Ижкар+19 °C
14 -тӥ гудырикошкон 2020 Удмуртарня
16+

Удмуртиысь тужгес чебер интыос сярысь вераськизы, эктыны дышетскизы «Кубо» клублэн пумиськоназ Ижкарын

  • 365
  • 0
Ижкар / Удмуртия
Удмуртиысь тужгес чебер интыос сярысь вераськизы, эктыны дышетскизы «Кубо» клублэн пумиськоназ Ижкарын
Туспуктэм: Анжелика Тихонова

22-тӥ коньывуонэ Ижкарысь Йӧскалык лыдӟетъюртын удмурт кылын вераськонъя «Кубо» клублэн кыкетӥ пумиськоназ 13 адями люкаськиз. Ужрадэ ивортодэтъя «Удмуртия» агентстволэн корреспондентэз но пыриськиз.

Та рад пумиськон «Ӟечбур, Удмуртия!» тема улсын ортчиз. Елена Кутасова «Инстаграм» мерлыко вотэсын ортчем «Инстаудмурточки» марафонэз тодаз вайиз но люкаськемъёслы шаерысьтымы тужгес чебер, тунсыко, кунгож сьӧрысь вуэм куноослы возьматымон интыосты тодазы вайыны куриз. Котькудӥз котырес ӝӧк сьӧрын ас синмаськымон интыез сярысь удмурт сямен мадиз.

Куноос пӧлын мадьяръёс, Удмурт кун университетын мадьяр но англи кыллы дышетӥсь Шома Шелмеци но Венгриысь аспирант Золтан Немет вал. Озьы ик удмурт эктонъя «Эктон корка» студие пыриськись, кибашлы Татьяна Тихонова.

Ӝӧк сьӧрын вераськыса, чай юыса пукем сяна, «Кубо» клубе пыриськисьёс удмурт эктонъёсын но тодматскизы. Татьяна Тихонова Ватка сьӧрысь удмуртъёслэн эктонзыя, лымшор удмуртъёслэн «Тани тыныд бур пал ки» эктонзыя но Татарстанын улӥсь удмуртъёслэн урам эктонзыя мастер-классъёс ортчытӥз.

Люкаськемъёслы таӵе ужан амал туж тунсыко потэ. Соос удмурт кылэз, вераськем пыр сяна, удмурт лулчеберет пыр но пыӵато, пуш ласянь соин тодматско.

Мыным та туж тунсыко. Мон ачим удмурт, но ӟуч гуртысь - Сарапул ёросысь Шевырялово гуртысь. Вань ӵыжы-выжыосы удмуртъёс. Кузпалылэн но ӵыжы-выжыосыз удмуртъёс. Со монэн удмурт сямен вераське, мон соин ӟуч сямен. Соин ик мыным удмурт сямен вераськоно. Ужея но удмурт кыл кулэ
Мария Токарева, Йӧскалык музейысь ӧнерчи, «Кубо» клубе пыриськись

«Кубо» клублэн пумиськонъёсыз куинь арнялы огпол радъяськозы но, нырысь-валысь чакламъя, тулысозь кыстӥськозы.

Мон «кубо» сярысь трос лыдӟи. Кызьы трос лыдӟисько, эшшо но валасько шонер ним бырйи шуыса. Нош отын тросэз материалъёс верало, кышноос сӥзьыл черсиськыны кутско но вӧйдыр дорозь. Соин со мынам сыӵе тулысозь проектэ луоз. Адӟом азьланяз. Калык но уго мынам ужась калык. Шоро-куспо сыӵе арлыдъем. Адӟом, кыӵе мылкыдъёссы луозы
Елена Кутасова, «Кубо» клублэн кивалтӥсез

Клублэсь вуоно пумиськонзэ 12 шуркынмонэ ортчытозы но Анайлэн нуналэзлы сӥзёзы. Соку одӥгез куно удмурт туспуктӥсь Эдуард Иванов луоз. «Кубое» пыриськисьёс али ик вуоно пумиськонэ удмурт дӥсьёсын лыктыны кенешизы ини.

«Кубо» клублэн кылдытӥсез но кивалтӥсез Елена Кутасова верамъя, та клубез усьтон азьын со туж курдаз, калык лыктоз-а, уз-а шуыса. Озьы ке но, дӥсьтӥз, уж борды басьтӥськиз.

Вань курсъёс, кытын удмурт кылэз дышето, нош милям со курс ӧвӧл, со соослы, кинлэн удмурт кылъя кыӵе ке но инъетэз вань ини но соослы кулэ пыӵатыны, удмурт кылын вераськыны инты кылдытыны. Мынам потӥз кинэ ке но эшшо ӧтчаме, соос мед адӟозы шуыса. Эктӥсь шоры учкизы, синмаськизы, мед шуозы «Ярам мон татчы лыктӥ»
Елена Кутасова, «Кубо» клублэн кивалтӥсез
 

Пусъём, «Кубо» клуб «Удмурт Кенеш» огазеяськонэн валче радъяське но Удмуртилэн кунлыкезлы 100 ар тырмонлы сӥземын.

Тодэ вайытом, 1-тӥ шуркынмонэ Удмуртиын улӥсьёсты этнографи диктант гожтыны ӧтё



Наверх
Вниз