Ижкар+18 °C
6 -тӥ гудырикошкон 2020 Покчиарня
16+

Бесерман егитъёслэсь огазеяськонзэс кылдытӥзы Удмуртиын

  • 320
  • 0
Юкаменск / Удмуртия
Бесерман егитъёслэсь огазеяськонзэс кылдытӥзы Удмуртиын
Туспуктэм: vk.com (Юндинский СДК, Центр бесермянской культуры)

29-30 шуркынмонэ Юкаменск ёросын бесерман лулчеберетъя «Наследие бесермян. От прошлого к настоящему» I улосвылкуспо фольклоръя этнофестиваль ортчиз. Со улсын бесерман егитъёслэсь огазеяськонзэс кылдытӥзы. Со сярысь ивортодэтъя «Удмуртия» агентстволы Бесерман лулчеберетэз улӟытонъя центрен кивалтӥсь Мария Берсенева вераз.

Бесерман егитъёслэн огазеяськоназы фестивале люкаськем 15 пала егитъёс пыризы. Но азьланяз соос борды эшшо ватсаськозы на.

Мыным потэ егитъёс тунсыкъясько. <…>Та кенешонэ ас бесерман йӧслыксы, кылзы, лулчеберетсы понна висисьёс пыриськизы шуыса чакласько
Мария Берсенева, Бесерман лулчеберетэз улӟытонъя центрен кивалтӥсь

Огазеяськонлы кивалтӥсе Юкаменскысь ёрос лыдӟетъюртысь библиографез Любовь Караваеваез юнматӥзы. Солэн воштӥсез Балезино ёросысь Юнда гуртысь 11-тӥ классын дышетскись Алексей Биянов луиз.

Мария Берсеневалэн верамезъя, али огазеяськонлы ним быръён мынэ. Бесерман лулчеберетэз улӟытонъя центрлэн «ВКонтакте» мерлыко вотэсысь огиназ куара сётон ялэмын

Егитъёсын вуоно пумиськонзы толшоре Юкаменск ёросын «Брага юон» ужрадын чакламын

Фестиваль нырысетӥ нуналаз «Бесермяне сегодня: как сохранить себя в меняющемся мире?» научно-практической конференци ортчиз. Отын бесерман кылэз но лулчеберетэз ас кужыменызы утён, шугъяськонъёссы, бесерман кылэз утёнын удмурт кыллэн интыез пумысен вераськизы.

Ужрадэ Юкаменск, Глаз, Яр, Балезино, Эгра, Можга ёросъёсысь бесерманъёс пыриськизы. Озьы ик йӧскалык политикая министр Лариса Буранова, Кун Кенешлэн тӧроезлэн нырысетӥ воштӥсез Владимир Невоструев, «Удмурт Кенеш» огазеяськонлэн тӧроез Татьяна Ишматова, Юкаменск ёрослэн тӧроез Константин Бельтюков вуылӥзы. 

Кыкетӥ нуналаз пӧртэм творчествоя площадкаос ужазы. Мылкыд карисьёс киужъёсъя «Кибашлеос» площадкае, чеберъяськонъёс лэсьтонъя мастер-классъёсы пыриськизы. Гожъяськисьёслэн но кылбурчиослэн «Вирсэр» площадкаязы вуылӥзы. «Ӟек сере люкаськон» площадкаын бесерман пӧрамъёсын кунояськизы. Ужрадэз «Наське менесьтэм дэремме» бесерман дӥсьёсын дефиле йылпумъяз.

Фестиваль Росси азьмуртлэн грантъёсъя фондысьтыз коньдонлы луыса ортчиз, солы 489 сюрс висъязы

Мария Берсеневалэн верамезъя, ужрад тунсыко пӧрмиз. Азьланяз таӵе фестиваль арлы яке кык арлы огпол радъяськылоз шуыса чаклало. 



Наверх
Вниз