Ижкар+5 °C
21 куарусён 2019 Кӧснунал
16+

Удмурт йӧскалык театрысь артист Никита Михалковлэн академияз дышетскоз

  • 578
  • 0
Москва / Россия
Удмурт йӧскалык театрысь артист Никита Михалковлэн академияз дышетскоз
Туспуктэм: vk.com (1900-й. Легенда о пианисте. Ижевск)

Удмуртиысь Йӧскалык театрысь артист Максим Григорьев Никита Михалковлэн кинематографияя но театр искусствоя академияз актёрлэн мастерскояз дышетскыны вань быръёнъёсты ортчиз. Кызьы вераз со ивортодэтъя «Удмуртия» агентстволы, дышетсконэз 9-тӥ куартолэзе кутскоз.

Дышетскон луоз очно одӥг ар - 9-тӥ куарусёнысен шуизы 30-тӥ инвожоозь. Милемын ӵош пыризы режиссёръёс но продюсеръёс. Режиссёръёслэн асьсэ ужъёссы луозы, ми соослэн ужъёсазы пыриськыны кулэ. Эшшо пумаз луоз на ай, мон валамъя, одӥг выпускной спектакль
Максим Григорьев, Никита Михалковлэн кинематографияя но театр искусствоя академияз кылзӥсь

Тодэ вайытом, куартолэзе Ижкарын Никита Михалковлэн академиезлэн приёмной комиссиез ужаз. Удмуртиысь но бускель улосвылъёсысь вуэм сю пала егитъёс пӧлысь ӧрилэн ёзчиосыз Максим Григорьевез гинэ бырйизы. Быръён люкетъёс озьы ик эшшо кӧня ке каръёсын ортчизы, со сяна, «Таврида - АРТ» фестивальын. 

Улосвыл быръёнъёсты ортчемъёсты Москваын учкизы на. Академиын дышетскыны мылкыд карисьёс кылбуръёс, кырӟанъёс, басняос возьматӥзы.

Актёрлэн ужезъя заданиос сётъязы, импровизация, коллективен, группаен ужан, кызьы огнад импровизация лэсьтыны быгатӥськод. Оглом, йырысен пыдозь учкизы!
Максим Григорьев, Никита Михалковлэн кинематографияя но театр искусствоя академияз кылзӥсь

Собере йылпумъян люкетаз 25 адямиез ачиз Никита Михалков учкиз ни.

Ог 15 минут со учкиз, дугдытъятэк кылзӥз - проза ке, быдэс прозаез, кылбур ке, быдэс кылбурез вераськод. Со сяна, заданиос сётӥзы на. Озьы 25 пӧлысь 13 адямиез гинэ бырйизы
Максим Григорьев, Никита Михалковлэн кинематографияя но театр искусствоя академияз кылзӥсь

Максим Григорьевлэн верамезъя, академие бырйизы со адямиосты гинэ, кинлэн театр удысъя вылӥ дышетскемез вань ни. Со сяна, театрын яке киноын ужам опыт одно ик луыны кулэ.

Москваысь, Санкт-Петербургысь трос егитъёс. Ваньзы театръёсын ужало, мон сямен ик. Али мынозы асьсэ театръёсазы, ужзэс радъялозы. Мон но али Ижкаре берто, пиослы юрттоно луоз ас интыям кинэ ке но пыртыны (спектакльёсы - ред.)
Максим Григорьев, Никита Михалковлэн кинематографияя но театр искусствоя академияз кылзӥсь

Озьыен, выль театр сезонын Максим Григорьевез Ижкарысь сцена вылысь ум адӟе. Удмуртиысь Йӧскалык театрын со кӧня ке спектакльёсын шудэ вал. Со пӧлын «Отцы и дети» (Базаров), «Горе от ума» (Чацкий), «Мултан уж» (прокурор Раевский). Со сяна, кылем арын сӥзьыл «1900-й. Легенда о пианисте» моноспектакльзэ учкисьёслы возьматӥз.

Никита Михалковлэн кинематографияя но театр искусствоя академиез ӧнеръя быгатонлыкъёсты будэтон но кино но театр удысын выль тодон-валанъёс сётэ. 2019-2020 дышетскон арлы академие актёрлэн мастерскояз 13 адямиез кутӥзы (вожвылъяськон одӥг интые 11,5 адями вал), режиссёрлэн – 5 адямиез, продюсерлэн – 6 адямиез. Оглом Россиысь 30-лэсь трос каръёсысь 400-лэсь ятыр куриськонъёс вуизы вал. Академиын Россиысь но кунгож сьӧрысь кино но театр удысысь тодмо адямиос дышето. Актёрлэн мастерскояз егитъёсын Никита Михалков, Эмир Кустурица, Александр Балуев, Светлана Дружинина, Ирина Мирошниченко, Сергей Землянский но мукетъёсыз ужалозы. 

Наши партнеры

Наверх
Вниз