Ижкар+5 °C
21 куарусён 2019 Кӧснунал
16+

Губилы сӥзем «Губи-fest» улосвылкуспо фестиваль ортчоз Удмуртиысь Яр ёросын

  • 613
  • 0
Яр / Удмуртия
Губилы сӥзем «Губи-fest» улосвылкуспо фестиваль ортчоз Удмуртиысь Яр ёросын
Туспуктэм: vk.com (Грибной фестиваль «Губи-Fest»)

14-тӥ куарусёнэ Удмуртиысь Яр ёросын «Губи-fest» улосвылкуспо фестиваль ортчоз. Куноосты лулчеберетъя но сиён-юонъёсын аспӧртэм программа возьма. Со сярысь улосвылысьтымы тӧролэн но кивалтэтлэн пресс-службазы ивортэ.

Удмуртиысь ёросъёслэн но Россиысь улосвылъёслэн азбаръёсазы пӧртэм-пӧртэм губиосты веръяны луоз: сылалтэм, пырсатэм-парем, пыжиськеме понэм, шыдын пӧзьтэм. Озьы ик губиен пӧранъя выль, аспӧртэм рецептъёсты тодыны, мастер-классъёсы пыриськыны луоз.

Фестивальлэн кивалтӥсьёсыз Учка батырлэн выжыысьтыз воргоронъёс луозы. Вашкала мадьверосъя, Учкакарлэн кылдытӥсез Учка батыр Яр музъем вылысь быронтэм губиё интыосты усьтӥз. Солэн туала выжыосыз, губияны юн яратӥсь «яггуби-воргоронъёс» но «пинал чургубиос – эшлыко пиналъёс» фестивалез «воргорон тусо» карозы: соос кураторъёс, волонтёръёс, площадкаосты нуисьёс луозы. Озьы ик пиосмуртъёс кужымез возьматон вожвылъяськонъёсы пыриськозы

Фестиваль 9 часын «Губи шествие» бордысен кутскоз. Колонналэн йыраз 2018-тӥ арлэн валтӥсь губиез мыноз. Сӥё-дано усьтон бере валтӥсь сцена вылын воргоронъёслэн творчествоя коллективъёссылэн но нимаз быдэсъясьёслэн «Азвесь губи зор» элькун фестиваль-вожвылъяськонзы кутскоз. Бӧрысь серемес мадёнъёсъя «Губиё мадёнъёс» усьтэм улосвылкуспо фестиваль-вожвылъяськон кутскоз.

Ас ужъёссэс калык киужъя кибашлыос возьматозы. Вань мылкыд карисьёс творчествоя площадкаосы пыриськыны, «губи» синпельёс, губияны кулэ луись арбериос басьтыны быгатозы. Ваньмыз со «Губиё Яре, базаре» вузкарон интыын луоз.

Фестиваль улсын пиналъёслы «Пиналъёс – пичи губиос» площадка но ужалоз. Машалэн но Гондырлэн возьвылазы нылпиослы но анай-атайёссылы мунё спектакль возьматозы, губи адӟытон, «Чудо Ручки» мастер-классъёс радъялозы, «Детские забавы» интерактивной площадка ужалоз.

Губияны яратӥсьёс «Нюлэскы губияны» вожвылъяськонэ пыриськыны быгатозы.

ВАТСАН

Нырысьсэ «Губи fest» фестиваль 2017-тӥ арын ортчиз но ёроскуспо инлык нуллӥз. Ужрадэ Удмуртиысь Юкаменск, Глаз, Балезино ёросъёс, озьы ик Киров улосвылысь Фалёнки ёрос пыриськизы. Соку ужрадэ сюрс куноос люкаськизы. 2018-тӥ арын куарусёнэ «Губи fest» элькун инлыкен ортчиз ини, соку ужрадэ 3 сюрс адями вуиз. Губиян сямъёсынызы Удмуртиысь но Киров улосвылысь 8 ёросъёс тодматӥзы. Калыкез фольклоръя но эктонъя «Айкай» театр но Воткаысь ӟуч калык кырӟанъя «Забава» ансамбль шулдыртӥзы. Соку ик праздниклэсь Валтӥсь губизэ бырйизы, вормисе Тӧдьы губи потӥз

Тодэ вайытом, гудырикошконэ Ярын «Губи-fest» фестиваль улсын губилэсь пӧрамъёсъя «Песянайёслэн рецептъёсыз» ёрос вожвылъяськон ортчытӥзы.

Наши партнеры

Наверх
Вниз