Ижкар+22 °C
11 -тӥ пӧсьтолэзь 2020 Кӧснунал
16+

Удмуртиысь ӵектос куинетӥ инты басьтӥз Киужъёсъя калыккуспо конгрессын Санкт-Петербургын

  • 524
  • 0
Санкт-Петербург / Россия
Удмуртиысь ӵектос куинетӥ инты басьтӥз Киужъёсъя калыккуспо конгрессын Санкт-Петербургын
Туспуктэм: vk.com (Возрождённые ремёсла (отдел ДПИиР РДНТ))

16-тӥ шуркынмонэ Санкт-Петербургын Киужъя IV калыккуспо конгресс – Россиын киужлы сӥзем тужгес бадӟымес ужрад йылпумъяськиз. Со улсын ортчем вожвылъяськонын Удмуртиысь киужъя ӵектос куинетӥ инты басьтӥз. Со сярысь ивортодэтъя «Удмуртия» агентстволы Калык творчествоя элькун юртысь чеберлыко киужъёсъя ёзэтлэн кивалтӥсез Ольга Пислегова вераз.

Санкт-Петербурге Удмуртиысь Кияса ёросысь кибашлыослэн юртэнызы кивалтӥсь Ольга Шакирова, Глазкарысь шаертодонъя музеен кивалтӥсь Инна Иванова, музейысь ик тодосчи-секретарь Ксения Золотарёва но Ольга Пислегова ветлӥзы.

Киужъя калыккуспо конгресс улсын вылӥ но шоръёзо ӧнер дышетсконниосын тодон-валан люкась егитъёслэсь киужъя ӵектосъёссэс дунъязы. Удмурт кун университетын дышетскисьлэн Диана Шакировалэн горд сюен ужанъя «Толэзё» ӵектосэз «Приз зрительских симпатий» номинациын куинетӥ инты басьтӥз.

Со Киужъя юртлэн кивалтӥсезлэн нылыз (Кияса ёросысь Ольга Шакировалэн – ред.). Со сямъёсты азинтӥсь луэ. Ми туж шумпотӥськом, йӧно егит кивоштӥсьёсмы будо шуыса
Ольга Пислегова, Калык творчествоя элькун юртысь чеберлыко киужъёсъя ёзэтлэн кивалтӥсез

Конкурс сяна, конгресс улсын адӟытон радъяськиз. Отчы Кияса но Глаз ёросысь чеберлыко киужъёсты нуллӥзы.

Озьы ик элькунысьтымы ыстэм муртъёс ужрадэ вуэм Италиысь, Япониысь ужбергатӥсьёсын тодматскизы. Соосын туала шуг-секытъёс сярысь кенешизы.

Ми валаськом, али туж трос шуг-секытъёс шуыса, Россиын гинэ ӧвӧл, мукет кунъёсын но. Шугъяськонъёс экономикаен герӟаськемын. Адямиос уг быгато басьтыны тунсыко арбериосты коньдонзы ӧвӧлэн. Соослэн потэ басьтэмзы, но уг быгато
Ольга Пислегова, Калык творчествоя элькун юртысь чеберлыко киужъёсъя ёзэтлэн кивалтӥсез

Тунсыко ужан амалъёссы сярысь Казахстанысь, Азиысь мукет кунъёсысь ыстэм муртъёс веразы.

Соослэн но таӵе ик киужен герӟаськем движенизы вань. Таджикистанын, кылсярысь, 2018-тӥ ар Киужлэн ареныз ялэмын вал. Соослэн но вань туж умой усточиоссы
Ольга Пислегова, Калык творчествоя элькун юртысь чеберлыко киужъёсъя ёзэтлэн кивалтӥсез

Россиысь киужъя центръёслэсь но вань малы дышетскыны. Ольга Пислеговалэн верамезъя, соос али секыт уло ке но, югдурысь потыны амал шедьто. Кылсярысь, ужъёсынызы кунгож сьӧрын туж усто тодмато но отчы вузаны келяло.

Ми малпаськом (кунгож сьӧрысь рыноке потыны – ред.), но, валамон ини, валтӥсез соос, кинъёс понна ми ужаськом. Нош ми нырысь ик Удмуртиын улӥсьёс но куноос понна ужаськом. Но со вакытэ ик ужъёсмес кунгож сьӧры келяны но отысь калыкез тодматыны луонлыкъёсты уже кутом
Ольга Пислегова, Калык творчествоя элькун юртысь чеберлыко киужъёсъя ёзэтлэн кивалтӥсез

Тодэ вайытом, азьвылгес Удмурт кун университетын дышетскисьёс Грозныйын чеберлыко киужъёсъя огъяросси фестиваль-вожвылъяськонын вормизы, нош Дэбес политехникумысь студентъёс но дышетӥсьёс Москваын калыккуспо фестивальын 19 медальёс утӥзы




Наверх
Вниз