100 лет государственности Удмуртии
Ижкар+19 °C
31 -тӥ куартолэзь 2020 Воскресенье
16+

Удмуртиысь йӧскалык театрлэн пуктӥсь режиссёрез выль спектакль сярысь: небыт, ӟеч но туж туала

  • 317
  • 0
Ижкар / Удмуртия
Удмуртиысь йӧскалык театрлэн пуктӥсь режиссёрез выль спектакль сярысь: небыт, ӟеч но туж туала
Туспуктэм: Удмуртиысь йӧскалык театр

Удмуртиысь йӧскалык театрын та сезон понна нырысетӥзэ выль спектакльзэс возьматозы - туала драматурглэн Андрей Ивановлэн «Божьи одуванчики» пьесаезъя «Жениха вызывали, девочки?..» кык ёзо комедиез. Ивортодэтъя «Удмуртия» агентстволэн корреспондентэз йылпумъясь репетициязы вуылӥз.

Азьвыл актриса Анастасия Петрова сузэрезлы, Мальвиналы, карт шедьтыны малпаз но кузпалъёсты бырйись агентствое вазиськиз. Пусъем дыре огназы улӥсь арлыдо нылкышноос доры бӧрсьысь бӧрсе эмеспиос лыкто. Но нырысь-валысь серемес учыр пумен малпаськонэ уськытэ…

«Жениха вызывали, девочки?..» спектакльысь суредъёс

9 фото

Гожъясь пьесазэ комедия шуыса малпаз, но йӧскалык театрысь пуктӥсь режиссёр Владимир Сафонов сое йӧспӧртэм комедия нимаз.

Мон со пьесаез мукет сямен берыктыны луонлыкез адӟи. Нырысь ик мар ке оломар, туж огшоры учыр, но шуак ваньмыз берытске но, со адямиос саклыкмес бордазы кыско. Асьмелы валамон, соослы яратон уг тырмы, асьсэдыз возьматыны луонлык уг тырмы. Мыным потэ, со туж небыт, туж ӟеч, туннэ улонмы понна туж туала пьеса
Владимир Сафонов, пуктӥсь режиссёр

Солэн верамезъя, спектакль огназы кылем но улыны кужым, мылкыд утчась мӧйы муртъёс сярысь. Адями бадӟым арлыдаз вуыса но шудо луыны быгатэ шуыса. Нош мар со шуд? Куке тон мукет адямиослы, нылпиослы, мерлыклы кулэ.

Арлыдо учкисьёсты спектакль вӧсь кароз, дыр. Но шоро-куспо арлыдъемъёсты, егитъёсты пересь ӵыжы-выжыоссы шоры мукет синмын учкыны косоз, оло.

Котькуд учкись спектаклез аслаз улон сюресэныз ӵошатоз, шуэ Анастасия Петровалэсь рользэ шудӥсь Россиысь дано артистка, Удмуртиысь калык артистка Фаина Будина.

Та тема – котькуд адямилэн вӧсь темаез. <…> Огнад кылён ужпум, уката ик пересьёслэн. Асьмеос… пыр уж кулэ ук егит дыръя, пыр бызьыса. <…> Мон Анастасиеным одӥг кадь. Мон но сыӵе ик наивной, ӧжытак романтик шуод-а, мар-а. Ми соин огкадесь, та улонын приспособиться кариськыны ум быгатӥське
Фаина Будина, Анастасия Петровалэсь рользэ шудӥсь

Аслаз героиняеныз – Мальвина Петроваен – одӥг радэ ассэ пуктэ Удмуртиысь дано артистка Римма Николаева но. Мугоры пичиен-а, мар-а эксэй кышноосты ноку ӧй шуды, соизлы яке таизлы юрттӥсьёсты, пичи нылъёсты но пиосты, шуэ со. Та спектакльын но апаезлэсь кылзӥськоно луэ. Озьы ик капчи мылкыдынызы, серекъяны яратэменызы но огкадьгес луо. Мар ватонэз, арлыдэнызы но.

Мон туж шумпотӥсько, милям театрамы таӵе пьесаез басьтӥзы, таӵе спектакль пуктӥзы шуыса. Мынам али арлыды сыӵе, мон сое туж шӧдӥсько шуод-а, мар-а: мӧйымон лыктӥз, егитъёслы тон кулэ ӧвӧл ни, тынэсьтыд кылэм уг каро. <…> Ми, конешно, ум чуртнаськиське, трос валэктыны но ум турттӥське, но сыӵе тема ӝутӥськиз, куке егитъёслэн валамзы уг поты мӧйыосты, но соос асьсэос но мӧйымозы куке но, куке но соос доры озьы ик лыктоз со. Кызьы шуо: мае кизид, сое ик аралод
Римма Николаева, Малина Петровалэсь рользэ шудӥсь

Нимаз рольёсты шудо шуыны луоз сцена вылысь арбериос но геройёслэн дӥськутсы. Арлыдо нылкышноос но воргоронъёс шыкысысьтызы тужгес чебер дэремъёссэс но костюмъёссэс поттӥллям, ӵок соосты кылем даур шорысен нокин уг нуллы ни ке но. Куке но тодмо актрисалэн патераз ас вакытаз чебер но узыр пукон-ӝӧкъёс сыло, но али соос бездытэсьгес ни, курень буям борддоръёс вылын кузё кышнолэн егит дырысьтыз сьӧд-тӧдьы туспуктэмъёс ошылэмын. Ваньмыз со, озьы ик шоголь дӥсяськем егит воргоронлэн ассэ воземез, огназы кылем адямиослэсь секыт югдурзэс, арлыдзы сэрен улон сюреслэн урдсаз кылемзэс уката мур возьматыны юрттэ. Со дыре ик ӝӧк вадьсы ошем бадӟым вож люстра ваньзэ югдытэ, улонлы, азинсконлы оскон сётэ кадь.

Вераны кулэ, режиссёр пьесалэсь пумзэ кӧня ке воштӥз. Малы ке шуоно авторлэн нокыӵе осконэз ӧвӧл, валэктӥз Владимир Сафонов.

Нош мон озьы уг быгатӥськы, малы ке шуоно мон синмаськемын со адямиослы. Синмаськемын, малы ке шуоно соос огшорыесь ке но, со дыре ик соослэн туж мур пуштроссы, со мыным туж кельше. Мыным, адямилы сямен, потэ, залысь учкисьёс но соосты мед яратозы шуыса
Владимир Сафонов, пуктӥсь режиссёр

Удмуртиысь йӧскалык театрлэсь выль ужзэ 8-тӥ но 9-тӥ шуркынмонэ адӟыны луоз. 



Наверх
Вниз