӝог дышо, шумпотыса ужрадэ пырисько. Со сярысь 112 номеро нылпи садысь визьнодась Галина Корняева но вера. Соос та фестивале кутскем дырысеныз, вить арзэ ик пырисько ини.

Пиналъёс вожмаськыса пырисько выжыкыл пуктонэ. Котькуд удмурт ужрад ортчытӥськом ке, соос кутӥсько со борды. Шумпотыса кутӥсько. Вожмаськыса кутӥсько. Мылкыдзы вань, малы ке шуоно соос занятиосы ветло, словарный запассы вань ини, валало
Галина Корняева, Ижкарысь 112 номеро нылпи садысь визьнодась

Солэн кылъёсызъя, нылпи садазы пиналъёсты удмурт кыллы дышетыны ньыль аресысен, шор группаысен, кутско.

Нырысь кутскыкумы малпазы вал шуг, кыӵе ке но акцент басьтозы шуыса. Али туж шумпотыса анай-атайёс ваё пиналъёссэс. Котькуд пинал, ньыль арес тырме ке, шор группа, соос дышетыны кутско быдэс группаен удмурт кылэз. Соос валаса но уг вуттыло, шудыса-шудыса… <…> Соос трос пословицаос, поговоркаос тодо, выжыкылъёсты тодо
Галина Корняева, Ижкарысь 112 номеро нылпи садысь визьнодась

Визьнодасьлэн верамезъя, нылпи садазы нырысь ик пиналлэсь куаразэ пуктон бордын бадӟым уж нуо. Собере соосты, кинлэн куараез умой пуксиз, спектакле шудыны басьто ини. Озьы арысь аре ужрадэ выль пиналъёс пырисько.

Малпасько туж бадӟым пайдалыкез фестивальлэн. Пиналъёс школае мыныса быгато ини асьсэзыз сцена вылын, доска азьын возьыны. Сыӵе отзывъёс но вуылӥзы ини, 112-тӥ нылпи садысь школае мынӥсьёс висъясько шуыса, соослэн котьку киоссы ӝутэмын, шуо милемлы, соос курисько доска доры, кудӥз пинал кышкатске кадь, нош та пиналъёс усьтылэмын
Галина Корняева, Ижкарысь 112 номеро нылпи садысь визьнодась

Фестивале Пичи Пургаысь Олеся Петровалэн нылыз но пыриськиз. Нылаш удмурт но, ӟуч но кылын шугъяськытэк вераське. Уго, анаезлэн верамезъя, семья куспазы соос кык кылын верасько.

Мон бадӟыменыз нылыным Ижын улӥ, но мыным весь шуо вал: «Малы тон удмурт сямен вераськиськод нылыныд?». Мон шуисько вал: «Малы бон удмурт сямен мон ум вераськы?». Садике мыноз, школае мыноз, ӟуч кылын вераськоно луоз шуылӥзы. Нош мон шуисько, нырысь удмурт кыллы мед дышоз, анай-атай кыӵе кылын вераське, собере ини вераськыны кутскоз ӟуч кылын но, кунгожсьӧр кылын но капчигес луоз
Олеся Петрова, фестивале пыриськем нылпилэн анаез

Удмурт анайлэн малпанэныз ӟуч анай Елена Плотникова но соглаш луэ. Солэн верамезъя, со ачиз удмурт, но удмурт сямен уг вераськы ни, вала гинэ. Таӵе ужрадэ нылыз нырысьсэ пыриське.

Пичи нылпи удмурт сямен вераськемез кылыса, валаны тырше, мар сярысь со. Нош удмурт кылын выжыкыллэн сузьетэз валамон, адями – ӟуч нылпи - вала, мар сцена вылын пуктӥське. Нош куке пельын но, синмын но иворез пыӵатӥськод, нылпи кылъёсты тодаз кельтэ. Лулчеберетэз но. Со вала, анай-атайёсызлэсь юа удмурт кыл сярысь. Историе мургес пыре. Таӵе ужрадъёс туж кулэ
Елена Плотникова, фестивале пыриськем нылпилэн анаез

Ватсалом, «Выжы-выжы-выжыкыл» V нылпи элькун фестивалез «Удмурт нылкышно кенеш» огазеяськон Удмуртиысь Йӧскалык политикая министерство юрттэмен ортчытӥз. 

Тодэ вайытом, туэ фестивальлэн быръён люкетаз 15 нылпи садъёс пыриськизы

Наши партнеры

Наверх
Вниз