100 лет государственности Удмуртии
Ижкар+9 °C
28 -тӥ южтолэзь 2020 Кӧснунал
16+

«Шулдыр ӝыт» ансамбле выль кырӟасьёсты кылзон ортчиз Ижкарын

  • 386
  • 0
Ижкар / Удмуртия
«Шулдыр ӝыт» ансамбле выль кырӟасьёсты кылзон ортчиз Ижкарын
Туспуктэм: Руслан Нуриахметов

Удмуртиысь удмурт кун филармониын «Шулдыр ӝыт» ансамбле сюрон понна кырӟасьёсты кылзонъёс ортчизы. Кастинглэн нырысетӥ нуналаз пыриськисьёсын тодматскыны ивортодэтъя «Удмуртия» агентстволэн корреспондентэз но вуылӥз.

Кастинге куать аспӧртэм, яркыт егит нылъёс лыктӥзы. Соосты «Шулдыр ӝыт» ансамбльысь артистъёс кылзӥзы. Коллективлэн чеберлыкъя кивалтӥсез Наталья Ушакова нылашъёслы пӧртэм юанъёс сётъяз: малы лыктӥзы, мар возьмало, вань-а крезьгурлы дышетскемзы, тодо-а ансамбльлэн ужез сярысь но мукет. Вань юанъёслы валэктонъёс сётэмзы бере кырӟасьёс ас быръемзыя кык кырӟан быдэстӥзы.

«Шулдыр ӝыт» ансамбле сюрон понна кастинг

 

Дэри ёросысь Вуж Тяма гуртысь Лиана Корепанова «Шулдыр ӝытэн» вазен тодмо ини. 2013-тӥ арын нылаш ансамбльлэн «Выль куара» ӵектосаз пыриськиз но куинетӥ инты басьтӥз. Со бӧрсьы артистъёсын ӵош ужаса но вуттӥз. Но бӧрысь ансамбльысь кошкиз, али выльысь берытскыны мылкыдыз вань.

«Шулдыр ӝыт» яра, малы ке шуоно со мыным лулыя матынгес луэ. Ваньмыз мыным кельше: отын чебер, чилясь дэремъёс вань, чебер кырӟанъёс но отын умой адямиос ужало
Лиана Корепанова, «Шулдыр ӝыт» ансамбльлэн кастингаз пыриськись

Ансамбльысь артистъёс азьын Лиана «Ой, да не вечер» калык кырӟанзэ но «Хуторянка» кырӟанзэ быдэстӥз. 

Яратӥсько сцена вылын тэтчаны, озьы шуом, яра адямиослы кырӟаса, шулдыртыса шумпотон вайыны
Лиана Корепанова, «Шулдыр ӝыт» ансамбльлэн кастингаз пыриськись

Пичи Пурга ёросысь Гожна гуртысь Анжелика Скворцова кырӟаны школаысен кутски шуыса вераз. Соку Пичи Пургаысь крезьгуръя школаын дышетскиз, нош али Ижкарысь лулчеберетъя училищеын тодон-валан люка. Нылаш ансамбльысь артистъёс азьын a capella амалэн «Не для меня» ӟуч калык кырӟанэз но «Ой, яра» кырӟанэз быдэстӥз. Удмурт кырӟанъёс туж сюлэмызъя шуыса пусйиз.

Удмурт эстрада мыным некызьы кельше. Мон золгес кылӟиськисько удмурт кырӟанъёсты, ӟучъёссэ сярысь
Анжелика Скворцова, «Шулдыр ӝыт» ансамбльлэн кастингаз пыриськись

Ваньзэсты нылашъёсты кылзыса, «Шулдыр ӝыт» ансамбльлэн чеберлыкъя кивалтӥсез пӧлазы кельшисьёсыз но вань шуыса вераз.

Кин ке но туж егит на, но солэн потэ азьланяз пыриськемез «Шулдыр ӝыт» ансамбле. Мон малпасько со туж умой, малы ке шуоно егитъёс будо, соослэн вань мылкыдзы пырыны коллективе, со тоже ми понна туж умой
Наталья Ушакова, «Шулдыр ӝыт» ансамбльлэн чеберлыкъя кивалтӥсез

Озьы ик Наталья Ушакова кылзонъёсы пиос ӧз вуэ шуыса пусйиз но кыкетӥ нуналаз, оло, лыктозы шуыса осконзэ вераз.

Пусъём, ансамбле сюрон понна кастингъёс 29-30 толшоре ортчизы. Кинэ бырйизы, вуоно арняе тодмо луоз.

Тодэ вайытом, матысь дыре «Шулдыр ӝыт» ансамбль нош ик «Выль куара» ӵектоссэ улӟытоз.



Наверх
Вниз