Ижкар+5 °C
21 куарусён 2019 Кӧснунал
16+

Песятайёс понна йӧскалыккуспо вожвылъяськон ортчыто Можгаын

  • 498
  • 0
Можга / Удмуртия
Песятайёс понна йӧскалыккуспо вожвылъяськон ортчыто Можгаын
Туспуктэм: Григорий Фомин

13-тӥ коньывуонэ Можгаысь «Октябрь» лулчеберет юртын «Этнопесятай» («Этнодедушка») йӧскалыккуспо усьтэм вожвылъяськон ортчоз. Со сярысь ивортодэтъя «Удмуртия» агентстволэн корреспондентэзлы ужъюртысь методист, ужрадэз радъясь Эльвира Шишкова вераз.

Вожвылъяськонэ Можга карысь, ёросысь пӧртэм выжы калыкъёсысь потэм 50 аресысен воргоронъёсты возьмало.

Нырысь ик котькуд йӧслык мед пыриськоз шуыса возьмаськом. Можгаын трос йӧслыкъёс уло. 40-лэсь уно. Соин ик адӟеммы потэ вал олокыӵе но песятайёсты. <…> Кылем арын «Этнобабушка» вожвылъяськонэ пор, чуваш, бигер песянайёс пыриськизы, удмуртъёс трос вал
Эльвира Шишкова, «Октябрь» лулчеберет юртысь методист

Песятайёслы пӧртэм тунсыко, аспӧртэм ужъёс сётозы, визьзэс сыналозы, кибашлы луэмзэс эскерозы. Вормись «Этнодедушка» ним басьтоз, нош мукетъёссэ нимаз номинациосъя пусъёзы.

Вожвылъяськонэ пыриськыны куриськонъёсты 27-тӥ куарусёнозь dkok8@yandex.ru электрон почтае сётыны луэ

Ужрад Удмуртиысь калыкъёслэсь йӧскалык лулчеберетсэс утён но азинтон, Можга карын но ёросын улӥсь йӧслыкъёслэсь сямъёссэс вӧлмытон, пӧртэм калыкъёс куспын ог-огез гажан мылкыд пыӵатон, мӧйыосты огазеян понна радъяське.

Вожвылъяськонэз Можга кар администрациысь физкультурая, спортъя но егитъёсын ужан политикая управление юрттэм улсын «Октябрь» лулчеберет юрт ортчытэ.

Тодэ вайытом, туэ толсуре Ижкарын пӧртэм йӧслыкъёсысь воргоронъёс пӧлын «2019-тӥ арлэн песятаез» вожвылъяськон ортчоз.  

Наши партнеры

Наверх
Вниз