100 лет государственности Удмуртии
Ижкар+14 °C
31 -тӥ куартолэзь 2020 Воскресенье
16+

Туала удмурт поэзилэн но прозалэн антологиоссы потӥзы Удмуртиын

  • 576
  • 0
Ижкар / Удмуртия
Туала удмурт поэзилэн но прозалэн антологиоссы потӥзы Удмуртиын
Туспуктэм: Алексей Арзамасцев

«Удмуртия» издательство «Туала удмурт поэзия» но «Туала удмурт проза» антологиос поттӥз. Соослэн пуштроссы сярысь ивортодэтъя «Удмуртия» агентстволы книгаопттонниысь чеберлыко литературая редактор, бичетъёсты люкась-радъясь Сергей Матвеев вераз.

Кылбурет но проза книгаосы оглом 74 авторъёс пыризы. Соос пӧлын Удмуртиысь гожъясьёслэн огазеяськонэнызы ӵектэм но издательствоен быръем гожъясьёс.

Кылбуръёсъя томе пыризы 42 авторъёс, проза томе пыризы 32 авторъёс. <…> Пӧртэм авторъёс. Арлыд ласянь пӧртэмесь, быгатонлыксы ласянь пӧртэмесь. Кутскыса егит-егит авторъёсын, шуом, йылпумъяса арлыдо авторъёсын, кудъёсыз литератураын бадӟым кылзэс веразы ни асьсэлэсь
Сергей Матвеев, «Удмуртия» книгапоттонниысь чеберлыко литературая редактор, антологиосты люкась-радъясь

Книгаосы котькуд гожъясьлэн туспуктэмез, со сярысь вакчияк ивортон пыртэмын. Авторъёс алфавитъя сётэмын.

Поэзия том кутске Богдан Анфиногеновен. Туж тодмо егит пияш, кудӥз культура удысамы туж али бадӟым инты басьтэ, егитъёслэн со валтӥсь эшсы луэ. <…> Кылбуръёсъя том йылпумъяське Анастасия Шумиловаен, кудзэ озьы ик тодӥськом, кудзэ мон туж-туж гажасько гожъяськыны быгатэменыз пумысен. <…> Со ачиз филолог бере, кылбураз но со шӧдӥське: одӥг ласянь кылъёсын туж быгатыса шудон, со дыре ик отын сомында мурдалаез
Сергей Матвеев, «Удмуртия» книгапоттонниысь чеберлыко литературая редактор, антологиосты люкась-радъясь

Кылбур бичетысь озьы ик шедьтыны луоз Василий Ванюшевлэсь, Владислав Кирилловлэсь, Анатолий Перевозчиковлэсь, Татьяна Черновалэсь, Виктор Шибановлэсь но мукетъёсызлэсь ужъёссэс.

«Туала удмурт поэзия» книгаын котькуд бамын графика амалэн быдэстэм удмурт шӧмо суредъёс пыртэмын

Прозалы сӥзем бичетын литература удысын кемалась тыршисьёслэн, классикъёслэн - Вячеслав Ар-Сергилэн, Михаил Атамановлэн, Владимир Владыкинлэн, Владимир Котковлэн, Олег Четкарёвлэн – веросъёссы пыртэмын, озьы ик егитъёслэн – Дарали Лелилэн, Лариса Мардановалэн, Елена Сараматовалэн но мукетъёсызлэн.

Ми возьматыны тыршим туала удмурт литературалэсь кытчы мынэмзэ, кыӵе со али вань, кыӵе со вал, но именно тани туала гожъяськисьёс пыр. Соос шоры учкыса, соослэн произведениоссы шоры учкыса, валаны луэ, кудпалагес вамышъя асьмелэн чеберлыко литературамы
Сергей Матвеев, «Удмуртия» книгапоттонниысь чеберлыко литературая редактор, антологиосты люкась-радъясь

Антологиосы шедем авторъёс пӧлын Удмуртиысь гожъясьёслэн огазеяськонзылэн ёзчиосыз гинэ ӧвӧл, гуртын улӥсь гожъясьёс но. Кылсярысь Алнаш ёросысь Любовь Ганькова.

Со таш-таш удмурт кылын гожъяське, ымтырос куртчыса сииськод кадь солэсь текстъёссэ. Туж мыным кельшо солэн текстъёсыз, кызьы-о сое пыртытэк
Сергей Матвеев, «Удмуртия» книгапоттонниысь чеберлыко литературая редактор, антологиосты люкась-радъясь

Книгаослэн бамъёсыз

3 фото

Антологилэн котькуд томез быдэн 2 сюрс 500 экземплярен потӥз. Сергей Матвеевлэн верамезъя, удмурт литература, удмурт лулчеберет понна со туж бадӟым тираж.

Озьы ик со пусйиз, удмурт литературалэн историяз таӵе бадӟым, йӧно антологиос ӧз потылэ на шуыса.

Удмурт литературалэн историяз но, уг вераськы ни «Удмуртия» издательстволэн историяз, таӵе книга, таӵе антология ӧй вал на. <…> Книгалэн 400 бамез, бадӟым форматэн потэмын со, соин ик отын туж узыр материал шуысал
Сергей Матвеев, «Удмуртия» книгапоттонниысь чеберлыко литературая редактор, антологиосты люкась-радъясь

Книгалэсь вылзэ, озьы ик графикаез егит суредась Анна Закревская быдэстӥз. 



Наверх
Вниз