Ижкар-3 °C
24 -тӥ тулыспал 2020 Вордӥськон
16+

40 егит удмурт гожъясьёс литературая «Кебит» лабораторие пыриськизы Удмуртиын

  • 429
  • 0
Ижкар / Удмуртия
40 егит удмурт гожъясьёс литературая «Кебит» лабораторие пыриськизы Удмуртиын
Туспуктэм: vk.com (Литературная лаборатория "Кебит")

6-9 тулыспалэ Ижкарысь «Дзержинец» лагерьын кутскись удмурт гожъясьёс понна литературая «Кебит» лаборатори ортчиз. Отчы Удмуртиысь, Татарстанысь, Башкортостанысь 40 егитъёс пыриськизы.

Кызьы вераз ивортодэтъя «Удмуртия» агентстволы лабораториез огез радъясь Лукерья Шихова, пыриськисьёсты онлайн амалэн вожвылъяськон пыр бырйизы.

Ми кутӥмы ини со адямиосты, кинлэн вань опытэз гожъяськыны. Кин умой гожъяське ини, соосты ми бырйим но дышетӥмы эшшо но умойгес, золгес гожъяськыны
Лукерья Шихова, литературая «Кебит» лабораториез огез радъясь

Егитъёсты тодмо удмурт но ӟуч гожъяськисьёс вить ӧръёсъя дышетӥзы: кылбурет, проза, драма, критика но берыктон уж. Дышетӥсьёс пӧлын вал Екатеринбургысь драматург Ярослава Пулинович, прозаик, критик Роман Сенчин, озьы ик удмурт кылбурчиос, прозаикъёс, драматургъёс но литератураез эскерисьёс - Лариса Марданова, Алексей Арзамазов, Пётр Захаров, Вера Пантелеева, Виктор Шибанов, Вячеслав Ар-Серги но Василий Ушаков.

Ижкарысь эм академиын дышетскись Ольга Камашева кылбур удысъя лабораторие пыриськиз. Со выль дон-валанъёс басьтыны, янгышъёссэ валаны, соосты тупатыны шуыса ужрадэ лыктӥз. Озьы ик, солэн верамезъя, лаборатория валаны юрттӥз, кытчы вамыштэ удмурт литература, мар со кылбурет, мар понна со кулэ гожъясьлы но калыклы.

Милемлы валэктӥзы, кызьы малпано сюжет, кызьы суредано образъёс, асьме вакытэ кыӵе темаослы, проблемаослы саклык висъяно гожъямъёсын. Дышетӥзы кылбурлэсь пушсузьетсэ шонер радъяны, шонер кутыны кылъёслэсь формаоссэс. Тодматӥзы ляб но кужмо амалъёсын, кызьы гожто кылбурез озьы, со лыдӟисьлы валамон но тунсыко мед луоз шуыса. Веразы на, котькуд кыллэн кужымез вань, соин ритм но рифма кылдытон понна гинэ кылъёсты кутоно ӧвӧл. Занятиосын ми дышетскимы гожъяськыны пӧртэм амалъёсын но кылбур удысысь пиналъёсын оскалтӥмы гожтыны верлибр
Ольга Камашева, литературая «Кебит» лабораторие пыриськись

Алёна Мохова али Москваысь Литературая институтын дышетске. «Кебитын» со драма ӧре пыриськиз.

Мон ас поннам басьтӥ туж трос информация и самой, наверно, валтӥсез, луэ, что патриотизм сюлэмад тынад пушъе, тон валаны кутскиськод, удмурт литератураез кулэ азинтыны шуыса, и со ваньмыз тынад кияд. Соин ик тон гожъяськиськод, мар ке выльзэ лэсьтыны турттӥськод, со туж бурдъятэ. <…> Мон шумпотӥсько, адямиос люкаськизы шуыса, со туж умой проект
Алёна Мохова, литературая «Кебит» лабораторие пыриськись

Полина Куликова кылбур гожъя вал, но лабораториын берыктон ӧрен тодматскыны малпаз но онлайн вожвылъяськонэ юри берыктэм ужъёссэ келяз.

Занятиосын ми эскеримы котькудмылэсь ужмес но ужамы янгышъёс вылын. Янгышъёс вылын ужаськод ке, ачид но валаны кутскиськод аслэсьтыд янгышъёстэ, синмыд лэчытгес луэ кадь, «орфографической зоркость». Со понна, конешно, трос ужаны кулэ. Мон валаны кутски, со сыӵе огшоры уж гинэ ӧвӧл вылэм, малы ке шуоно куд-ог кылъёсты удмурт кылэ берыктыны уг луы яке куд-ог кылъёсты ӟуч кылэ берыктыны уг луы. Соин со туж кулэ уж али дырлы, тем более куке глобализация мынэ
Полина Куликова, литературая «Кебит» лабораторие пыриськись

Лукерья Шиховалэн верамезъя, куартолэзе лабораториын гожтэм ужъёсын бичет поттозы. Со сяна, южтолэзь пумозь пыриськисьёслэсь мукет ужъёссэс кутозы на.

Со ужъёслы критикъёс, кин дышетскиз критикалы, гожтозы критической статьяос, нош берыктӥсьёс со ужъёсты берыктозы ӟуч кылэ
Лукерья Шихова, литературая «Кебит» лабораториез огез радъясь

300 бамъем бичетэз 500 экземплярен поттыны малпало.

Тодэ вайытом, удмурт гожъясьёслы литературая лаборатори ортчытыны коньдон Россисысь егитъёсын ужанъя федерал агентстволэн творчествоя «Таврида Лит» ӵектосэзлэн грантъёсъя вожвылъяськоназ утӥзы.

Наши партнеры

Наверх
Вниз