Ижкар+5 °C
21 куарусён 2019 Кӧснунал
16+

Егитъёслэн «Юмок» удмурт театразы кастинг ортчоз Ижкарын

  • 461
  • 0
Ижкар / Удмуртия
Егитъёслэн «Юмок» удмурт театразы кастинг ортчоз Ижкарын
Туспуктэм: vk.com (ЮМОК_театр)

17-тӥ куарусёнэ Ижкарысь «Арт-резиденциын» егитъёслэн «Юмок» удмурт театразы кастинг ортчоз. Со сярысь ивортодэтъя «Удмуртия» агентстволэн корреспондентэзлы театрлэн кивалтӥсез, «Арт-резиденциысь» егитъёсын ужанъя ӧнерчи, удмурт проектъёсъя куратор Дарали Лели вераз. 

Быръёнъёсы 30 аресозь ужась егитъёсты, студентъёсты, бадӟым классъёсын дышетскисьёсты, возьмало. 

Мынам ӧвӧл кыӵе ке чурыт куронъёсы. Нырысь ик ужаны, пыриськыны, репетициосы ветлыны мылкыд мед луоз, удмурт кылын вераськыны ӟеч мед быгатозы. Со мон понна одӥгез валтӥсез
Дарали Лели, «Юмок» театрлэн кивалтӥсез

Озьы ик кастинге кырӟась нылъёсты но возьмало. Кивалтӥсьлэн верамезъя, театр кырӟанэн герӟаськем спектакль бордын ужалоз. Соин ик фольклорен вырись, калык кырӟанъёсты быдэсъясь, ансамбльёсы пыриськись нылъёслы туж шумпотозы. Со сяна, крезьгурасьёсты но кутозы, уго азьланяз спектакльёслэсь крезьгуро люкетсэс улэп карыны малпало. 

Нырысь ик милям читка куарусёнэ луоз. Со Василий Логиновлэн Сальвадор Далилэн улонэз сярысь «Голубятня» пьесаез. <…> Солэн яратонэз - Гала - вал Казаньысь, Казаньын дышетскемын. Вань сыӵе мадькыл, со удмурт шуыса. Соин ми со пьесаез бырйим. <…> Со пьесаын (со ӟуч кылын луоз читка, ми лыдӟом гинэ сое) вань удмурт кылъёсыз. Удмурт веранъёс
Дарали Лели, «Юмок» театрлэн кивалтӥсез

Озьы ик туэ «Юмок» театрысь артистъёс эстон авторлэсь Андрус Кивиряхклэсь «Чагыр вагон» пьесазэ пуктозы. Нош вуоно арын Удмуртилэн кунлыкезлы 100 ар тырмонлы «Удмуртлык. 100 ар» спектакль дасялозы. 

Ми дасяськом сыӵе бадӟым спектакль. Вуоно арын гинэ сое возьматом быдэсак. Со сӥземын Удмуртилэн кунлыкезлы 100 ар тырмонлы. <…> ХХ-тӥ даурлэн кутсконысеныз, 20-тӥ аръёс бордысен кутскыса, но туннэ нуналозь удмурт литератураысь текстъёсты басьтыса. Сыӵе фольклорен но герӟаськем, туала но кыӵе ке но
Дарали Лели, «Юмок» театрлэн кивалтӥсез

Кастинге пыриськон понна 19 часлы «Арт-резиденцилэн» юртаз лыктоно но удмурт кылын кылбур, верос, сценка (оген яке тросгес муртэн) яке мукет мар ке верано. 

Удмурт егитъёсын ужаны луонлык сётэмзы понна Дарали Лели нимысьтыз тау каре «Арт-резиденцилэн» кивалтэтэзлы. Солэн кылъёсызъя, соос ужаны инъет но, озьы ик видео, туспуктэм лэсьтыны луонлык но сёто. 

Тодэ вайытом, Ижкарысь Егитъёслэн ивортодэтъя но ресурсъя центрзылэн (МИРЦ) «Арт-резиденция» ужъюртаз «Юмок» удмурт театр туэ южтолэзе кылдытӥзы. Али отчы 20 адями пыриське. 

Наши партнеры

Наверх
Вниз