Ижкар-24 °C
6 -тӥ толсур 2021 Вордӥськон
18+

Лулчеберет юртэз быдэсак выльдо но Гончарлэсь азбарзэ лэсьто Эгра ёросысь Сэп гуртын

  • 575
  • 0
Сэп / Удмуртия
Лулчеберет юртэз быдэсак выльдо но Гончарлэсь азбарзэ лэсьто Эгра ёросысь Сэп гуртын
Туспуктэм: Майя Бывальцева

Эгра ёросысь Сэп гуртын лулчеберет юртэз тупатъяло-выльдо, вӧзаз ик горд сюйлэсь арбериосты сутыны гурен аспӧртэм тылыс пукто, азьланяз отын Гончарлэн азбарез луоз.

Лулчеберет юртлэн кивалтӥсез Татьяна Мосова верамъя, тупатъян ужъёс кык толэзь мыно ини. Ӝоггес но быдэстысалзы, дыр, но электрокужымен шугъяськонъёссы кылдӥзы, шонергес вераса, сое тросгес басьтон понна ужкагазъёссы кемагес вуыны выризы.

Сэпысь лулчеберет юртэз выльдон

6 фото

Троссэ ужъёсты партилэн «Культура малой Родины» федерал ӵектосэзъя быдэстӥзы. Соя сэпъёслы 1 миллион 200 сюрс манет вуиз.

Солы ми ваньзэ лэсьтӥмы ин: тани залын краситьтэмын, воштэмын укно рамаос, ӧсъёсмы вошъямын ни, отопление воштэмын, пол воштэмын, краситьтэмын тани
Татьяна Мосова, Сэпысь лулчеберет юртлэн кивалтӥсез

Солэн верамезъя, лулчеберет юртэз тупатъян уже туж трос адями пыриське, со пӧлын асьсэ ужасьёс но, Эграысь политехникумын дышетскисьёс но. Политиехникумен вераськизы, Сэпысь лулчеберет юртысь ӧнерчиос отын арганэн шудонъя но гончар ужъя кружокъёс нуозы шуыса.

Милем уже дунтэк юрттэт сёто. Кызьы уд шумпоты – милям командамы йылэ да йылэ!
Татьяна Мосова, Сэпысь лулчеберет юртлэн кивалтӥсез

Тунсыко, выльдэм лулчеберет юртын пиналъёслы нимаз сценаен висъет лэсьтӥзы. Со понна азьвыл куинь ужан висъетсэс жалятэк сётӥзы.

Туж юн нылпиосмы милям витё ни, малы ке шуоно соослэн асьсэлэн луоз ини интызы, кытчы соос гуртэ кадь пырозы. Отын ик выступать но карозы, отын ик кружокъёс но ортчозы, отын ик шутэтскозы но, телевизор луоз, экран луоз. вань ужзы соослэн отын мыноз ин
Татьяна Мосова, Сэпысь лулчеберет юртлэн кивалтӥсез

Выльдэм лулчеберет юртэз 20-тӥ толсуре усьтыны чаклало

Али отын кык калык хорзы, образцовой фольклор коллективзы, эстрада ансамбльзы вань. Озьы ик пӧртэм кружокъёс ужало, со пӧлын горд сюйлэсь арбериос лэсьтонъя. 

Татьяна Мосовалэн верамезъя, лулчеберет юрт вӧзын Гончарлэн азбарез луоз – арбериосты лэсьтыны но сутыны коркаос пуктозы. Сое радъян бордын горд сюрен ужанъя кружокен кивалтӥсь Андрей Лекомцев тыре.

Та дыре бадӟым гур пуктыны аспӧртэм бугро ӝутӥзы ни. Андрей Лекомцевлэн верамезъя, али электроен ужась гурын суто, но со пичи, вылаз ик туж дуно усе. Бадӟым гурзы пуэн эстӥськоз, отчы ог кык толэзь ӵоже лэсьтэм арбериоссэс суменак пуктыны луоз. Вераны кулэ, сое гончар ачиз пуктыны малпа. Мар ке интернетысь учкыса, мае ке йырысь басьтыса, шуэ.

Вал гончармы Кулябин Никандр Игнатьевич, но со ӧвӧл ни, юаны нокинлэсь. <…> Татын ми пиналъёсын, туристъёсын малпаськом обжигать карыны горд сюй изделиосмес, кудъёссэ ми лэсьяллялом
Андрей Лекомцев, горд сюен ужанъя кружоклэн кивалтӥсез

Андрей Лекомцевлэн верамезъя, со ӵемгес тусьтыос, кружкаос, крынкаос лэсьтэ. Горд сюен ужаны мылкыд карисьёс котьку трос, нош ӝоген ужаны луонлыкъёссы эшшо паськыталозы.

Пиналъёс туж юн шумпотыса ветло, но али одӥг гинэ круге мынам и мон ваньмыныз трос вырыны уг быгатӥськы, малы ке шуоно котькудӥныз нимаз ужано, котькудӥзы валэктоно. Ми заказтӥм эшшо вить круг, али толэзь ӵоже вуыны кулэ вить круг на
Андрей Лекомцев, горд сюен ужанъя кружоклэн кивалтӥсез

Тодэ вайытом, 12-тӥ коньывуонэ Эгра ёросысь шаертодонъя музейын учкыны но кылзыны луымон адӟытон усьтӥськиз. Отчы лыктӥсьёс Сэпе кожатэк уг кошкылэ, дыр.  



Наверх
Вниз