100 лет государственности Удмуртии
Ижкар+10 °C
25 -тӥ куартолэзь 2020 Вордӥськон
16+

Геннадий Красильниковлэн музей-квартираезлы 30 ар тырмонэз пусйизы Ижкарын

  • 900
  • 0
Ижкар / Удмуртия
Геннадий Красильниковлэн музей-квартираезлы 30 ар тырмонэз пусйизы Ижкарын
Туспуктэм: Анжелика Тихонова

Удмуртиысь тодмо удмурт гожъясьлэн Геннадий Красильниковлэн Ижкарысь музей-квартираезлы 30 ар тырмонэз пусйизы. Ужрадэ ивортодэтъя «Удмуртия» агентстволэн корреспондентэз но вуылӥз.

Геннадий Дмитриевичлэн музей-квартираяз трос гинэ тодосчиос, мер ужчиос, гожъясьлэн творчествоеныз но улон сюресэныз тунсыкъяськисьёс люкаськизы. Пӧлазы Удмуртиысь Кун Кенешысь тодосъя, дышетонъя, лулчеберетъя но егитъёсын ужан политикая ялан ужась комиссилэн тӧроез, «Удмурт кенеш» огазеяськонлэн тӧроез Татьяна Ишматова, Кузебай Герд нимо йӧскалык музейлэн кивалтӥсез Александр Волков, суредась Пётр Ёлкин, тодосчиос Светлана Арекеева, Татьяна Зайцева, Александр Шкляев но мукетъёсыз вал.

Геннадий Красильниковлэн музей-квартираяз пумиськон

9 фото
 

Котырес лыдпуслы луыса музей-квартиралы трос гинэ кузьымъёс лэсьтӥзы. Кылсярысь, Удмуртиысь Йӧскалык музейлэн кивалтӥсез телевизор, выль пуконъёс кузьмаз. Нош ваньмызлэсь бадӟым кузьым луиз – Максим Горький нимо ураме учкись вывеска.

Вывеска ми понна туэ тужгес но бадӟым кузьым, малы ке шуоно адямиос даже автобусэн мыныкузы может адӟозы. <…> И ми соин ик тыршим, юбилейлы мед усьтӥськоз со шуыса
Мария Ившина, Геннадий Красильниковлэн музей-квартираеныз кивалтӥсь, кылосбур тодосъя кандидат

Пумиськонэ люкаськемъёс Геннадий Красильниковез, солэсь ужъёссэ, квартираяз музей усьтон вакытэз тодазы вайизы. 1984-1995 аръёсы Удмуртиысь лулчеберетъя министерствоен кивалтэм Анэтта Сидорова музей-квартираез кылдытон аръёсы гожъяськисьёслэн огазеяськонэнызы матысь кусыпъёс возьыса ужамзы сярысь мадиз.

Ӝытазе Самсонов Семён Александровичен мынам кабинетам пумиськылӥм но кызьы огазьын ужаны малпаськылӥм. Милям ӵош ужан радлыкмы вал. Соя ик ми ужам. <…> Озьы ми Геннадий Дмитриевич Красильниковлэсь музейзэ усьтыны ужпум пуктӥм. Нош усьтыны сое нокытын. Милемлы тани та квартираез лулчеберетъя министерствое басьтыны кулэ вал, нош конкретно - элькун музее. Мон туж шумпотӥсько милемыз валазы шуыса. Милемлы сётӥзы та квартираез. Но со интые куинь квартира сётыны кулэ вал. Валаськоды-а кыӵе со вакытэ со шуг вал?
Анэтта Сидорова, 1984-1995 аръёсы Удмуртиысь лулчеберетъя министр

Озьы ке но, ужзы пӧрмиз. Карлэн кивалтэтэз юрттэт сётӥз. Семьялы куинь квартира висъязы. Анэтта Сидоровалэн кылъёсызъя, соос но та ужлы туж шумпотэмын вал.

Соослэн ваньзылэн быдэн квартиразы вал. Тодӥськоды-а, соос туж шумпотэмын вал. Нош ми кык поллы зол шумпотӥм, милям тодмо удмурт писательмылэн музей-квартираез луоз шуыса
Анэтта Сидорова, 1984-1995 аръёсы Удмуртиысь лулчеберетъя министр

Квартираез басьтэм бере, отын музей усьтон бордын ужаны кутскизы. Со вакыт сярысь музейын нырысетӥ экспозициез дасясь но нырысетӥ экскурсиез ортчытӥсь Раиса Мартынова вераз.

Гурезь экспонатъёс вайизы. Кивалтӥсьмы Тамара Алексеевна Шилова монэ со гурезь доры вайиз но шуэ, Раиса Фёдоровна, та ужкагазъёсты, арбериосты туж ӝог эскероно но музей лэсьтоно. Мар карод? Ог вакытэ ми кык музей лэсьтӥмы: Алнашын но татын. Ёзэтамы сизьым адями ужаз. Кӧняез ке отын ужаз. Нош татчы ми кылим – Рубцов Володя, суредась, кивалтӥсьмы Тамара Алексеевна но мон. Лэсьтӥм татчы музей. Йылаз-пумаз вуттӥм
Раиса Мартынова, Геннадий Красильниковлэн музей-квартираяз нырысетӥ экспозиция кылдытон бордын ужась

30 ар ӵоже музей бордын трос гинэ дано адямиос тыршизы. Ваньзы соос ас пытьызэс кельтӥзы.

Татын трос ужасьёс ужамын вал. Фёдор Пукроков тыршиз нырысетӥ арзэ, собере ужазы Надежда Геннадьевна Девятова, Людмила Евгеньевна Уракова, Галина Петровна Блинова, Елена Николаевна Кудрявцева, Оксана Москова. Мон малпасько, котькудӥз кивалтӥсь аслэсьтыз ватсэтсэ понӥз та музей мед азинскоз, мед улоз шуыса
Мария Ившина, Геннадий Красильниковлэн музей-квартираеныз кивалтӥсь, кылосбур тодосъя кандидат

Берло кык ар ӵоже ини Геннадий Красильниковлэн музей-квартираеныз кылосбур тодосъя кандидат Мария Ившина кивалтэ. Ужъюртысь ӧнерчиос ужазы пӧртэм амалъёсты куто. Калыкез бордазы кыскыны тыршо, Геннадий Красильниковлэн творчествоеныз тодмато.

Пӧртэм-пӧртэм адямиосты ӧтиськом:. художникъёсты, писательёсты, психологъёсты, бардъёсты. И котьку, выль адями ӧтиськом ке, со вылэ выль посетитель мынэ. И ми со адями пыр вераськом Красильников сярысь. Озьы мукет быгатонлыко адями пыр Красильниковен тодматӥськом
Мария Ившина, Геннадий Красильниковлэн музей-квартираеныз кивалтӥсь, кылосбур тодосъя кандидат

Ужрадэ вань люкаськемъёсты но нимысьтыз музей-квартираын тыршисьёсты котырес лыдпусэнызы Татьяна Ишматова но ӟечкылаз.

Мон сюлмысьтым ӟечкыласько асьмемыз элькунамы таӵе музеймы вань шуыса, мон ӟечкыласько адямиосты, кин мытӥз та ужез. Малпасько, али шумпотыса но данъяськыса вераны луэ, ваньмыз со уж азьланьтӥське выль амалъёсын, выль тусъёсын но адямиосын, но валтӥсез - Геннадий Дмитриевич сярысь вераськиськом, тодамы возиськом но лыдӟиськом
Татьяна Ишматова, «Удмурт Кенеш» огазеяськонлэн тӧроез

Ӝыт туж лякыт ортчиз. Ӟечкыланъёс но тодэ ваёнъёс вискын люкаськемъёслы Удмуртиысь операя но балетъя театрысь артистка Екатерина Фомичёва но аккордеонистка Елена Ковалёва капчи мылкыд кузьмазы. Музейын ортчем ужрадъёсысь туспуктэмъёсты возьматӥзы. Нош ужрад бере вань мылкыд карисьёс музей-квартираысь экспозициосын тодматскизы но перепечен кунояськизы. 

Тодэ вайытом, азьвылгес вераськизы вал Геннадий Красильниковлэн вань ужъёсыныз бичет поттыны малпанъёс вань шуыса. 



Наверх
Вниз