Ижкар-9 °C
24 -тӥ толшор 2020 Удмуртарня
16+

«Ческыт выжыкыл» нимын ортчоз пельняньлы сӥзем фестиваль 2020-тӥ арын Удмуртиын

  • 938
  • 0
Ижкар / Удмуртия
 «Ческыт выжыкыл» нимын ортчоз пельняньлы сӥзем фестиваль 2020-тӥ арын Удмуртиын
Туспуктэм: Руслан Нуриахметов

2020-тӥ арын Удмуртиын «Пельняньлэн дунневыл нуналэз» фестиваль «Ческыт выжыкыл» ним улсын 1-8 тулыспалэ ортчоз. Со сярысь фестивалез радъясьёс иворто.

Удмуртия пельняньлэн шаерез гинэ ӧвӧл, со аспӧртэм мифологиеныз но дауркылъёсыныз висъяське. Вашкала вакытысь асьме дорозь капчи мылкыдо Лӧпшо Педунь, кужмо но дӥсьтӥсь Донды батыр, Идна батыр, Мардан батыр, выжыкылъёсысь Алангасаръёс вуизы.

Вуоно арын йӧскалык сиёнлы сӥзем фестиваль куноосты удмурт выжыкылъёсын но дауркылъёсын тодматыны ужпум пуктэ

Фестивальлэн валтӥсь нуналэз 8-тӥ тулыспалэ Ижкарысь Шор площадьын ортчоз. Со нуналэ ужрадэ люкаськем куноослы удмурт выжыкыл геройёслэн юрттэменызы удмуртъёслэсь Быдӟым книгазэс шедьтоно луоз. Со понна, бадӟым квестэ но пӧртэм мастер-классъёсы пыриськыса, карта лэсьтоно луоз.

Озьы ик фестиваль улсын сяме пырем вожвылъяськонъёс, пӧраськонъя но киужъя мастер-классъёс, омырын шудонъёс, удмурт калыклэн историез но йылолъёсыз сярысь спектакльёс, кино возьматонъёс но  лыдӟонъёс, фольклор фестиваль, пельнянен герӟаськем спортъя ӵошатсконъёс, пельнянен но киужъёсын вузкарон-адӟытон, «Зарни пельнянь» премиез сётон но мукет трос пӧртэм ужрадъёс ортчозы

Фестиваль улсын суредъёсъя но туспуктэмъёсъя «Оло зэм, оло даур…» вожвылъяськон радъяськоз. Мылкыд карисьёслы удмурт выжыкылъёсъя но дауркылъёсъя суредъёс яке туспуктэмъёс кылдытыны дэмлало. Ужъёс удмурт мифологиысь персонажъёсты, соослэсь инкуазен но адямиен герӟаськемзэс, кыӵе ке мифез яке дауркылэз возьматыны быгато.

Вожвылъяськон кык номинацияя ортчоз:

- «Удмурт выжыкылъёсъя но дауркылъёсъя суред». Ужъёсты пыриськисьёслэн арлыдзыя быръёзы: 10 аресозь покчиос, 10-16 аресъем пиналъёс, 16-35 аресъем егитъёс но 35 но солэсь бадӟымгес пыриськисьёс;

- «Удмурт выжыкылъёсъя но дауркылъёсъя туспуктэм». Таяз номинациын арлыдэз уг чаклало.

Пыриськисьёслэсь ужъёссэс туэ 19-тӥ толсурысен вуоно арын 15-тӥ толшорозь кутозы. 

Эшшо огез вожвылъяськон – «Лымы муртъёс». Отчы нимаз адямиос яке дышетскисьёслэн, нылпи садъёсы ветлӥсьёслэн, быдэ вуымтэослэн, карын улӥсьёслэн командаоссы пыриськыны быгато. Азбарын удмурт мифологиысь персонажъёслы сӥзем 2 метрозь ӝуждалаем лымылэсь фигура лэсьтоно но сое туспуктыса ужъёсты эскерисьёслы келяно. Ужъёсты туэ 20-тӥ толсурысен вуоно арын 3-тӥ тулыспалозь кутозы. 

Вожвылъяськонъёсын вормисьёсты 8-тӥ тулыспалэ Ижкарысь Шор площадьын пусъёзы

Фестивальлэн нырысетӥосыз пӧлысь ужрадэз - Ижкарысь азбаръёсын ортчытыны чаклам «Юмшан» ӵектос. Карын улӥсьёс удмурт калык шудонъёсын шудозы но Быдӟым книгаез шедьтон понна нырысетӥ юрттэт-валэкто басьтыны быгатозы. Шудонъёсты котькуд азбарын яке стадионын радъяны луэ. Со понна 24-тӥ толшорозь фестивальлэн нимлыко сайтэз пыр куриськон гожтоно. 27-тӥ толшоре радъясьёс 10 пала интыосты шараялозы, отын 1-2 тулыспалэ шудонъёс ортчозы.

Озьы ик 8-тӥ тулыспалэ 1 миляе семьяен, 2 миляе ас чотын но 3 миляе командаен «PelmenRun» («ПельменьРан») бызьылон ортчоз. Пыриськисьёс Удмуртиысь кивалтэтлэн юртэз дорысен Лихвинцев нимо, Октябрьлы 50 ар, Наговицын нимо урамъёстӥ бызёзы но Пушкинской урамын финише вуозы. Вормисьёсты соку гинэ пӧрам ческытлэсь но ческыт пельнянен куноятозы. Пыриськон понна куриськон гожтыны но куронъёсын тодматскыны чӧлсконпусъя луэ.

«Пельняньлэн дунневыл нуналэз» 2015-тӥ арысен арлы быдэ ортчытъяське но улосвылмес умой ласянь возьматон но тодмамон карон, удмурт йӧскалык лулчеберетэз возьматон понна радъяське

Тодэ вайытом, 2017-тӥ арын Ижкарын фестиваль улсын пельнянь сиёнъя дунневыл рекорд пуктӥзы вал. 

Наши партнеры

Наверх
Вниз