Ижкар-9 °C
24 -тӥ толшор 2020 Удмуртарня
16+

Удмурт кырӟасьёслы «Выль куара» вожвылъяськон нош ик ужзэ мытэ Ижкарын

  • 450
  • 0
Ижкар / Удмуртия
Удмурт кырӟасьёслы «Выль куара» вожвылъяськон нош ик ужзэ мытэ Ижкарын
Туспуктэм: vk.com ("ШУЛДЫР ӜЫТ")

Удмуртиысь кун филармониысь «Шулдыр ӝыт» ансамбльлэн «Выль куара» ӵектосэз нош ик ужзэ мытэ. Со сярысь ивортодэтъя «Удмуртия» агентстволэн корреспондентэзлы ансамбльлэн чеберлыкъя кивалтӥсез Наталья Ушакова вераз.

Туэ 10-тӥ оштолэзе со ньылетӥзэ ортчоз ини.

«Выль куараез» ми арлы быдэ куинь ар ӵоже ортчытӥм. Собере вис луиз. Выль нимъёс но ӧм адӟылэ ни кадь. Малпаським, кулэ-а та ӵектосэз лэсьтыны. Но туж трос юанъёс милемлы сётъязы: ку со луоз, малы уд ортчытӥське. Соин ми малпаським, малпаським но ӵектосэз нош ик улонэ лэзьыны кариським
Наталья Ушакова, «Шулдыр ӝыт» ансамбльлэн чеберлыкъя кивалтӥсез

Вожвылъяськонэ пыриськисьёсты толшор пумын-тулыпал кутсконын кылзозы. Соос пӧлысь тужгес устооссэ ӵектосэ кутозы. Азьланяз конкурсантъёсын «Шулдыр ӝыт» ансамбльысь артистъёс ужалозы.

Наталья Ушаковалэн верамезъя, вожвылъяськон «Голос» тодмо ӵектос выллем ортче. Дунъясьёс пыриськисьёслэсь куаразэс, кырӟаны быгатонлыксэс чаклалозы. Озьы ик сцена вылын асьсэды возьыны быгатэмзэс но дунъялозы.

Ми учкиськом адями шоры зэмос артист шоры сямен: быгатоз-а со азьланяз азинтыны удмурт эстрадаез, вань-а солэн бадӟым куараез
Наталья Ушакова, «Шулдыр ӝыт» ансамбльлэн чеберлыкъя кивалтӥсез

Ансамбльлэн кивалтӥсезлэн кылъёсызъя, азьвыл вожвылъяськонъёсы пыриськемъёс пӧлысь ог ӝыныез озьы-а тазьы-а сценаен, лулчеберет удысэн улонзэс герӟазы. Соос пӧлысь тодмоосыз - Ксения Ахметханова, Алина Егорова, Андрей Камалтдинов, Артемий Гаврилов, Игорь Уткин.

Тодэ вайытом, матысь дыре «Шулдыр ӝыт» ансамбль коллективе выль кырӟасьёсты быръён ортчытоз

Наши партнеры

Наверх
Вниз