Ижкар-3 °C
23 -тӥ тулыспал 2020 Воскресенье
16+

Удмурт калык пӧраськонлэсь «энциклопедизэ» поттӥзы Удмуртиын

  • 500
  • 0
Ижкар / Удмуртия
Удмурт калык пӧраськонлэсь «энциклопедизэ» поттӥзы Удмуртиын
Туспуктэм: Алексей Арзамасцев

«Удмуртия» издательство удмурт калык пӧраськонлы сӥзем «Удмуртская народная кухня» книга поттӥз. Со быдэс энциклопедия выллем луиз, вераз ивортодэтъя «Удмуртия» агентстволы книгапоттоннилэн кивалтӥсез, ӵектослэн редакторез Юрий Кузнецов.

Солэн кылъёсызъя, выль ужзы пӧраськонлы сӥзем мукет книгаослэсь туж висъяське.

Кызьы удмурт книгоизадниын, озьы ик быдэс Россиысь мынам таӵезэ адӟылэме ӧвӧл. <…> Одӥгез но бам ог-огезлы уг кельшы. <…> Собере та книга, мон шуысал на, пӧраськон гинэ ӧвӧл, со огъя сиён котыр: тусьты-пуньыос но, киӵушетъёс но, ӝӧккышетъёс но, губиос но, картошъёс но – ваньмыз татын люкаськемын. Со быдэс энциклопедия кадь милям луиз
Юрий Кузнецов, «Удмуртия» книгапоттоннилэн кивалтӥсез, ӵектослэн редакторез

«Удмуртская народная кухня» книгалэн бамъёсыз

8 фото

Котькуд бамын я пужыятэм киӵушет, я куэм ӝӧккышет, я буям тэркы адӟиське. Ваньмыз со книгапоттонниын ужасьёслэн дорысьтызы яке ӵыжы-выжыоссылэн шыкысъёсысьтызы поттэмын. Озьы удмурт улонэ воксё выйиськод кадь, шуэ Юрий Кузнецов.

Удмурт калыклэн узырлыкез татын
Юрий Кузнецов, «Удмуртия» книгапоттоннилэн кивалтӥсез, ӵектослэн редакторез

Троссэ туспуктэмъёсты быдэстӥз, книгалэсь туссэ лэсьтӥз но унозэ сиёнъёсты пӧраз дизайнерзы Валентин Семёнов. Со сяна, юрттӥсьёссы но тырмыт вал. Шунянез, кылсярысь, Алнаш ёросысь Байтерек гуртысь песянайёс пӧразы.

Табань Галина Васильевналэн - «Лудорвайын» ужасьлэн, киосызлэн шунытэз та табань бордын. <…> Ваньзылы тау, кин пумит ӧз луы туспуктэме пуксьыны, кин ӧз жаля виртыремзэ милемлы сётыны, ӟазегзэ сётыны. Кылсярысь, ӟазег милемлы туж кыдёкысь вуиз - Алнашысь юромо, малы ке шуоно оштолэзе патретэ пуктоно кариським, нош, валаськоды, тулыс пал кин ӟазегзэ возе на?
Юрий Кузнецов, «Удмуртия» книгапоттоннилэн кивалтӥсез, ӵектослэн редакторез

Солэн верамезъя, удмурт сиёнъёслы сӥзем берлоез книга 10 ар талэсь азьло потӥз вал. Нялтас вераса, отысь но 40 ар талэсь азьло потэм книгаосысь но куд-ог материалъёсты выль бичетэ пыртӥзы.

Ми шӧдӥськомы, берло аръёсы удмурт кухнялы калыклэн кыстӥськонэз будэгес, малы ке шуоно со абсолютно здоровой-а, мар-а шуом, сбалансированной. Асьмелэн туж голькыт сиёнъёсмы но ӧвӧл, туж вӧй пушкын зол жаритьтыса сиёнъёсмы но трос ӧвӧл. Асьмелэн туж трос кутӥсько пӧртэм будосъёс, кызьы нюлэскысь бичамъёсыз, бусыын ас понназы эрказ будӥсь, озьы ик бакчаосамы мерттӥськем
Юрий Кузнецов, «Удмуртия» книгапоттоннилэн кивалтӥсез, ӵектослэн редакторез

Удмурт калык сиён-юонъёсын тунсыкъяськонлэсь будэмзэ возьмато пӧртэм фестивальёс но. Озьы, Яр ёросын губилы сӥзем фестиваль ортчыто, Кезын – пешниклэсь оломар но пӧрало, Эграын но Ижкарын пельнянен ушъясько, Вотка ёросын кияр сылалто, дэбесъёс пӧртэм пумо пушкесъёсын перепеч пыжеменызы паймытыны тыршо, шарканъёс финн-угор калык сиёнъёсын тунсыкъяськисьёсты люкало.

Общепит туж ик кулэ кары тани та удмурт сиёнъёсты, шуом, перепеч пормаосты сяна, но калыкын со вань, калыкын со улэ, Удмуртие вань лыктэмъёслэн шӧмъямзы потэ удмурт сиёнъёсты. <…> Та книга возьматэ удмурт сиёнлэсь азинскемзэ. <…> Учкы котькуд бамез: дыльды вия – сием потэ
Юрий Кузнецов, «Удмуртия» книгапоттоннилэн кивалтӥсез, ӵектослэн редакторез

«Удмуртская народная кухня» книга «Удмуртия» издательстволэн 100 ар тырмонэзлы сӥземын. Тиражез бадӟым ик ӧвӧл – 1 сюрс. Но бадӟым кулэяськонэн валче со, кызьы вераз Юрий Кузнецов, потэм бераз ик «библиографической редкость» луиз ини. 

Ватсалом, ар пумозь книгапоттонни эшшо куинь синмаськымон ужъёссэ лыдӟись доры вуттыны малпа - удмурт усточиослэн ужъёсынызы «Секреты удмуртских мастеров» но туала удмурт прозалы но кылбуретлы сӥзем кык томен антология. 

Наши партнеры

Наверх
Вниз