Ижкар-3 °C
24 -тӥ тулыспал 2020 Вордӥськон
16+

Калыккуспо вожвылъяськонын грантъёс утӥзы Пичи Пурга ёросысь лыдӟетъюртъёслэн ӵектосъёссы

  • 653
  • 0
Пичи Пурга / Удмуртия
Калыккуспо вожвылъяськонын грантъёс утӥзы Пичи Пурга ёросысь лыдӟетъюртъёслэн ӵектосъёссы
Туспуктэм: vk.com (Грантовый конкурс «Православная инициатива»)

Пичи Пурга ёросысь кык лыдӟетъюртъёслэн ӵектосъёссы «Православная инициатива 2019-2020» калыккуспо вожвылъяськонын «Культура» ӧрын вормисе потӥзы но грантъёс утӥзы. Со сярысь Удмуртиысь Калыкъёслэн эшъяськон юртсылэн пресс-службаз ивортэ.

Пичи Пургаысь Семён Самсонов нимо ёрос лыдӟетъюртлэн «Право, славная экспедиция!» ӵектосэз нылпиосы но егитъёслы Пичи Пурга ёросын православилэн историеныз тунсыкъяськыны но вӧсям ошмесъёсты утялтонэ пыриськыны мылкыд сётон понна малпамын.

Туэ гужем 40 пиналъёс но быдэ вуымтэос ёросысь ошмесъёсъя экспедицие потозы, соослэн кылдэмзы сярысь тодозы но смартфонъёсазы фильм лэсьтозы. Уженызы Пукро нуналэ тодматозы

Ёросысь Уча черкогуртысь лыдӟетъюртлэн «Мастерская радости» ӵектосэз улсын ёрмыса улӥсь семьяосысь пиналъёс но арлыдоос ӵошен творчествоен вырозы. Радъясьёс пиналъёсын но мӧйыосын ӵош духовно-нравственной но православной спектакльёс пуктыны, шулдыръяськонъёс ортчытыны, литературалы сӥзем пумиськонъёс ортчытыны но черке ветлыны чаклало. 

Ӵектослы йылпумъянъёсъя вӧсьлыкъя но лулчеберетъя «Мастерская радости» центр кылдытозы

Ватсалом, вожвылъяськонэ «Образование и воспитание», «Социальное служение», «Культура» но «Информационная деятельность» ӧръёсъя ужъёсты кутӥзы. Радъясьёслы 993 куриськонъёс вуизы. Соос пӧлысь Россилэн 55 улосвылъёсысь, озьы ик Шор Азиысь но кыдёкысь кунгож сьӧрысь 194 ӵектосъёс вормисьёс луизы. Удмуртия тужгес трос куриськонъёс келям улосвылъёс пӧлы пыриз, вормисьёс пӧлын, Пичи Пурга ёросысь ӵектосъёс сяна, эшшо тямыс проектъёс. 

Тодэ вайытом, кылем ар пумын Удмуртия 5 шоръёзо ӧнер дышетсконниосын быдэн вить выль туала мастерскойёс усьтыны грантъёс басьтӥз.

Наши партнеры

Наверх
Вниз