100 лет государственности Удмуртии
Ижкар+18 °C
28 -тӥ куартолэзь 2020 Покчиарня
16+

Юрий Князев вормиз «Элькуновидение-2019» вожвылъяськонын Удмуртиын

  • 546
  • 0
Ижкар / Удмуртия
Юрий Князев вормиз «Элькуновидение-2019» вожвылъяськонын Удмуртиын
Туспуктэм: vk.com (Элькуновидение)

Удмурт кырӟанъя «Элькуновидение-2019» вожвылъяськонын Глаз ёросысь Юрий Князев.вормиз.  Конкурслэн йылпумъян люкетэз 2-тӥ шуркынмонэ «Удмуртия» телеканаллэн меӵак эфираз ортчиз.

Вормисьлэн нимыз тодмо луиз вожвылъяськонэ пыриськем ёросъёсысь ыстэм муртъёслэсь кылдытэм жюрилэсь концерт дыръя но но ӧнерлыко жюрилэсь студиын пуктэм баллъёссэс ватсаса. Жюриослэсь 144 балл басьтыса, Юрий Князев 40 сюрс манет утӥз.

Ӧнерлыко жюрие пыризы: Марина Ходырева - Удмуртиысь крезьгурчиослэн огазеяськонзылэн кивалтӥсез, Зинаида Рябинина - кылбурчи, «Удмурт дунне» газетлэн валтӥсь редакторез, Богдан Анфиногенов - кылбурчи, кырӟась, Удмуртиысь Калыкъёслэн эшъяськон юртысьтызы ӧнерчи, Надежда Уткина - кырӟась, Удмуртиысь калык артистка, Россиысь дано артистка, Семён Байкузин - «Италмас» кун ансамбльлэн хормейстерез.  Тужгес вылӥ 12 балл соос пуктӥзы:

Марина Ходырева - Пичи Пурга ёрослы;

Зинаида Рябинина - Эгра ёрослы;

Богдан Анфиногенов - Эгра ёрослы;

Надежда Уткина - Глаз ёрослы;

Семён Байкузин хормейстер - Глаз ёрослы. 

Учкисьёслэн концерт дыръя сётэм куараоссы но смс куараослэн лыдзыя (1390 балл)  «Учкисьёслэсь кузьым» - 15 сюрс манет - Шаркан ёросысь «Инвожо» ансамбль басьтӥз. 

Удмуртиысь лулчеберетъя министерстволэсь 100 сюрс манет басьтӥз озьы ик Шаркан ёрос, со учкисьёслэсь вань куараоссэс но жюрилэсь вань баллъёссэс ватсаса оглом 1492 балл люказ.

Тужгес усто кылбур понна 5 сюрс манет кузьым басьтӥз Эгра ёросысь Елизавета Лекомцева «Улонмы - чылкыт куар» уженыз.

Тужгес устоез крезьгур понна 5 сюрс манет утӥз  Пичи Пурга ёросысь Эдуард Мираев, со «Сӥзьыл пала кырӟанлы» крезьгурзэ гожтӥз.

Тодэ вайытом, вожвылъяськонэ ваньмыз 15 кырӟасьёс но коллективъёс пыриськизы, концерт люкетэз бере вормон понна нюръяськонзэс азьланьтӥзы 13-ез. 

Вуоно арын «Элькуновидение» вожвылъяськонын пӧртэм аръёсы но туэ вормисьёс пыриськозы.



Наверх
Вниз