Ижкар-1 °C
29 -тӥ коньывуон 2020 Покчиарня
18+

Вуоно арын Удмуртилэн литературая шоркарез Сарапул кар луоз

  • 567
  • 0
Ижкар / Удмуртия
Вуоно арын Удмуртилэн литературая шоркарез Сарапул кар луоз
Туспуктэм: vk.com (Национальная библиотека Удмуртской Республики)

2020-тӥ арын Удмуртилэн литературая шоркарез Сарапул кар луоз. 4-тӥ шуркынмонэ солы эстафетаез Пичи Пурга ёрос сётӥз. Мар вуоно арын чаклало но кызьы туэ ар ортчиз, ивортодэтъя «Удмуртия» агентстволэн корреспондентэзлы элькунысь Йӧскалык лыдӟетъюртлэн кивалтӥсезлэн воштӥсез Анна Семёнова вераз.

Сарапул кар вуоно арлэн литературая шоркареныз юнме быръемын ӧвӧл. Анна Семёновалэн кылъёсызъя, карысь лыдӟетъюрт вуоно арын котырес лыдпуссэ пусъёз.

Асьмелэн Сарапулын одӥгез сыӵе арлыдоез лыдӟетъюртмы. <...> Уг ке янгышаськы, солы 185 ар тырме. Йӧскалык лыдӟетъюртлы кылем арын 100 ар тырмиз ке, солы 185. Со бадӟым лыдпус, соин ик солы луыса сое бырйим. Асьсэлэн но мылкыдзы вал
Анна Семёнова, Удмуртиысь Йӧскалык лыдӟетъюртлэн кивалтӥсезлэн воштӥсез

Солэн верамезъя, Пичи Пурга ёрос удмурт выжыосыныз висъяськиз ке, вуоно арын Сарапуллэн литератураезлэн нуналъёсыз мукет шӧмогес ортчозы. Соя валаны луоз, макем пӧртэм асьмелэн элькунмы.

Туж чебер усьтон луыны кулэ, собере куартолэзе Сарапулын туж бадӟым, чебер литературной концерт ортчоз, бадӟым форматъёсты кутыса. Озьы ик малпаськомы вуоно арын «На родине Петра Ильича Чайковского» литературая фестиваль улсын бадӟым площадкаын сое возьматыны
Анна Семёнова, Удмуртиысь Йӧскалык лыдӟетъюртлэн кивалтӥсезлэн воштӥсез

Радъясьёс оско, ӵектос азьланяз паськыталоз гинэ шуыса. Уго солы луыса элькунамы мукет пӧртэм ӵектосъёс но азинскыны кутскизы ини.

Тани ёросъёс асьсэзыз шоркарамы кыӵе ке но сыӵе нуналъёс шуыса возьматыны туртто. Сыӵе ужрадъёс ортчо, и соос асьсэос но, радъясьёс, шуо, кичӧлскон сётӥз та ӵектосты шуыса. Котькуд арлы кыӵе ке но тунсыкогес формаос утчаськом, мар ке но выльзэ, кыӵе ке но изюминкаос шедьтыны турттӥськом
Анна Семёнова, Удмуртиысь Йӧскалык лыдӟетъюртлэн кивалтӥсезлэн воштӥсез

Кылсярысь, туэ Удмуртиын Пичи Пурга ёрос литературалэн нуналъёсыз улсын нырысьсэ «Единый день литературы Малопургинского района» акци ортчиз. Со улсын быдэс элькунысь школаосын, лыдӟетъюртъёсын пӧртэм ужрадъёс радъяськизы.

Соос пӧртэм формаосын вал. Адӟытонъёсысен кутскыса, пӧртэм читкаос, конкурсъёс ортчытъяса. Огъя элькунъя вераны ке, со нуналэ 3 сюрс пала сыӵе ужрадъёс ортчизы. Ми со нуналэ йӧскалык театрысь артистъёсын, кудъёсыз Пичи Пурга ёросын вордӥськизы, ёросысь ик потэм Самсоновъёслэсь произведениоссэс лыдӟон ортчытӥм. Со но туж тунсыко ужрад луиз
Анна Семёнова, Удмуртиысь Йӧскалык лыдӟетъюртлэн кивалтӥсезлэн воштӥсез

Озьы ик туэ нырысьсэ элькунамы «На родине Петра Ильича Чайковского» литературая фестиваль ортчиз. Отын но Пичи Пурга ёрос туж зол возьматэмын вал. Кылсярысь, Ижкарысь Гоголь нимо бульварын ярмаркаын.

Отын книга вузан сяна, пӧртэм-пӧртэм ужрадъёс ортчизы, мастер-классъёс, пӧртэм выступлениос. Ӵапак отын нимысьтыз пургаос, библиотекаос но, мукет лулчеберет юртъёс но вуыса, площадкаосын но сылӥзы. Пичи Пурга ёрослэн литературая азбарез вал, озьы ик сцена вылын но асьсэлэсь литература лыдӟонъёссэс адӟытӥзы
Анна Семёнова, Удмуртиысь Йӧскалык лыдӟетъюртлэн кивалтӥсезлэн воштӥсез

Тодэ вайытом, Удмуртиысь йӧскалык лыдӟетъюртлэн «Удмурт Элькунысь муниципал кылдытэтъёслэн литературазылэн нуналъёссы» ӵектосэз 2017-тӥ арын Алнаш ёрослэн литератураез бордысен кутскиз. 2018-тӥ арын проектэз Можга ёрос азьланьтӥз. Нош туэ – Пичи Пурга ёрос



Наверх
Вниз