Ижкар+15 °C
18 -тӥ куарусён 2020 Удмуртарня
18+

Туала удмурт литературалэн шедьтонъёсыз но ыштонъёсыз сярысь вераськизы Ижкарын

  • 546
  • 0
Ижкар / Удмуртия
Туала удмурт литературалэн шедьтонъёсыз но ыштонъёсыз сярысь вераськизы Ижкарын

26-тӥ шуркынмонэ Удмуртиысь литератураез эскерисьёс, гожъясьёс, тодосчиос туала удмурт литературалэн шедьтонъёсыз но ыштонъёсыз сярысь вераськыны люкаськылӥзы. Удмурт кыллэн нуналэз азьын пумиськонэз «Кенеш» журнал радъяз.

Кенешонэз нуись кылбурчи, литератураез эскерись, кылосбур тодосъя кандидат Виктор Шибанов нырысь ик юан пуктӥз: кыӵе вакытысь литератураез туалаен лыдъяны луоно. Кин ке кылем даурлэсь кыкетӥ ӝынызэ но туала шуэ. Соин ик тодосчи берло 10-20 аръёсы гожтэм литератураез возьматон понна «туннала» кылэз кутыны ӵектӥз.

Туннала удмурт литератураысь жанръёслы дунъет сётыса, Виктор Шибанов пусйиз, со солэн адӟонэз шуыса, кин ке, оло, соин соглаш уз кариськы.

Тодосчилэн верамезъя, берло аръёсы прозалэн тужгес но яркыт тодметэз – со роман жанрлэн кыкетӥ планэ кылемез, сое кузьмадёс (повесть) палдуртэ. Со дыре ик та воштӥськонэз ыштонэн лыдъяны быдэсак уг луы.

Но текстъёс вакчигес луэмен валче соослэн «секталазы» уг кулэсмы, оло, кужмоя но
Виктор Шибанов, кылбурчи, литератураез эскерись

Озьы ик солэн верамезъя, кузьмадёс жанръя удмурт эпической поэма азинскиз.

Вашкала эпос лулчеберетмылы кыӵе ке но выль шокчон сётӥз. Удмурт литератураез эшшо но удмуртогес кариз. Со инъет сётӥз этнофутуризмлы
Виктор Шибанов, кылбурчи, литератураез эскерись

Удмурт эпослэн чебер пушъемез удмурт фэнтезилы умой кужым сётӥз, лыдъя Виктор Шибанов. Литератураез мукет эскерисьёс со гожтосъёсты авторен гожтэм выжыкыл нимало. Нош тодэ ваён (мемуар) жанр, кылбурчилэн чакламезъя, лябӟиз.

Виктор Шибановлэн кылъёсызъя, али бадӟымесь луонлыкъёс кылдӥзы прозалэн покчи жанръёсаз. Та ӧрын ужась кызьлэсь ятыр нимъёсты вераны быгатӥськомы, но сётоз-а со лыдпус ӟечлык, сюлмаське тодосчи. Нош туннала кылбуретлэн ӵуказе нуналэз понна кышкыт ӧвӧл, пусйиз со. Туннэ кылбурчиос олокыӵе но ӧръёсын ужаны быгато, со пӧлын япон кабъёс, рэп-поэзия, кылбур-кырӟан.

Литератураез эскерись, педагогика тодосъя кандидат Любовь Фёдорова 21-тӥ даурысь литературалэн воштӥськонъёсыз сярысь вераз. Нырысь ик со пусйиз, литература улонэ воргоронъёсын артэ нылкышноос туж мыло-кыдо пыро шуыса, «соослэн асьсэлэн интызы, асьсэлэн пытьызы». Мукетыз, мар солы тунсыко потэ, гожъяськисьёслэн трос кылъёсты тодэмзы.

Тодо удмуртсэ, тодо ӟучсэ, со вӧзы тодо на финн-угор кылъёсты но тодо англи но немец кылъёсты. Кыл тодӥськом бере, со культураен но англи, венгер, финн, мукет литератураосын но матысьгес тодматскиськомы. <…> Соин валчеяса, литература воштӥське. <…> Мон шуысал, егитъёслэн воштӥське дунне шӧдонзы но, гожъяськон амалзы но, образной системазы но
Любовь Фёдорова, литератураез эскерись

Солэн верамезъя, удмурт литература нырысь гурт азбарысь потӥз, нош али удмурт азбарысь но потыны турттэ но «удмурт мертэтэн дунъяны турттэ мукет культураосты но литератураосты». Сое адӟыны луэ Сергей Матвеевлэн, Анастасия Шумиловалэн, Алексей Арзамзовлэн книгаоссыя.

Со ик вань глобализационной процессъёс. Ӧм ке пыриське со ӧре, асьмеос нокинлы тунсыко ум луэ. Сое валан, мыным потэ, егитъёслэн вань. Ӵем дыръя действие ортче не удмурт азбарын уже, а кытын ке Ниццаын, Парижын, кытын ке Венгер городын но мукет. Инты гинэ уг воштӥськы, воштӥське геройёслэн огъя характерзы, конфликтлэн пуштросэз воштӥське
Любовь Фёдорова, литератураез эскерись

Любовь Фёдорова нимысьтыз саклык висъяз детектив жанрлы. Малы со удмурт литератураын ӧвӧл, кулэ-а со лыдӟисьлы яке книга ӝажыосты мукет гожъясьёслэн та ӧрын гожъямъёссы тырмыто?

Тросэз, кин эскере детективъёсты, соос шуо: со нырысь ик азинскемын со калыкъёслэн, со странаосын, кытын ке вань туж узыр улӥсь адямиос - сое можно лушканы, сое можно люкыны, со понна можно виыны. Соин самой матысез йырам лыктэ англи детектив, малы ке шуоно Англиын кадь со вакытэ, шуом, 20-тӥ даурлэн кутсконаз, узыр адямиос ӧвӧл, дыр. Ӵем дыръя литературалы инъет луэ ачиз улон. Удмуртлэн немае люкыны ке, шуомы, немае лушканы бадӟым масштабъёсын, соин, лэся, детективлы улон материал уг сёты
Любовь Фёдорова, литератураез эскерись

Солэн верамезъя, детективъёслэсь куронъёссэс быдэстыны тыршо Елена Миннигараева но Римма Игнатьева. Но «нылкышноос тросгес саклык висъяло геройёслэсь лулпушсэс валанлы, нош луыны кулэ действие».

Елена Миннигараевалэн кылъёсызъя, со удмуртъёслэн менталитетэнызы, гань-гань улон сямынызы герӟаськемын, дыр.

Озьы ик Любовь Федорова туннала гожъяськисьёслэн кылзы пумысен малпанъёссэ шараяз. Солэн верамезъя, мерлыко вотэсъёсын вакчиятыса, янгышъёсын гожъяськон амал чеберлыко литературае но потыны кутскиз.

Мыным бӧрдымон обидно вал, куке мон нырысьсэ лыдӟи но вал жюриын Миннацын ортчись конкурсын. Отын вал пиналъёслы сӥзем литература. <…> Кылрад но кыллэсь чылкытлыксэ утён сярысь малпаськемысь дугдӥськомы
Любовь Фёдорова, литератураез эскерись

«Кенеш» журналлэн валтӥсь редакторез Ольга Бородина но Виктор Шибанов та ласянь гожъясьёслы дурбасьтӥзы. Соослэн верамзыя, журналэн ортчытӥськись вожвылъяськонэ вуэм ужъёсъя валаны луэ, авторъёслэн текстъёсазы янгышъёс ӧжытгес луизы.

Виктор Шибанов пусйиз, таӵе пумиськонъёсты арлы быдэ одӥг пол ке но ортчытъяны одно ик кулэ. Со литератураысь воштӥськонъёсты адӟыны-валаны луонлык, ужаны мылкыд сётэ. Со сяна, котькуд ӧръя нимаз кенешонъёс но радъяны умой луысал шуыса вераськизы. 



Наверх
Вниз