Ижкар+22 °C
11 -тӥ пӧсьтолэзь 2020 Кӧснунал
16+

Удмурт кылын «Маугли» мультфильмез адӟыны луоз матысь дыре интернет вотэсысь

  • 653
  • 0
Ижкар / Удмуртия
Удмурт кылын «Маугли» мультфильмез адӟыны луоз матысь дыре интернет вотэсысь
Туспуктэм: скриншот

Матысь дыре интернет вотэсысь совето вакытэ удмурт кылэ берыктэм «Маугли» мультфильмез адӟыны луоз. Со сярысь ивортодэтъя «Удмуртия» агентстволэн корреспондентэзлы Удмуртиысь Калыкъёслэн эшъяськон юртысьтызы методист, кылбурчи Богдан Анфиногенов вераз.

Шедиз со «Avito»-ысь. Мон утчасько вал, дышем сямен ини, «удмуртский язык» кылъёсъя поискысь мае ке но, мар шедёз шуыса. И сюриз ялон киноплёнкаосын. Сое усьтыса, адӟи, отын пӧртэм плёнкаос пӧлын вань «Маугли» и капслокен гожтэмын «ВНИМАНИЕ: УДМУРТСКИЙ ЯЗЫК!!!»
Богдан Анфиногенов, Удмуртиысь Калыкъёслэн эшъяськон юртысьтызы методист

Со совето вакытэ удмурт кылэ берыктэм мультфильмен плёнка шуыса валаса, Богдан Анфиногенов ялонэз интыям муртэн герӟаськем но оцифровка лэсьтон пумысен вераськем. Тунсыко, но со адямилы удмурт кылын плёнкаез кужмысь сямен донгиллям, солы ӟучьёсыз гинэ кулэ вылэм.  

Мон вузаськисьлы верай, со быдэс удмурт калык понна бадӟым шедьтос, раритет но эшшо мар ке шедиз ке удмурт кылын, мон басьто шуыса.
Богдан Анфиногенов, Удмуртиысь Калыкъёслэн эшъяськон юртысьтызы методист

Богдан Анфиногеновлэн кылъёсызъя, удмурт кылэ берыктэм фильмъёслэсь али кытын возиськемзэс но тодыны уг луы, нош совето вакытэ удмурт кылэ 200-лэсь трос ужъёс берыктэмын вал. Кылсярысь, «Любовь и голуби» фильм. Ваньзэ сое удмурт театрысь артистъёсын ӧнерлыко тӥрлык вылын гожтӥзы. Ужез быдэстон понна трос коньдон висъязы.

И вот сыӵе шудо учыр пӧрмиз - шедиз одӥгез коть плёнка. Кызьы вузаськись вераз, со быдэсак полнометражной фильм, озьыен вань сериосыз «Мауглилэн» отын. Али возьмасько, ку со сое оцифровать кароз
Богдан Анфиногенов, Удмуртиысь Калыкъёслэн эшъяськон юртысьтызы методист

Мультфильмез оцифровать карон понна 3 сюрс манет кулэ вал. Соку Богдан Анфиногенов «ВКонтакте» мерлыко вотэсысь бамаз коньдон бичан пумысен вазиськон гожтӥз, но со нуналэ ик Александр Ожмеков нимо воргорон вань кулэ коньдонэз келяз. Со сяна но трос гинэ мукет юаськисьёс, юрттыны дась луисьёс вал.

Вазиськеме потэ вань адямиослы, кинлэн, оло, вань кыӵе ке тунсыко видеофайлъёссы удмурт кылын: ивортэ, поттэлэ вал соосты интернетэ, угось со туж дуно материалъёс, адямиос шумпотозы гинэ, удмурт кылын тросгес мед таӵе материалъёс луозы!
Богдан Анфиногенов, Удмуртиысь Калыкъёслэн эшъяськон юртысьтызы методист

Богдан Анфиногеновлэн верамезъя, цифра амалэ выжтэм мультфильм коньывуонэ дась луыны кулэ ини. Бӧрысь со сое интернет вотэсэ поттоз но, вань мылкыд карисьёс «Маугли» мультфильмез удмурт кылын  адӟыны быгатозы. 

Тодэ вайытом, 2019-тӥ ар кутсконын удмурт егитъёслэн «Шунды» огазеяськонзы кык коркакузёос – Боко но Моко – сярысь выль удмурт мультфильмъёс поттӥз.



Наверх
Вниз