Ижкар+10 °C
19 -тӥ куарусён 2020 Кӧснунал
18+

Удмурт кылын тужгес кужмооссэ чеберлыко литература ужъёсты бырйизы Удмуртиын

  • 536
  • 0
Ижкар / Удмуртия
Удмурт кылын тужгес кужмооссэ чеберлыко литература ужъёсты бырйизы Удмуртиын

22-тӥ толшоре Ижкарын «2019-тӥ арын удмурт кылын тужгес кужмоез чеберлыко литература уж» вожвылъяськонын вормисьёсты пусйизы.

Удмуртиысь печатья но калыке ивортодэт вӧлмытонъя агентство юрттэмен «Кенеш» журнал конкурсэз куинетӥзэ ни ортчытӥз. Таяз ардэ отчы 85 адями пыриськиз.

Удмурт шаерысь гожъясьёсмы сяна, пыриськизы на Татарстанысь, Башкортостанысь, Москваысь, Румыниысь но автормы. <…> Ми шумпотӥськомы, со гожъясьёсмы, палэнын но улыса, удмурт кылзэс уг вунэто, гожъясько, конкурсамы но пырисько
Ольга Бородина, «Кенеш» журналлэн валтӥсь редакторез

Солэн кылъёсызъя, котькуд ар вожвылъяськонлэн кыӵе ке но аспӧртэмлыкъёсыз луо. Кылем арын, кылсярысь, кылбуръёс, поэмаос ӧжытгес вуизы, соин ик та ӧрын вормисьёсты ӧз пусъе. Нош туэ та номинацие тужгес трос пыриськисьёс вал – 35 мурт. Но одӥгаз ӧрын ӟечлыко ужъёсты нош ик бырйыны ӧз быгатэ.

Удмурт кылысь ӟуч кылэ берыктэм ужъёс туж лябесь вал. Ӧжыт но ӧй вал, но туж лябесь вал, соин ик та номинациын нокинэ ӧм пусъе. Ӧм пусъе озьы ик бадӟым прозаез, малы ке шуоно бадӟым прозае вуизы ик вал ужъёс, но жюри та произведениосты лыдъяз повестёзь уггес вуо шуыса
Ольга Бородина, «Кенеш» журналлэн валтӥсь редакторез

Озьыен, 2019-тӥ арын удмурт кылын пӧртэм ӧръёсъя тужгес кужмоосыз чеберлыко литература ужъёс луизы:

- «Устоез проза («Тужгес устоез кузьмадёс, роман» но «Тужгес кужмоез верос, новелла, чеберлыко очерк, эссе» номинациосты огазеяса):

  • Ульфат Бадретдиновлэн «Айгуль – толэзь сяська» гожтосэз (Ижкар);
  • Лариса Чернышевалэн «Мон – ӧвӧл, мон – вань» веросэз (Ува ёросысь Вамья гурт).

- «Тужгес кужмоез кылбур сузьет, поэма»:

  • Рафит Миннекузинлэн кылбур сузьетэз (Башкортостанысь Бурай ёросысь Байшады гурт);
  • Анна Трубачевалэн кылбур сузьетэз (Дэри черкогурт).

- «Тужгес умоез пьеса»:

  • Владимир Котковлэн «Кытын тон, Кылдысин дауре?» эпической драмаез (Шаркан ёросысь Петуньки гурт);
  • Татьяна Кибардиналэн «Анай» пьесаез (Можга ёросысь Александрово гурт).

- «Пиналъёслы тужгес умоез гожтос»:

  • Вениамин Ившинлэн веросъёсын, кылбуръёсын, мадёсъёсын «Кыр сяськаос» сузьетэз (Ижкар);
  • Мария Никитиналэн веросъёсын сузьетэз (Пичи Пурга ёросысь Вуж Мӧнья гурт).

- «Чеберлыко литература ужез (ужъёсты) дунъясь яке литературалэсь азинскемзэ эскерись тужгес умоез гожтос (критика но литературатодос удысъёсъя)»

  • Любовь Фёдоровалэн «Байлык, йыруж но детектив» ужез.

- «Удмуртысь ӟуч кылэ берыктэм тужгес кужмоез уж» номинациын вормисьёс пусъемын ӧвӧл.

Азьвыл вожвылъяськонъёс бере куд-ог ужъёсты эскерисьёс пусйизы вал, тросэзлэн гожъясьёслэн удмурт кылзы лябгес шуыса. Ольга Бородиналэн верамезъя, таяз ардэ со пумысен трос алонъёс ӧй вал. Ачиз со Удмурт кун университетын дышетскисьлэсь Лариса Чернышевалэсь кылзэ пусйиз

Лариса Чернышевалэн туж чебер кылыз, жюриын котькудӥз сое пусйиз. Со туж мыло-кыдо ветлэ милям чеберлыко гожъяськонъя «Кылкузё» кружокамы, соин ик, мон малпасько, со кыл бордаз умой ужамын. Умой гожъясько, мон шуысал, лыдӟисьёсмы но, кудъёсыз удмурт кылэз ӟеч тодо, удмурт кылын трос верасько
Ольга Бородина, «Кенеш» журналлэн валтӥсь редакторез

Кызьы вераз Лариса Чернышева, со гожъяськыны пинал дыръяз ик кутскиз, но нырысь ужъёсыз ӟуч кылын вал. Удмурт кылын мылкыдъёссэ кисьтыны университетэ пыремез бере гинэ кутскиз. Кыллюкамзэ узырмытон вылысь удмурт классикъёсты трос лыдӟе, кылсярысь, Роман Валишинэз, Геннадий Красильниковез. Литературая вожвылъяськонэ со нырысьсэ пыриськиз.

Вожвылъяськон выль адямиосын тодматскыны юрттэ, аслад кужымедлы оскон сётэ
Лариса Чернышева, литературая вожвылъяськонын вормись

Мария Никитина вань улонзэ Вуж Мӧньяысь школаын удмурт кылъя но литературая дышетӥсь луыса ужаз. Солэн верамезъя, шоретӥ классъёсын дышетскись пиналъёслы гожтосъёс туж ӧжыт, соин ик югдурез тупатон борды ачиз басьтӥськиз.

Дышетӥсьын ужатозям мон со югдурез туж умой валай, мар кулэ и мылысь-кыдысь басьтӥськи со уж борды. Геройёсы мынам улонысь басьтэмын
Мария Никитина, литературая вожвылъяськонын вормись

Вожвылъяськон таяз арын но ортчоз. Кызьы пусйиз печатья но калыке ивортодэт вӧлмытонъя агентстволэн кивалтӥсез Александр Валов, со йӧскалык кылъёсты азинтон ужын бадӟым инты басьтэ. Озьы ик туэ Удмуртилэн кунлыкезлы 100 ар тырмонэн герӟаськем ужъёс но луозы шуыса оскемзэ вераз.

Конкурсын вормисьёслэн ужъёссы та ар ӵоже «Кенеш» журналын потозы

Ватсалом, кылем арын вожвылъяськонын 11 гожъясьёсты пусйизы

Нялтас вераса, удмурт кылэз тодӥсь 9-11 классъёсын дышетскисьёсты но колледжъёсысь, университетъёсысь студентъёсты покчиослы литератураез ӟучысь удмурт кылэ берыктонъя вожвылъяськонэ пыриськыны ӧтё. 

Тодэ вайытом, кылем арын Удмурт кыллэн нуналэз азьын Удмуртиысь литератураез эскерисьёс, гожъясьёс, тодосчиос туала удмурт литературалэн шедьтонъёсыз но ыштонъёсыз сярысь вераськыны люкаськылӥзы. Нош та нуналъёсы «Удмуртия» издательство «Туала удмурт поэзия» но «Туала удмурт проза» антологиос поттӥз.



Наверх
Вниз