Ижкар+22 °C
11 -тӥ пӧсьтолэзь 2020 Кӧснунал
16+

Сюрс пала адями пыриськиз сӧсыр муртъёслэн творчествоя ӵошатсконъёсазы Удмуртиын

  • 280
  • 0
Ижкар / Удмуртия
Сюрс пала адями пыриськиз сӧсыр муртъёслэн творчествоя ӵошатсконъёсазы Удмуртиын
Туспуктэм: Алексей Арзамасцев

Ижкарын сӧсыръёслэн творчествоя нырысетӥ элькун ӵошатсконъёссылы йылпумъянъёс лэсьтӥзы. Шудонъёсы оглом 1 сюрс пала адями пыриськиз. Тужгес устоосыз быгатонлыкъёссэс гала-концертын возьматӥзы.

Тӥ соосты лэсьтӥды. Со тӥляд шудонъёсты. Туж умой, тӧролэн пумкылъянэз улонэ пыӵаз шуыса. <…> Парадельфи шудонъёс бере тӥ нырысетӥез улосвыл, кудӥз нимлыко элькун ӵошатсконъёс ортчытӥз. Мукетъёсыз но улосвылъёс тӥлесьтыд адӟем карозы шуыса оскиськомы. Вуоно арын нылпиослэн но, егитъёслэн но шудонъёссы ортчозы. Тӥляд вань ни вормисьёсты, кудъёсыз со шудонъёсы пыриськозы, дыр
Наталья Крель, Россиысь Йӧскалык Парадельфи комитетлэн кивалтӥсез

Быръён люкетъёсыз гужем кутскизы. Удмуртиысь ваньмаз каръёсын но гуртъёсын тужгес устолыко кырӟасьёсты, эктӥсьёсты но актёръёсты утчазы. Одӥг сюрес куриськисьёс пӧлысь финалэ 389 пыриськисьёс потӥзы. Соос Ижкарын йылпумъян ӵошатсконъёсын пумиськизы.

Жюриын огшоры адямиос ӧй вал – профессионалъёс, соос ӧнерлыко дунъет сётӥзы. Сӧсыр луэмзэс ӧз учке, ӧз жалялэ. <…> Сое ик возьмаськом та шудонъёслэсь. Та шудонъёсы пыриськем адямиос, асьсэлэсь устолыксэс возьматыса, азьлань мыныны мед быгатозы
Наталья Крель, Россиысь Йӧскалык Парадельфи комитетлэн кивалтӥсез

Пиналъёс но бадӟымъёс быгатонлыкъёссэс 8 ӧръёсъя возьматӥзы: кылбуръёс лыдӟизы, суредаськизы но туспуктэмъёс лэсьтӥзы, куараен но киосын кырӟазы, спектакльёс но видеороликъёс возьматӥзы, крезьгуро арбериосын шудӥзы. Устооссэ арлыдъя ньыль группая бырйизы: куинь пиналъёслэн но одӥг бадӟымъёслэн. Оглом 100 пала медальёс сётӥзы.

Коньдэт сокем бусьтыр ӧвӧл ке но, со ужрадэз но радъяны, пыриськисьёслы дунтэк улон висъяны, карозь вайыны луонлык сётэ. Ваньмыз, со пӧлын волонтёръёсты сюдонэз, ми ас выламы басьтӥськомы
Анастасия Муталенко, Удмуртиысь кивалтэтлэн тӧроезлэн воштӥсез

Ӵошатсконъёсты арлы быдэ ортчытъялозы. Нырысетӥ шудонъёс дыръя шараяськем тырмымтэосты лыдэ басьтозы. Озьы ик радъянлэсь ӟечлыксэс чакланы Москваысь лыктэм ӧнерчиосты кылзӥськозы.

Вуоноез ар азинсконын выль вамыш луоз. Удмуртиысь лулчеберетъя министерствоен ӵош ми ӧнерчиосмес дышетонлы саклык висъялом. Озьы ик таяз арын вормем адямиосты азинтонлы, соос калыккуспо шудонъёсы пыриськыны мед быгатозы
Татьяна Чуракова, Удмуртиысь мерлыко политикая но ужъя министр

Элькун ӵошатсконъёс тазалыксыя ӧжытгес быгатӥсь адямиослы асьсэды возьматыны луонлык сёто. Сыӵе ужпум пуктэ Росси азьмуртэн Владимир Путинэн кичӧлтэм «Демография» йӧскалык ӵектос. Удмуртилэн тӧроез Александр Бречалов сӧсыръёс пӧлын творчествоя ӵошатсконъёс ортчытонлы кичӧлтон сётӥз но та кулэ ужрадэз арлы быдэ радъялозы шуыса пусйиз.   

Тодэ вайытом, 2018-тӥ арын Ижкарын Кыкетӥ калыккуспо Парадельфи шудонъёс ортчизы.



Наверх
Вниз