Ижкар-1 °C
22 -тӥ коньывуон 2020 Покчиарня
18+

«Элькуновидение-2019» вожвылъяськонлэн йылпумъян люкетаз 13 ёросъёс пыриськозы

  • 696
  • 0
Ижкар / Удмуртия
«Элькуновидение-2019» вожвылъяськонлэн йылпумъян люкетаз 13 ёросъёс пыриськозы
Туспуктэм: vk.com (Элькуновидение / Григорий Степанов)

19-тӥ коньывуонэ Ижкарысь «Аксион» культура дворецлэн сцена вылаз «Элькуновидение-2019» вожвылъяськонлэн полуфиналэз ортчиз. Удмурт кылын кырӟанъёсты 15 ёросъёсысь нимаз кырӟасьёс но коллективъёс быдэстӥзы.

Котьку сямен, номеръёс пӧртэмесь вал. Одӥгъёсыз шулдыр гур вылын потыны малпазы, мукетъёсыз куаразэс возьматыны тыршизы. Быдэс зал тыр люкаськем учкисьёс котькуд кырӟасез кужмо кичабонъёсын пумитазы но келязы.

Мыным туж яраз, ваньмыз умоесь, чебересь. Соос сыӵе энергия милемлы сётӥзы, ведь со самой главной – соос вань тулкымъяськонзэс асьсэ пыртӥ милемлы сётӥзы залэ. <…> Таӵе конкурсъёс котькуд ар мед луозы
«Элькуновидение-2019» вожвылъяськонэз учкись

Вожвылъяськонэ пыриськем ёросъёслэн ыстэм муртъёссылэсь кылдытэм жюрилэн куара сётонэзлы йылпумъянъёсъя, тужгес трос баллъёс люказ Балезино ёросысь Надежда Сидорова.

Мон сыӵе малпанэн лыктэмын ӧй вал, дасэтӥ луи ке, ярам шуисько вал. Табере калык мед быръёз, кин вормоз. Мон потӥ бесерман калыкме (возьматыны – ред.), бесерман крезьме кырӟай
Надежда Сидорова, «Элькуновидение-2019» вожвылъяськонэ Балезино ёрослэсь пыриськись

Ӵапак бесерман крезь жюрилэн ёзчиосызлэсь сюлэмзэ берыктӥз кадь. Со эшшо одӥг пол возьматэ, конкурсын мар ке аспӧртэмзэ возьматоно, мукетъёсызлэсь висъяськоно, паймытоно шуыса.

Надежда Сидоровалэн верамезъя, таӵе вожвылъяськонъёсы кырӟасьёс одно ик пыриськыны кулэ.

Тани училище бере особенно селое лыктӥськод ке, кышно но кышно луиськод. Ай, да ярам, кариськод. Тани мынам дас ар ортчиз ни дышетсконме быдтэмме, мон малпасько, мон кадьёслы таӵе ужрадъёс кулэ. Нырысь ик астэ эскерыны – быгатӥськод на-а тон, кытчы мыноно азьлань, зэм-а тон аслад интыяд
Надежда Сидорова, «Элькуновидение-2019» вожвылъяськонэ Балезино ёрослэсь пыриськись

«Элькуновидение» лыктэмъёслы туж усто кузьым луиз Удмуртиысь кун симфони оркестрлэн шудэмез. Со тодмо классикаез но яратоно удмурт гуръёсты быдэстӥз

Озьыен, таӵе баллъёсын «Элькуновидение-2019» вожвылъяськонлэн йылпумъян люкетазы пыриськозы:

  1. Балезино ёрос, Надежда Сидорова - 106;
  2. Глаз ёрос, Юрий Князев - 96;
  3. Шаркан ёрос, «Инвожо» ансамбль - 90;
  4. Октябрь ёрос, Алина Егорова - 88;
  5. Пичи Пурга ёрос, «Акцент» группа - 62;
  6. Можга ёрос, «Алача» ансамбль - 52;
  7. Эгра ёрос, Елизавета Лекомцева - 40;
  8. Сьӧлта ёрос, Василий Иванов - 22;
  9. Алнаш ёрос, Ирина Бурдина, Елена Никонова - 18;
  10. Кез ёрос, Юлия Третьякова - 16;
  11. Индустри ёрос, Виталий Белков - 12;
  12. Ленин ёрос, Катерина Кенӟали - 12;
  13. Кияса ёрос, «Чильтэр» ансамбль - 12.
Вожвылъяськонлэн йылпумъян люкетэз 2-тӥ шуркынмонэ «Удмуртия» телеканаллэн меӵак эфираз ортчоз. Отын ас кылзэс ӧнерлыко жюрилэн ёзчиосыз вералозы на. Кык жюрилэсь баллъёссэс ватсаса, та ар понна «Элькуновиденилэн» вормисез тодмо луоз. Со 40 сюрс манет кузьым басьтоз.

Со сяна, меӵак эфир дыръя телевизор азьын пукисьёс но куара сётыны быгатозы. Соосты концертэ лыктэмъёслэн куараоссы борды ватсаса, учкисьёслэсь кузьымзэс – 15 сюрс манет – утӥсь шараяськоз.

Нош вань баллъёсты огазе лыдъяса, тужгес трос балл басьтэм ёрослы Удмуртиысь лулчеберетъя министерство гуртысь лулчеберет юртлэсь ваньбурзэ яке тӥрлыксэ тупатыны-выльдыны 100 сюрс манет сётоз. Вераны кулэ, кар ёросысь вормись та кузьымез басьтыны уз быгаты, угось федерал программаын гурт ёросъёсысь лулчеберет юртъёслы гинэ юрттыны чакламын. Озьы коньдон со бере мынӥсь пыриськисьлы кылёз.

Ӧнерлыко жюрилэн ёзчиосызлэн пумкылъянзыя «Устоез кылбур» но «Устоез крезьгур» номинациын вормисьёс быдэн 5 сюрс манет басьтозы.

Вожвылъяськонэ пыриськисьёс сярысь рос-просгес татысь лыдӟыны быгатоды. 

Тодэ вайытом, радъясьёслэн верамзыя, «Элькуновидение» вожвылъяськон дышем сямен туэ берпуметӥзэ радъяськиз. 

 



Наверх
Вниз